1 Rëyes
17 Galaad+ läduchö täkoq* tisbïta Elïasmi*+ gobernanti Acabta kënö nirqan: “¡Kë watakunaqa manam tamyapis ni shullyapis* kanqatsu, yapë tamyamunampaq noqa ninqäyaq!+ Këtaqa willëkaq sirwinqä* Israelpa Diosnin Jehoväpa jutinchömi”.
2 Tsëpitanam Teyta Jehoväqa Elïasta kënö nirqan: 3 “Mana tariyäshunëkipaq këpita* ëwakur Jordan mayupa* tsimpan* yaku ëwanan Kerit sitiuchö quedakuy. 4 Tsëpa pasaq yakuta upunki, y cuervu pishqukunatam mandamushaq mikuyniki apayämunampaq”.+ 5 Tsënam Elïasqa tsë höra ëwakur Jehovä Dios ninqannölla rurarqan. Y Jordan mayupa tsimpan* yaku ëwanan Kerit sitiuchömi quedakurqan. 6 Tsëmanmi cuervu pishqukunaqa patsa waraptin y patsa tardiyaptin mikunampaq tantatawan ëtsata apapuyaq. Y tsëpa pasaq yakutam upoq.+ 7 Peru manana tamyaptinmi yakuqa tsakirirqan.+
8 Tsënam Teyta Jehoväqa Elïasta kënö nirqan: 9 “Sidonchö këkaq Sarepta markata ëwakuy y tsëchö juk viudatam nishaq pachëki qarashunëkipaq”.+ 10 Tsënö niptinmi Sarepta markata ëwakurqan y chärirnam juk viuda yantakuykaqta rikarqan. Tsënam qayëkurnin, “mamïta rogakushqëki, upurkunäpaq juk täza yakuykita qarëkallämë”+ nirqan. 11 Y yaku apamoq ëwëkaptinnam nirqan: “Jukllëllatapis tantallä apakamunki”. 12 Tsënam viudaqa kënö nirqan: “Teytallë, tantaqa manam jukllëllapis kantsu, rasumpam, Jehovä Diospa jutinchömi nikaq. Juk aptë harinallam mankächö këkan y ichiklla aceitim järrächö këkan.+ Kananqa yantakuykä ichiklla këkaqta cocinakurir wamräwan mikurkuyänäpaqmi. Tsëpitaqa mallaqëpitachi wanukuyäshaq”.
13 Tsënö niptinnam Elïasqa nirqan: “Ama yarpachakuytsu. Ninqëkinölla cocinakuri, peru puntataqa noqapaqraq ichiklla tantata rurarkur aparamuy. Tsëpitanam qamkunapaqqa cocinarinki. 14 Israelpa Diosnin Jehovämi kënö nishqa: ‘Jehovä tamyatsimunqan junaqyaqmi,+ mankanchö këkaq harina ni järranchö këkaq aceitipis ushakanqatsu’”. 15 Tsënam viudaqa Elïas ninqannö rurarqan. Y mikuyqa Elïaspaq, kikin viudapaq y familiampaqpis atska junaqpa mikuyänampaqmi karqan.+ 16 Jehovä Dios ninqanta Elïas willakunqannömi, mankachö harinapis ni järrachö aceitipis ushakarqantsu.
17 Tsëpita unëtanam viudapa wamranqa qeshyarirqan, y mana alliyarmi wanukurqan.+ 18 Tsënam viudaqa Elïasta kënö nirqan: “Diospa willakoqnin, ¿imanirtan unë jutsata* ruranqäpita castigamar wamrata wanutsirqunki?”.+ 19 Tsënö niptinmi Elïasqa, “wamrëkita apamuy” nirqan. Tsënam wamrata mellqarkatsirqan y pununqan altu cuartuman apëkurmi cämanman churarqan.+ 20 Tsëpitanam Jehoväman mañakurnin kënö nirqan: “Teyta Jehovä,+ wayinchö posadakushqa këkaptïqa, ¿imanirtan kë viudata llakitsinki wamranta wanutsirnin?”. 21 Tsënö nirmi wanushqa wamrata kima kutipa waqurkur o makallarkur kënö nir Jehovä Diosta rogakurqan: “Teyta Jehovä, kë wamrata kawëkatsillämuy”. 22 Jehovä Diosqa, Elïas rogakunqanta wiyarninmi+ wamrata kawaritsimurqan.+ 23 Tsënam Elïasqa pununqan cuartupita bajatsimur, “wamrëkiqa kawëkanmi”+ nir mamanta entreguëkurqan. 24 Warmiqa wamranta kawarimushqatana rikëkurmi Elïasta kënö nirqan: “Kananmi sïqa musyarï Diospa willakoqnin kanqëkita.+ Y Jehovä Dios ninqanta willakunqëkiqa cumplikanqanta”.