Marcus
15 Patsa waräriptinllam Judïukunapa Jatun Cortinchö trabajaq mandakoq sacerdötikuna, markachö dirigeqkuna y Leyta qellqaqkunaqa, imata rurayänampaq kaqta parlayänampaq llapankuna juntakäyarqan. Tsëpitanam Jesuspa makinta watarkur Pilätuman apayarqan.+ 2 Tsënam Pilätuqa kënö tapurqan: “¿Qamku judïukunapa gobernaqnin kanki?”.+ Jesusnam, “awmi, kikikim nikanki” nir contestarqan.+ 3 Peru mandakoq sacerdötikunaqa imëkapitam tumpayaq. 4 Tsënam Pilätuqa nirqan: “¿Manaku imatapis ninki?+ ¿Manaku wiyanki imëkapita tumpayäshunqëkita?”.+ 5 Y Jesus imatapis mana contestaptinmi Pilätuqa alläpa espantakurqan.+
6 Cada wata Pascua Fiestachömi Pilätuqa, nunakuna mañakuyanqan prësuta libri dejareq.+ 7 Tsë witsanmi, Barrabas jutiyoq nuna prësu këkarqan. Pëqa autoridäkunapa contran churakar nuna mayinkunata wanutseqkunawanmi prësu këkarqan. 8 Tsëmi nunakunaqa Pilätuman ëwëkur, imëpis ruranqannölla pëkuna mañakuyanqan nunata libri dejanampaq mañakuyarqan. 9 Pënam, “¿judïukunapa gobernaqninta libri dejanätaku munayanki?” nir contestarqan.+ 10 Pilätuqa tsënö nirqan, mandakoq sacerdötikuna chikipar entregashqa kayanqanta cuentata qokurmi.+ 11 Peru mandakoq sacerdötikunaqa, Barrabasta libri dejanampaq mañakuyänampaqmi tsëchö nunakunata yachatsiyarqan.+ 12 Tsënam Pilätuqa nunakunata yapë kënö nirqan: “Tsëqa, ¿imatataq rurashaq judïukunapa gobernaqnin niyanqëki nunawan?”.+ 13 Y pëkunaqa yapëmi fuertipa, “¡qeruman warkuyätsun!”* niyarqan.+ 14 Tsënam Pilätuqa, “¿imanir? ¿Ima mana allitataq rurashqa?” nirqan. Peru pëkunaqa mas fuertiparan, “¡qeruman warkuyätsun!” niyarqan.+ 15 Tsënam Pilätuqa nunakunata kushitsita munar Barrabasta libri dejarirqan. Tsëpitanam Jesusta maqëkatsir+ qeruchö wanutsiyänampaq entregarqan.+
16 Tsënam soldädunkunaqa gobernadorpa wayinchö këkaq patiuman Jesusta apëkur, llapan soldädukunata qayatsiyarqan.+ 17 Y granäti* aqshunata* churarkatsirmi kashapita corönata awëkur peqanman o umanman churayarqan. 18 Y fuertipam, “¿yamëllaku judïukunapa gobernaqnin?” niyarqan.+ 19 Shoqushwan peqanchö o umanchö maqarmi toqapuyarqan, y respetaq tukurmi puntanman qonqurikuyarqan. 20 Tsëpitanam pëpita burlakurir granäti aqshunata* jipiratsir y janan kaq röpanta vistirkatsir qeruman clavayänampaq waqtaman apayarqan.+ 21 Y chakrapita shamur tsëpa pasëkaq Cirëni markapita Simon jutiyoq nunawan tinkurmi, sufrimientu qeruta* apar yanapanampaq obligayarqan. Pëqa Alejandrupa y Rüfupa papäninmi karqan.+
22 Y Golgota niyanqan sitiumanmi Jesusta apayarqan, tsëqa “Calavëra Sitiu” ninanmi.+ 23 Tsëchömi asqaq o ayaq plantakunawan takushqa vïnuta qarëta munayarqan, peru pëqa manam upuyta munarqantsu.+ 24 Qeruman clavëkurmi röpanta imanö rakipänakuyänampaq kaqta suertita jitar decidiyarqan.+ 25 Las nuëvi de la mañänanönam* qeruman clavayarqan. 26 Y tablamanmi imanir wanutsiyanqampaq kënö qellqayarqan: “Këmi judïukunapa gobernaqnin”.+ 27 Pëpa lädunmanmi ishkaq suwakoqkunata qeruman warkuyarqan, juknintam derëcha lädunman, y juknintanam izquierda lädunman.+ 28 * 29 Tsëpa pasaqkunaqa peqankunata o umankunata kuyutsirmi pëta insultar+ kënö niyaq: “¡Jä! Qam, templuta juchutsir* kima junaqllachö sharkatseq,+ 30 warkurëkanqëki qerupita bajamur salvakuy”. 31 Tsënöllam mandakoq sacerdötikuna y Ley qellqaqkunapis pëpita burlakur kënö niyarqan: “¡Jukkunataqa salvarqanmi, peru kikinqa manam salvakuyta puëdintsu!+ 32 Mä kanan ari Israelpa gobernaqnin Cristu, warkurëkanqan qerupita bajamutsun, tsëta rikarqa pëman creishunmi”.+ Tsënöllam pëwan qeruchö warkurëkaqkunapis insultar ushayarqan.+
33 Y pullan junaqpitanö* las tres de la tardiyaqnömi,* tsë kinrëqa pasëpa* ampïrirqan o tsakaskirqan.*+ 34 Las tres de la tardinönam* Jesusqa fuertipa kënö nirqan: “Ëli, Ëli, ¿läma sabakhthäni?”, tsëqa, “Diosllä, Diosllä, ¿imanirtan dejaramarqunki?” ninanmi.+ 35 Tsëta wiyëkurnam wakin tsëchö këkaqkunaqa, “¡wiyayë, Elïastam qayëkan!” nir parlayarqan. 36 Tsë höram juk nuna cörripa ëwar pochqoq vïnuman esponjata tullpurkurqan, y shoqushman churarkurmi shoqunampaq+ kamäpurqan. Y kënömi nirqan: “¡Dejëkuyë! Mä Elïas shamunqakush salvaqnin”. 37 Tsë höram Jesusqa yapë fuertipa qayarëkur wanurirqan o wañuskirqan.+ 38 Templuchö këkaq cortïnam+ umapita urayaq ishkëman rachikaskirqan.+ 39 Imakuna pasanqanta y wanunqanta rikëkurmi frentinchö shëkaq* soldädukunata mandaqqa, “kë nunaqa rasumpam Diospa Tsurin kashqa” nirqan.+
40 Atskaq warmikunam karullapita rikar tsëchö këkäyarqan, pëkunawanmi këkäyarqan Marïa Magdalëna, Menor kaq* Santiägupa y Josespa mamänin Marïa, y Salomë.+ 41 Tsë warmikunaqa Galilëachö këkaptinmi Jesuswan purir atiendiyaq.+ Y pëwan juntu Jerusalenman witsaq warmikunapis tsëchömi këkäyarqan.
42 Inti o rupay jeqanan höranam säbadupaq alistakuyänan junaq* kaptin o säbadupa visperan kaptin, 43 Arimatëapita Josë jutiyoq nuna valorta tsarirkur Pilätuman ëwar Jesuspa ayanta mañakurqan. Pëqa Judïukunapa Jatun Cortinchö trabajaq respetashqa nunam karqan, y pëpis Diospa Gobiernuntam shuyaraq.+ 44 Pilätuqa Jesus wanushqana o manaraq wanushqa kanqanta musyëta munarmi, soldädukunata mandaqta qayëkatsir tapurqan. 45 Y wanushqana kanqanta niptinmi, Jesuspa ayanta Josë apakunanta permitirqan. 46 Tsënam Josëqa alli kaq lïnupita rurashqa tëlata rantïkur Jesuspa ayanta bajaratsir tsë tëlawan wankurqan, tsëpitanam qaqachö uchkunqan sepultüranman churëkur+ tsë sepultürapa punkunta jatun rumiwan tsaparkurqan.+ 47 Marïa Magdalënawan Josespa mamänin Marïaqa, ayata churayanqan sitiuta rikarëkarmi quedakuyarqan.+