Levïticu

20 Tsëpitanam Teyta Jehoväqa Moisesta kënö nirqan: 2 “Israelïtakunatam këta ninëki: ‘Qamkuna o qamkunawan këkaq forastërukuna Mölek santupaq tsurinkunata apayaptinqa, llapëkim tsë nunata rumiwan wanutsiyänëki.+ 3 Mölek santupaq tsurinkunata aparnin sagrädu sitiüta y limpiu jutïta mana respetanqampitam, tsë nunapa contran churakar wanutsishaq.+ 4 Mölek santupaq juk nuna tsurinta apëkaqta rikëkar, imatapis mana rurayaptiki y tsë nunata mana wanutsiyaptikiqa,+ 5 tsë nunapa y familiampa contranmi kashaq.+ Y traicionamarnin jukwan jukwan kakoq* cuenta Mölek santuta adorayanqampitam, tsë nunata y ruranqanta qateqkunata ushakätsishaq.

6 Y juk nuna, noqata dejaramar jukwan jukwan kakoq* cuenta, wanushqakunawan parlaq nunakunaman+ o suertita qateqkunaman+ ëwaptinqa, cölerakurmi tsë nunata wanutsishaq.+

7 Noqam Jehovä Diosnikikuna kä, tsëmi qamkunaqa jukläya kayänëki, y rikënïpaqmi limpiu kayänëki.+ 8 Llapan mandakunqäkunatam imëpis cäsukuyänëki.+ Noqam Jehovä Diosnikikuna kä, limpiu sirwimaqnïkuna kayänëkipaqmi qamkunata akrarqö.*+

9 Papäninta o mamäninta insultaq* nunataqa wanutsiyänëkim. Papäninta o mamäninta insultashqa karmi, wanunqampita kikin culpayoq kanqa.+

10 Pï nunapis nuna mayimpa warminwan oqllanakushqa kaptinqa, kënömi rurayänëki: pillapis nuna mayimpa warminwan oqllanakushqa kaptinqa, tsë nunata y tsë warmitam wanutsiyänëki.+ 11 Pï nunapis madrastanwan oqllanakurqa, papänintam penqakuyman churashqa.+ Tsëmi tsë nunata y madrastanta wanutsiyänëki. Wanuyanqampitaqa kikinkunam culpayoq kayanqa. 12 Pï nunapis lumtsuyninwan oqllanakuptinqa, rurayanqan melanëpaq kaptinmi, tsë nunata y lumtsuyninta wanutsiyänëki. Y wanuyanqampitaqa kikinkunam culpayoq kayanqa.+

13 Pï nunapis warmiwannö ollqu mayinwan oqllanakuptinqa, rurayanqan melanëpaq kaptinmi ishkanta wanutsiyänëki.+ Y wanuyanqampitaqa kikinkunam culpayoq kayanqa.

14 Pï nunapis warminwan y warmimpa mamanwan oqllanakuptinqa, rurayanqan melanëpaq kaptinmi,*+ kimanta wanuratsir ushakäyanqanyaq rupatsiyänëki.+ Tsënöpa melanëpaq rurëkunata ruraqkuna mana kayänampaq.

15 Pï nunapis animalwan ruranakuptinqa, tsë nunata y tsë animaltam wanutsiyänëki.+ 16 Pï warmipis ruranakunampaq ima animalmampis witiptinqa,+ tsë warmita y tsë animaltam wanutsiyänëki. Y wanuyanqampitaqa kikinkunam culpayoq kayanqa.

17 Pï nunapis tsë papällapita o tsë mamallapita paniwan oqllanakuptinqa, rurayanqan penqakuypaq kaptinmi,+ llapankunapa rikëninchö ishkanta wanutsiyänëki. Paninta penqakuyman churashqa karninmi, tsë nunaqa castigashqa kanqa.

18 Pï nunapis killanwan këkaq warmiwan oqllanakuptinqa, yawar sagrädu kanqanta mana respetayanqampitam,+ ishkanta wanutsiyänëki.

19 Ama mamëkikunapa nananwan o ñañanwan ni papänikikunapa paninwan oqllanakuyankitsu. Tsëta rurarqa ishkëkim castigashqa kayanki,+ y tiyëkikunatapis penqakuymanmi churayanki. 20 Pï nunapis tiyumpa warminwan oqllanakurqa, tiyuntam penqakuyman churanqa.+ Jutsata* rurayanqampitam ishkanta castigayänan, y wamrannaqmi wanuyanqa o wañuyanqa. 21 Pï nunapis wawqimpa warminwan casakurqa, melanëpaq rurëtam ruran.+ Y wawqinta penqakuyman churashqa kaptinmi tsurinkuna kanqatsu.

22 Qamkunata pushëkanqä* markakunapita mana qarqushqa kayänëkipaqmi,+ llapan mandakunqäta y llapan leynïkunata+ imëpis cäsukuyänëki.+ 23 Ushakätsinäpaq markakunachö nunakuna mana allikunata rurayanqanqa melanëpaqmi.+ Tsëmi qamkunaqa tsë nunakuna mana allita rurayanqanta qatiyänëkitsu.+ 24 Tsëmi qamkunata nirqä:* “Qamkunam tsë nunakuna täkuyanqan markakunapa duëñun tikrayanki. Tsë markakunachöqa lichipis, mielpis mëtsikam kan.+ Noqam Jehovä Diosnikikuna kä, y limpiu sirwimaqnïkuna kayänëkipaqmi qamkunata akrarqoq”.+ 25 Qamkunaqa ima animal limpiu o mana limpiu kanqanta, ima pishqu limpiu o mana limpiu kanqantam musyayänëki.+ Y ama rikënïpaq mana limpiu animalkunata, pishqukunata ni lätëpa pureq animalkunata mikuyankitsu. Tsëta rurarqa manam rikënïpaq limpiutsu kayanki.+ 26 Noqaqa limpiu sirwimaqnïkuna kayänëkipaqmi akrarqoq.+ Noqa Jehovä limpiu Dios kaptïmi, qamkunapis llapanchö limpiu kayänëki.+

27 Pï ollqupis o warmipis wanushqakunawan parlayanqanta neqkunaman o suertita qateqkunaman ëwaptinqa, tsë ollquta o tsë warmitam rumiwan wanutsiyänëki.+ Y wanuyanqampitaqa kikinkunam culpayoq kayanqa’”.