Exodu
30 Inciensuta rupatsiyänëkipaqmi+ acacia qerupita juk mas altarta rurayänëki.+ 2 Tsë altarqa cuadrädum kanan, largunwan anchunqa cuarenta y cincu centïmetrusnömi* kanan, y altunnam ochenta y nuëvi centïmetrus* kanan. Altarwan esquïnankunachö ëwaq waqrakunaqa juk piëzallam kayänan.+ 3 Tsë altarpa jananman, lädunkunaman y esquïnanchö waqrakunamanmi alli kaq öruta laqayänëki. Y tsë altarpa entëru jana kuchumpaqmi örupita adornun rurayänëki. 4 Altarpa chuskun kuchunmanmi örupita juk argöllata churayänëki, adornun jawanchömi ëwanan. Y puritsiyänëkipaqqa tsë argöllakunapam listonkunata ullutsiyänëki. 5 Tsë listonkunataqa acacia qerupitam rurayänëki, y jananmanmi öruta laqayänëki. 6 Y Sagrädu Cäjapa+ amänunchö kanampaqmi, tsë altartaqa Sagrädu Cuartuta tsapaq cortïnapa puntanman churayänëki. Tsëchömi qamta yuripushqëki.+
7 Cada patsa warëmi Aaronqa+ altarchö inciensuta rupatsinan,+ y tsëtaqa ruranan chiwchikunata rikaq ëwarmi.+ 8 Y tardipa* chiwchikunata tsaritsirpis, yapëmi inciensuta rupatsinan. Noqa Jehoväpa rikënïchömi tsë inciensu qarëtaqa imëpis rurayänëki. 9 Ama tsë altarchöqa mana mañakunqä inciensuta,+ ni ushakanqanyaq rupatsina qarëkunata, ni gränupita rurashqa qarëkunata rupatsiyankitsu, y ama vïnu qarëtapis jichayankitsu. 10 Tsë altar rikënïchö limpiu kanampaqmi, Aaronqa watachö juk kuti+ animalpa yawarninwan altarpa waqrankunata llushinan. Tsëtaqa jutsapita* perdonashqa kayänampaq apayanqan animalpa yawarninwanmi ruranan.+ Y tsë mandakunqätaqa wata watam tsënö rurayänëki. Tsë altarqa noqa Jehoväpaq alläpa sagrädum”.
11 Teyta Jehoväqa Moisesta kënömi nirqan: 12 “Israelïtakuna ëkaq kayanqanta musyayänëkipaq censuta rurayaptikiqa,+ mana castigashqa kayänampaqmi llapan israelïtakuna vïdankunapita noqa Jehoväpaq päguta apayämunan. 13 Llapan censashqa kaqkunam seis grämus plätata pagayänan. Tsë seis grämus plätaqa* noqa Jehoväpaqmi kanqa.+ Tsë plätataqa sagrädu sitiuchö këkaq pësakunata churëkurmi pesayänëki.+ 14 Veinti watayoqpita witsëpa llapan censashqa kaqkunam noqa Jehoväpaq päguta apayämunan.+ 15 Cada ünum vïdankunapita seis grämus plätata noqa Jehoväpaq apayämunan. Rïcupis manam mastaqa paganantsu, ni waktsapis manam mënustaqa paganantsu. 16 Vïdankunapita pagakur israelïtakuna apayämunqan plätaqa carpa* wayichö gastukunapaqmi kanqa. Tsë plätaqa, israelïtakuna kawëninkunapita pagayänampaq, y noqa Jehovä pëkunata yarpänäpaqmi kanqa”.
17 Teyta Jehoväqa Moisesta kënömi nirqan: 18 “Cobripitam+ jatun lavatoriuta y tätsiyänëkipaq armazonta rurayänëki. Tsëpitanam carpa* wayipa y altarpa chowpinman* churaskir tsë lavatoriuman yakuta winayänëki.+ 19 Tsëchömi Aaronwan tsurinkuna makinkunata y chakinkunata yakuwan awikuyänan.*+ 20 Carpa* wayiman manaraq yëkurnin, altarman manaraq witirnin o noqa Jehoväpaq animalkunata manaraq rupatsirmi, pëkunaqa mana wanuyänampaq tsë yakuwan awikuyänan.* 21 Mana wanuyänampaqmi chakinkunata y makinkunata yakuwan awikuyänan.* Kë mandakunqätam Aaron, tsurinkuna y tsëpita yureq tsurinkunapis cumpliyänan”.+
22 Teyta Jehoväqa kënömi Moisesta nirqan: 23 “Kë alläpa shumaq pukutaqkunatam o mushkoqkunatam juntayänëki: joqta kïlu mïrra plantapa weqinta, kima kïlu canëlata, kima kïlu mishkeq cäñata* 24 y seis kïlus juk cläsi canëlata.* Tsëkunataqa sagrädu sitiuchö këkaq pësakunata churëkurmi pesayänëki.+ Tsënöllam chusku litru* aceiti de olïvutapis juntayänëki. 25 Tsë llapanta shumaq pichurmi* sagrädu aceitita rurayänëki.+ Tsë sagrädu aceitiqa pitapis akrayänëkipaqmi kanqa.
26 Tsë sagrädu aceititam jichayänëki carpa* wayiman,+ Sagrädu Cäjaman, 27 mësaman, mësachö utilizäyänëkipaq kaqkunaman, candelabruman, candelabruchö utilizäyänëkipaq kaqkunaman, inciensuta rupatsina altarman, 28 ushakanqanyaq rupatsina qarëkunata rupatsiyänëki altarman, altarchö utilizäyänëkipaq kaqkunaman, jatun lavatoriuman y armazonninman. 29 Tsënöpam sirwimarnï llapan utilizäyänëkipaq kaqkunaqa alläpa sagrädu kanqa.+ Tsënöllam altarchö sirwimaqkunapis imëkachö limpiu kayänan.+ 30 Y Aarontawan+ tsurinkunatam+ noqapaq akranëki, y sacerdöti karnin sirwiyämänampaqmi sagrädu aceitita peqankunaman o umankunaman jichapunëki.+
31 Israelïtakunatam kënö ninëki: ‘Manam imëpis qonqayänëkitsu tsë sagrädu aceitiqa pitapis akrayänëkipaq kanqanta.+ 32 Y manam pï nunapis tsë aceititaqa cuerpunman jichakunantsu, ni manam tsënö aceitita ruranantsu. Tsë aceitiqa imëpis sagrädum kanqa. 33 Pillapis tsënö aceitita rurëkur mana derëchuyoq nunapa cuerpunman jichapuptinqa, tsë nunata wanutsiyänëkim’”.+
34 Teyta Jehoväqa Moisesta kënömi nirqan: “Y shumaq pukutaqkunatam o mushkoqkunatam juntayänëki: estacte plantapa weqinta, inciensuta, galbanuta y yuraq inciensuta. Llapantapis tsë cantidällatam juntayänëki.+ 35 Tsë llapanta juntarkurmi inciensuta rurayänëki,+ kachin winarkurllam shumaq pichuyänëki.*+ Tsë inciensuqa sagrädum kanqa. 36 Tsëpitanam ichikllata aqëkur carpa* wayichö këkaq Sagrädu Cäjapa puntanman jichayänëki, y tsëchömi yuripushqëki. Tsë inciensuqa qamkunapaq alläpa sagrädu kanan. 37 Tsë inciensu sagrädu kaptinmi tsënö inciensutaqa qamkunapaq rurayänëkitsu.+ Tsënö inciensuqa noqa Jehovällapaqmi kanqa. 38 Tsëmi pillapis shumaq pukutanqanta o mushkunqanta gustar tsë inciensuta ruraptinqa, tsë nunata wanutsiyänëki”.