Lücas
24 Semäna qallanan junaqqa, alistayanqan shumaq pukutaq o mushkoq plantakunata aparkurmi, tsë warmikunaqa tempränulla sepultüraman ëwayarqan.+ 2 Peru sepultürata tsapaq rumita läduratsishqa kayanqantam rikäyarqan,+ 3 y yëkurqa, manam Señor Jesuspa ayanta tariyarqantsu.+ 4 Tsërëkur warmikuna mantsakashqallaraq këkäyaptinmi, chipapëkaq röpan vistishqa ishkaq nunakuna lädunkunachö yurirkuyarqan. 5 Tsënam warmikunaqa alläpa mantsakar patsata rikarëkar quedakuyarqan. Tsëmi tsë nunakunaqa kënö niyarqan: “¿Imanirtan kawëkaqtaqa wanushqakuna këkäyanqanchö ashiyanki?.+ 6 Pëqa kawarimushqa karmi këchönatsu këkan. Yarpäyë Galilëa provinciachö këkar imata niyäshunqëkita. 7 Pëqa, Nunapa Tsurinta jutsa* ruraqkunapa makinman entregayänampaq, qeruchö wanutsiyänampaq o wañutsiyänampaq, y kima junaqta kawarimunampaq kaqtam niyäshurqëki”.+ 8 Tsëran pëkunaqa ninqankunata yarpäriyarqan.+ 9 Tsënam sepultürapita kutikur, Onci apostolninkunata y wakin qateqninkunata llapanta willayarqan.+ 10 Tsë warmikunaqa kayarqan Marïa Magdalëna, Juäna y Santiägupa mamänin Marïam. Tsënöllam pëkunawan këkaq wakin warmikunapis, tsëkunata apostolkunata willayarqan. 11 Peru pëkunaqa warmikuna willakuyanqanta cuentullapaq churarmi, pëkuna niyanqanta creiyarqantsu.
12 Tsënö kaptimpis, Pëdruqa sharkurmi sepultüraman cörripa ëwarqan, y qawëkurqa lïnupita rurashqa tëlakunallatanam rikarqan. Tsëmi ima pasanqanman pensar kutikurqan.
13 Tsë junaqllam, Jerusalenpita onci kilömetruschönö* këkaq Emaus niyanqan caserïuman ishkaq qateqninkuna ëwëkäyarqan. 14 Y llapan pasanqampaq parlarmi ishkan ëwëkäyarqan.
15 Pasanqankunapaq parlar ëwëkäyaptinnam, kikin Jesus pëkunaman witïkur pëkunawan ëwar qallëkurqan, 16 peru rikëkarpis manam reqita puëdiyarqantsu.+ 17 Tsënam pëqa, “¿ima asuntupaqtan tsëläya parlar ëwayanki?” nir tapurqan. Tsënö niptinnam, pëkunaqa alläpa llakishqa shäkuriyarqan.* 18 Y Cleöpas jutiyoq kaqmi kënö nirqan: “¿Jerusalenchö japallan kawaq forastëru karku,* kë junaqkuna tsëchö pasanqanta musyankitsu?”. 19 Pënam, “¿imakuna pasanqanta?” nir tapurqan. Tsënam pëkunaqa kënö contestayarqan: “Nazaretpita Jesusta pasanqanta.+ Pëqa Teyta Diospa rikëninchö y llapan nunakunapa rikëninchömi, parlanqanwan y ruranqanwan Diospa puëdeq willakoqnin kanqanta rikätsikurqan.+ 20 Tsënö kaptimpis, mandakoq sacerdötïkuna y gobernadornïkunam, condenar wanutsiyänampaq entregayashqa+ y qeruman clavayashqa. 21 Peru noqakunaqa pë Israelta libranampaq kaqtam pensayarqä.+ Tsë llapan pasanqampitaqa, kima junaqnam pasashqa. 22 Noqakunapita wakin warmikunapis mana creipaqtanömi willayämashqa. Pëkunaqa tempränullam sepultürata ëwayarqan,+ 23 y ayanta mana tarïkurmi, angelkunata rikashqa kayanqanta willakur kutiyämushqa, y tsë angelkunash pë kawëkanqanta willayashqa. 24 Tsënam noqakunawan këkaqkunapita wakinkuna sepultüraman ëwar+ warmikuna niyanqantanölla tariyashqa, peru Jesustaqa manash rikäyashqatsu”.
25 Tsënam Jesusqa pëkunata kënö nirqan: “¡Mana juiciuyoq y Diospa willakoqninkuna niyanqanta mana ras o sas creeq nunakuna! 26 ¿Manaku Cristuqa manaraq alabashqa karnin+ tsëkunata sufrinan karqan?”.+ 27 Tsënö nïkurmi, Moises qellqanqampita y Diospa Willakoqninkuna+ Qellqayanqampita qallëkur, Diospa Palabranchö pëpaq llapan willakunqanta pëkunata entienditsirqan.
28 Ëwëkäyanqan caserïuman chëkäyaptinnam, pëqa mas karuta ëwaqnö pasakuyta munarqan. 29 Tsënam pëkunaqa quedakunampaq rogar, “alläpa tardinam y ichikllachönam intipis o rupaypis jeqarkunqa, noqakunawan quedakushun” niyarqan. Tsënö niyaptinnam pëkunawan quedakunampaq wayiman yëkurqan. 30 Pëkunawan cenëkarmi,* tantata aptarkur Teyta Diosta agradecikurqan, y pakir pakirmi pëkunata makyar qallëkurqan.+ 31 Tsënam nawinkuna kichakaptin reqiriyarqan, peru pëqa jinan höram illakaskirqan.+ 32 Tsënam kikinkunapura kënö ninakuyarqan: “¿Manaku nänipa juntu shamuykashqa Diospa Palabran ninqanta shumaq entienditsimashqa shonquntsikyaq chärirqan?”. 33 Tsë höra sharkur* Jerusalenman kutirmi, onci apostolninkunata y wakin qateqninkunata juntarëkaqta tariyarqan, 34 y pëkunaqa kënömi niyaq: “¡Rasumpam Señorqa kawarimushqa, y Simontam yuripushqa!”.+ 35 Tsënam pëkunaqa nänichö pasanqanta, y tantata pakiptin imanö reqiyanqanta willayarqan.+
36 Tsëkunapaq parlëkäyaptinmi, kikin Jesus chowpinkunaman* yurirkur, “yamëlla këkäyë”+ nirqan. 37 Peru alläpa mantsakashqa y espantashqa karmi, juk espïrituta rikëkäyanqanta pensayarqan. 38 Tsënam pëkunata kënö nirqan: “¿Imanirtan mantsakashqa këkäyanki? ¿Imanirtan shonquykikunachö dudar këkäyanki? 39 Noqa kanqäta musyayänëkipaq, makïkunata y chakïkunata rikäyë. Yatayämë y rikäyë, juk espïrituqa manam noqanö ëtsayoq ni tulluyoqtsu”. 40 Tsënö nirmi, makinkunata y chakinkunata rikätsirqan. 41 Peru alläpa kushishqa y espantashqa karnin manaraq creiyaptinmi, pëqa “¿mikunäpaq imallapis kapuyäshunkiku?” nir tapurqan. 42 Tsënam juk pedäzu kankashqa pescäduta qarayarqan, 43 y chaskikurirmi pëkuna rikëkäyaptin mikurqan.
44 Tsëpitanam pëkunata nirqan: “Yarpäyë, qamkunawanraq këkar kënö ninqäta:*+ Moises qellqanqan Leychö, Diospa Willakoqninkuna Qellqayanqanchö y Salmuschö noqapaq qellqarëkaqkuna cumplikänampaq kaqta”.+ 45 Tsëpitanam pëkunata yanaparqan Diospa Palabranchö ninqankunata entiendiyänampaq,+ 46 y kënömi nirqan: “Kënömi qellqarëkan: Cristuqa sufrinqam, y wanunqampitam o wañunqampitam kima junaqta kawarimunqa,+ 47 y Jerusalenpita qallëkur llapan nacionkunachö+ perdonashqa kayänampaqmi jutsankunapita* arrepentikuyänampaq+ pëpa jutinchö willakuyanqa.+ 48 Qamkunam tsë llapan pasanqanta willakuyänëki.+ 49 Y këta musyayë: Teytä äniyäshunqëkitam qamkunaman mandamushaq. Peru ciëlupita poderta chaskiyanqëkiyaq kë markachö quedakuyë”.+
50 Tsëpitanam markapa amänunchö këkaq Betaniayaq pëkunata pusharqan, y makinta pallarkurmi* pëkunata bendicirqan. 51 Bendicikarmi pëkunapita rakikärirqan, y Teyta Diosmi ciëluman apakurqan.+ 52 Tsënam pëkunaqa respetarnin qonqurikuyarqan, y alläpa kushishqam Jerusalenman kutikuyarqan.+ 53 Y Teyta Diosta alabarmi imëpis templuchö këkäyarqan.+