Apocalipsis
13 Tsë mantsëpaq jatun culebraqa lamar kuchun arënachömi shëkar* quedakurqan.
Tsënam lamarpita yarqëkämoq+ mantsëpaq chukaru animalta rikarqä.+ Tsë animalqa chunka waqrayoq y qanchis peqayoqmi o umayoqmi karqan. Waqrankunachöqa chunka corönakunam karqan, y peqankunachöqa Teyta Diosta ofendeq jutikunam karqan. 2 Tsë rikanqä mantsëpaq chukaru animalqa leopardu niraqmi karqan, peru chakinkunaqa ösupanömi karqan, y shiminnam leonpa shiminnö karqan. Y mantsëpaq jatun culebram+ tsë mantsëpaq chukaru animalta poderninta, gobernar täkunanta y alläpa autoridäta entregarqan.+
3 Tsë animalpa juk peqan o uman wanunampaqnö herïdayoq kanqantam rikarqä, peru wanunampaqnö herïdanqa alliyärishqanam karqan.+ Y entëru patsam, tsë mantsëpaq chukaru animalta espantakur qatirqan. 4 Mantsëpaq chukaru animalta autoridäta entregashqa kaptinmi, mantsëpaq jatun culebrata adorayarqan, y kënö nirmi mantsëpaq chukaru animalta adorayarqan: “¿Pitan mantsëpaq chukaru animalnö? ¿Y pitan pëwan pelyëta puëdinman?”. 5 Alabakur parlanampaq y Teyta Diosta ofendir parlanampaqmi poderta chaskirqan, y tsënöllam cuarenta y dos killapa munanqanta ruranampaqpis autoridäta chaskirqan.+ 6 Tsëpitanam shiminwan Teyta Diosta ofendir parlarqan,+ y Diospa jutinta, kawanqan sitiuta, awmi, ciëluchö kawaqkunata ofendirmi parlarqan.+ 7 Limpiu nunakunawan guërrata rurar pëkunata vencinampaqmi+ permitishqa karqan, y llapan kastakunata, markakunata, idiömakunata y nacionkunata cargunchö katsinampaqmi autoridäta chaskirqan. 8 Y patsachö llapan kawaqkunam pëta adorayanqa. Patsachö nunakuna yurikur qallayanqan witsampitam, pëkunapa jutinkunaqa, pikuna kawayänampaq kaqta rikätsikoq wanutsiyanqan Orqu* Üshapa+ librunchö* qellqashqatsu kashqa.+
9 Wiyakuyta munaqqa, shumaq wiyakutsun.+ 10 Prësu apashqa kanampaq kaqqa, prësum apashqa kanqa. Nuna mayinta espädawan wanutseqtaqa,* espädawanmi wanutsiyanqa.+ Tsëmi limpiu santu nunakunaqa+ alli aguantayänan+ y markäkoq o yärakoq+ kayänan.
11 Tsënam patsapita witsëkämoq mantsëpaq chukaru animalta rikarqä. Tsë animalpaqa orqu* üshapanömi ishkë waqrankuna karqan, peru mantsëpaq jatun culebranömi parlar qallëkurqan.+ 12 Punta kaq mantsëpaq chukaru animalpa rikëninchömi,+ tsë animal katsinqan autoridäyoq kanqanta rikätsikun. Patsata y tsëchö kawaqkunatam, wanunampaqnö herïdayoq kanqampita alliyashqa punta kaq mantsëpaq chukaru animalta adoratsin.+ 13 Y espantëpaq milagrukunatam* ruran; y llapan nunakuna rikëkäyaptinmi, ciëlupita patsaman ninatapis bajatsimun.
14 Mantsëpaq chukaru animalpa rikëninchö milagrukunata ruranampaq permitishqa karmi, patsachö kawaqkunata engañan, y tsëyaqmi patsachö kawaqkunata nin, espädawan roqushqa këkar kawarimoq+ mantsëpaq chukaru animal niraq santuta*+ rurayänampaq. 15 Y tsë mantsëpaq chukaru animal niraq santuta kawatsinampaqmi* permitishqa karqan, tsënöpa mantsanëpaq chukaru animal niraq santu parlanampaq, y mantsanëpaq chukaru animal niraq santuta adorëta mana munaqkunata wanutsinampaq.
16 Llapankunatam, lluta nunakunata y alli carguyoq nunakunata, rïcu kaqkunata y waktsakunata, libri kaqkunata y sirwipakoqkunata, derëcha makinkunachö o urkunkunachö marcashqa kayänampaq obligan.+ 17 Tsënöpa pï nunapis rantita o rantikuyta mana puëdinampaq, sinöqa marcayoq kaqkunalla, awmi, mantsëpaq chukaru animalpa jutinta+ o jutimpa nümerunta katseqkunalla.+ 18 Imatapis alli entiendeqqa, mantsëpaq chukaru animalpa nümerunta tantiatsun, tsëqa nunapa nümerunmi, y nümerunqa seiscientus sesenta y seismi. Tsë ima ninan kanqantaqa yachëyoq kaqllam entiendinqa.+