Jeremïas
29 Babiloniachö gobernaq Nabucodonosor nacionninman apanqan wakin dirigeqkunaman, sacerdötikunaman, willakoqkunaman y nunakunamanmi, willakoq Jeremïasqa Jerusalenpita cartata apatsirqan. 2 Tsëtaqa qellqarqan, gobernaq Jeconïasta,+ mamanta,+ palaciuchö carguyoq nunakunata, Judächö y Jerusalenchö dirigeqkunata, imëka rurë yachaq nunakunata y herrërukunata,* Jerusalenpita Babiloniaman apashqa kayanqanchömi.+ 3 Tsë cartataqa, Safanpa+ tsurin Elasäwan y Hilquïaspa tsurin Guemarïaswanmi apatsirqan. Pëkunataqa Judächö gobernaq Sedequïasmi,+ Babiloniachö gobernaq Nabucodonosorwan parlaq mandashqa karqan. Tsë cartachömi kënö nirqan:
4 “Jerusalen nunakunata Babiloniaman apayänanta permiteq, Israel nunakunapa Diosnin angelkunata mandaq Teyta Jehovämi këta nin: 5 ‘Kawayänëkipaq wayikikuna rurayë y mikuyänëkipaq früta plantakunata plantayë. 6 Tsurikikuna kanampaq warmikikuna ashiyë. Tsënölla wamrëkikunatapis casatsiyë. Pëkunapis warmi y ollqu wamrayoq kayänampaq. Wallkayar mana ushakäyänëkipaq, këkäyanqëki nacionchö mëtsika tikrayë. 7 Apayäshunqëki nacionchö yamë kë kanampaq, noqa Jehoväman mañakayämuy. Tsë nacionchö yamë kë kaptinqa, qamkunapis yamëmi kayanki.+ 8 Israel nunakunapa Diosnin angelkunata mandaq Teyta Jehovämi këta nin: “Ama willakoqkuna ni suerti qateqkuna engañayäshunëkita dejayëtsu,+ y ama suëñuyanqanta willakoqkunata cäsuyëtsu. 9 ‘Pëkunaqa noqa mana mandëkaptïmi, mana rasumpa kaqkunata jutïchö willakuykäyan’+ ninmi Teyta Jehovä”’”.
10 “Teyta Jehoväqa këtapis ninmi: ‘Babiloniaman apashqa kayanqëkipita setenta wata cumpliriptinmi qamkunata yarpäyashqëki,+ y qamkunata äninqänöllam* kë kinrë markakunaman kutitsiyämushqëki’.+
11 Teyta Jehoväqa kënöpis ninmi: ‘Noqaqa allim musyä qamkunapaq munanqäta. Noqaqa mana allikunapa pasayänëkipa rantin yamë kayänëkita,+ imapis mas allina kanampaq kaqman confiakuyänëkita y shamoq tiempuchö shumaq kawakuyänëkitam munä.+ 12 Qamkunaqa noqamanmi qayakayämunki y llapan shonquykikunawanmi noqaman mañakayämunki y noqaqa wiyayashqëkim’.+
13 ‘Llapan shonquykikunawan ashimarmi,+ qamkunaqa imëpis tariyämanki.+ 14 Awmi, tsënö ashiyämaptikiqa, tariyämänëkitam permitishaq’+ ninmi Teyta Jehovä. ‘Noqa permitiptï mëtsë nacionman y mëtsë sitiuman apayäshunqëkipitam, markëkikunaman kutitsiyämushqëki’+ ninmi Teyta Jehovä.
15 Peru qamkunaqa, ‘Babilonia nacionchömi Teyta Jehoväqa willakoqnintsikkuna churamushqa’ niyarqunkim.
16 Qamkunatawan juk nacionman mana apayanqan kë markachö marka mayikikunapaq y David gobernar täkunampita gobernaqpaqmi,+ Teyta Jehovä këta nin: 17 ‘Awmi, angelkunata mandaq Teyta Jehovämi këta nin: “Noqa permitiptïmi espädawan wanutsiyanqa, y mallaqëpita y qeshyakunawanmi wanuyanqa.+ Y mikuytapis mana munëpaq ismushqa* mana alli hïgusnömi kayanqa”’.+
18 ‘Noqa permitiptï espädawan ushakätsiyanqanta,+ y mallaqëpita y qeshyawan wanuyanqanta musyarmi, mëtsë nacionpita nunakunapis alläpa mantsakäyanqa.+ Y noqa permitiptïmi, mëtsëman apayanqanchöpis pëkunapita burlakur wichyayanqa,+ maldiciyanqa, insultayanqa y pasanqampita alläpa mantsakäyanqa.+ 19 Tsëkunataqa pasayanqa, sirwimaqnï willakoqkunata kutin kutin pëkunaman mandëkaptïpis, niyanqankunata mana cäsukushqa karmi’+ ninmi Teyta Jehovä.
‘Tsënö kaptimpis, qamkunaqa manam cäsukuyta munayarqunkitsu’+ ninmi Teyta Jehovä.
20 Tsëmi noqa permitiptï Jerusalenpita Babiloniaman apashqa nunakuna, noqa Jehovä ninqäkunata wiyakuyë. 21 Coläyapa tsurin Acab y Maasëyapa tsurin Sedequïasqa, mana rasumpa kaqtam jutïchö willakuykäyan.+ Tsëmi, noqa Israel nunakunapa Diosnin angelkunata mandaq Teyta Jehovä pëkunapaq këta nï: ‘Babiloniachö gobernaq Nabucodonosorpa makinmanmi entregayashqëki y pëqa rikarëkäyäptikim wanutsiyäshunki. 22 Judäpita Babiloniaman apashqa nunakunam, pitapis maldicir pëkunata pasanqampaq parlayanqa. Y kënömi niyanqa: “¡Sedequïaswan y Acabwan ruranqannölla, qamkunawampis Teyta Jehovä ruratsun! ¡Pëkunataqa Babiloniachö gobernaqmi ninachö rupatsirqan!”. 23 Pëkunaqa jukpa warminkunawan oqllanakur, y noqa mana mandëkaptï jutïchö mana rasumpa kaqta parlarmi,+ Israelchö penqakuypaq portakuyashqa.+
“Tsë llapantaqa kikï rikashqa karmi musyä”+ ninmi Teyta Jehovä’”.
24 “Nehelampita Semäyatanam+ kënö ninëki: 25 ‘Israel nunakunapa Diosnin angelkunata mandaq Teyta Jehovämi këta nin: “Qamqa Jerusalenchö nunakunaman, Maasëyapa tsurin sacerdöti Sofonïasman+ y llapan sacerdötikunamanmi jutikichö cartakurqunki. Tsë cartakunachömi kënö nirqunki: 26 ‘Sacerdöti Jehoiadapa rantin Teyta Jehoväpa wayinta rikänëkipaq, y löcunö portakoq willakoqkunapa chakinta, makinta y peqanta o umanta uchkuyoq tablaman* amutsinëkipaqmi, Teyta Jehoväqa sacerdöti kanëkipaq churashurqunki.+ 27 Tsëqa, ¿imanirtan Anatotpita+ Jeremïasta imatapis nirqunkitsu? Pëqa qamkunapa puntëkikunachömi Diospa willakoqninnö portakuykan.+ 28 Pëqa Babiloniachö këkaqkunatapis kënömi niyämashqa: “¡Atska tiempuran këchö kayanki! Tsëmi kawayänëkipaq wayikunata rurayë, y mikuyänëkipaq früta plantakunata plantayë...”’”’”.+
29 Diospa willakoqnin Jeremïas wiyëkaptin, sacerdöti Sofonïas+ tsë cartata leyir ushariptinnam, 30 Teyta Jehoväqa Jeremïasta kënö nirqan: 31 “Babiloniachö këkaqkunaman kënö qellqë: ‘Nehelampita Semäyapaqmi Teyta Jehovä këta nin: “Semäyaqa noqa mana mandëkaptïmi, mana rasumpa kaqman confiakuyänëkita munar, mana rasumpa kaqta willayäshurqunki.+ 32 Tsëmi Teyta Jehovä këta nin: ‘Nehelampita Semäyata y pëpita yureqkunatam castigashaq. Noqa Jehoväpa conträ nunakunata churakätsishqa kaptinmi, ni mëqan familiampis kë markachö kawëkar quedanqatsu. Y manam sirwimaqnïkunapaq allikunata ruranqätapis rikäyanqatsu’ ninmi Teyta Jehovä”’”.