Jeremïas
30 Jeremïastam Teyta Jehovä këta nirqan: 2 “Israel nunakunapa Diosnin Teyta Jehovämi këta nin: ‘Llapan ninqaqkunata juk libruman qellqë. 3 “¡Rikäyë!” ninmi Teyta Jehovä. “Ichikllachönam Israelpita y Judäpita+ sirwimaqnïkunata, juk nacionman apayanqampita, unë kastankunata entreganqä markakunaman kutitsimushaq, y yapëmi tsë markakunapa duëñun kayanqa” ninmi Teyta Jehovä’”.+
4 Israelpita y Judäpita nunakunatam Teyta Jehoväqa këta nirqan.
5 Awmi, Teyta Jehovämi këta nin:
“Mantsakar fuertipa büllayanqantam qamkunaqa wiyayarqunki.
Nunakunaqa alläpa mantsakashqam këkäyan y manam yamë kë kantsu”.
6 “Tapukuyë, ¿juk ollqu qeshyaq këta puëdinmantsuraq?
Tsëqa, ¿imanirtan wamran yurinampaqna këkaq warminö,
puëdeq ollqukunapis pachankuna yatakushqa këkäyan?+
¿Imanirtan cärankunapis yuraqpüru këkan?
7 Tsë junaqqa alläpa mantsëpaqmi kanqa,+
y manam tsënöqa imëpis kanqatsu.
Tsë tiempuqa imëka mana allikunapa pasarpis,
Jacobpa kastankunaqa salvashqam kayanqa”.
8 Angelkunata mandaq Teyta Jehoväqa këtapis ninmi: “Tsë junaqqa matankankunachö puritsiyanqan yügutam pakishaq, y kuyuntankunatapis o labräsankunatapis rachirishaqmi. Y manam yapëqa, juk nacion nunakunapa* esclävun kayanqanatsu. 9 Pëkunaqa noqa Jehovä Diosninkunata, y noqa churanqä gobernaq Davidtam sirwiyanqa”.+
10 “Qamkunaqa, sirwimaqnï Jacobpa kastankuna,
ama imatapis mantsayëtsu. Israelpita nunakuna, ama alläpa mantsakäyëtsu.+
Karu sitiuman y juk nacionman apashqa kayanqëkipitam qamkunata salvayashqëki.+
Y qamkuna, Jacobpa kastankunaqa, markëkikunaman kutimurmi
yamë y tranquïluna kawakuyanki,
y manam ni pï mantsakätsiyäshunkitsu”+ ninmi Teyta Jehovä.
11 Teyta Jehoväqa kënöpis ninmi:
“Noqaqa qamkunata salvanäpaqmi* qamkunawan këkä.
Noqa permitiptï nacionninkunaman apayäshoqniki nunakunatam ushakätsishaq,+
peru qamkunataqa manam ushakätsiyashqëkitsu.+
Tsënö kaptimpis, qamkunatapis castigayashqëkim y wanayanqëkimannömi* corregiyashqëki”.+
12 Teyta Jehoväqa këtam nin:
“Pasëkäyanqëkipaqqa manam jampi kantsu,+
y herïdëkikunaqa manam imëpis alliyanqatsu.
13 Qamkunataqa manam ni pï defendiyäshunkitsu,
y qerikikunapaqpis manam jampi kannatsu.
Qamkunaqa manam imëpis alliyäyankinatsu.
14 Imëka mana allikunata rurayanqëkipita
y mëtsika jutsata* rurayanqëkipitam
chikiyäshoqniki nunakunanö mana llakipashpa* qamkunata castigarqö.*+
15 Imëka mana allikunata rurayanqëkipita
y mëtsika jutsata* rurayanqëkipitam+ qamkunataqa tsënö castigarqö.*
Tsëqa, ¿imanirtan mana allikunata pasayanqëkipita quejakuyanki?
Nanatsikuyanqëkipaqqa manam jampi kantsu.
16 Ushakätsiyäshuynikita munaqkunaqa, kikinkunam ushakäyanqa,+
y llapan chikiyäshoqnikikunatapis, juk nacionmanmi apayanqa.+
Suwapäyäshoqniki nunakunataqa, kikinkunatapis suwapäyanqam.
Imëkëkikunata apakoq nunakunapataqa, imëkankunatam apakuyanqa”.+
17 “Qamkunataqa, ‘mana ni pï ashinqan Sionpita nunakuna’+
nirmi mana kaqpaq churayäshurqunki.
Tsënö kaptimpis, alliyäyänëkipaqmi yanapayashqëki y herïdëkikunatam jampimushaq”+ ninmi Teyta Jehovä.
18 Teyta Jehoväqa kënöpis ninmi:
Yapëmi taksha jirka jananchö markankuna rurayanqa,+
y fuerti törrinkunatapis yapëmi sitiunkunachö rurayanqa.
19 Pëkunaqa agradecikurmi cantayanqa y kushishqam kayanqa.+
Manam wallkaqllatsu kayanqa,+
noqa permitiptïmi mëtsika kayanqa.
Tsëmi mana kaqpaqqa churayanqanatsu.+
20 Pëkunapa tsurinkunaqa unënömi imëkayoq kayanqa,
y noqapa rikënïchömi puëdeq nacion tikrayanqa.+
Y llapan sufritseqninkunatam castigashaq.+
21 Marka mayinkunam puëdeq dirigeqninkuna kanqa,
y gobernaqninkunapis pëkunapitam kanqa.
Y noqaman witimunanta permitiptïmi noqaman witimunqa.
Tsënö mana kaptinqa, ¿piraq valienti kanman noqaman witimunampaq?” ninmi Teyta Jehovä.
22 “Qamkunam sirwimaqnïkuna kayanki+ y noqam Diosnikikuna kashaq”.+
23 ¡Rikäyë! Teyta Jehoväpa cöleranqa shukukuy vientunö,+ y imëkakunata ushakätseq vientunömi shamunqa.
Y mana allita ruraq nunakunapa peqankunamanmi o umankunamanmi chämunqa.