1 Rëyes
19 Chärirnam Acabqa,+ warmin Jezabelta+ willarqan Elïas llapan ruranqanta y Baal santupa willakoqninkunata espädawan wanutsinqanta.+ 2 Tsënam Jezabelqa juk willakoqta mandarqan Elïasta kënö ninampaq: “¡Tsë nunakunata wanutsinqëkinöllam qamtapis wanutsishqëki! ¡Warë kënö hörapaq mana wanutsipteqqa diosnïkuna castiguëkamätsun!”. 3 Tsënö willariptinmi Elïasqa mantsakar qeshpir ëwakurqan.+ Judächö+ këkaq Beer-Sëba+ sitiuman chärirmi, yanapaqninta tsëchö dejarqan. 4 Tsëpitam entëru junaq tsunyaq sitiupa ëwarqan, y ëwëta manana puëdirnam retäma chakinman jamakurqan. Tsëchömi wanuytapis munar kënö nirqan: “Teyta Jehovä, ¡imëyaqtaq kënö kashaq! ¡Kanan höra juklla wanuykatsimë!+ Noqaqa manam unë kastäkunanötsu kä, mas tiempu kawanäpaq”.
5 Tsëpitanam retäma chakinchö punukärirqan. Y punukashqa këkaptinmi juk angel yatëkur,+ “imallatapis mikurinëkipaq sharkamuy”+ nirqan. 6 Y nawinta kicharkamunampaqqa, jawnan lädunchömi achachaq rumi jananchö juk tanta y juk järra yaku churarëkänaq. Tsëta mikurir y upurirmi yapë punukärirqan. 7 Mas rätuntanam Jehovä Diospa angelnin yapë yatëkur kënö nirqan: “Karutaran ëwanëki, mikurinëkipaq shärimuy, sinöqa mallaqarmi ëwëta puëdinkitsu”. 8 Tsëmi sharkur mikurqan y yakutapis upurqan. Tsë mikunqanllawanmi cuarenta junaqta y cuarenta paqasta ëwar Diospa+ Horeb jirkanman charqan.
9 Tsëchönam machëman yëkurir+ tsë paqas punurqan. Tsënö punuykarmi Jehovä Diosta wiyarqan kënö neqta: “Elïas, ¿imatataq këchö ruranki?”. 10 Tsënam Elïasqa kënö nirqan: “Angelkunata mandaq Jehovä Dios,+ llapan shonqüwanmi qamllata sirwikaq. Peru israelïtakunaqa manam acuerdu ruranqëkita cumpliyannatsu+ y altarnikikunatapis juchuratsirmi* willakoqnikikunata wanutsiyashqa.+ Tsëmi wanutsiyämëta munayaptin+ qeshpir ëwakamurqö”. 11 Tsënam Teyta Diosqa nirqan: “Machëpita yarqurir Jehoväpa puntanman shäkuri”.* Jehovä Diosqa tsëpam pasëkänaq.+ Tsëmi fuerti vientuqa Jehovä Diospa puntampita+ jirkakunatapis qatsakätsir y qaqakunatapis pakirnin pasarqan, peru Jehoväqa manam tsë vientuchötsu këkarqan. Fuerti vientu pasariptinnam mantsakëpaq patsa kuyurqan,+ peru Jehoväqa manam patsa kuyunqanchötsu këkarqan. 12 Patsa kuyuriptinnam mantsakëpaq nina yurirkurqan,+ peru Jehoväqa manam tsë ninachötsu këkarqan. Nina pasariptinnam, shumaqlla parlaqta wiyarqan.+ 13 Parlaqta wiyarirnam Elïasqa aqshunanwan* cäranta tsapakurkur+ machë punkuman yarqamurqan. Tsënam parlapämoqqa kënö tapurqan: “Elïas, ¿imatataq këchö ruranki?”. 14 Tsënam Elïasqa kënö nirqan: “Angelkunata mandaq Jehovä Dios, llapan shonqüwanmi qamllata sirwikaq. Peru israelïtakunaqa manam acuerdu ruranqëkita cumpliyannatsu+ y altarnikikunatapis juchuratsirmi* willakoqnikikunata wanutsiyashqa. Tsëmi wanutsiyämëta munayaptin qeshpir ëwakamurqö”.+
15 Tsënam Jehovä Diosqa kënö nirqan: “Damascu markapa amänunchö këkaq tsunyaq sitiuyaq ëwë. Y Hazael jutiyoq nunata churë+ Siriachö gobernanti kanampaq. 16 Nimsïpa willkan Jehütana Israelchö gobernanti kanampaq churë.+ Y Abel-Meholä sitiuchö täkoq* Safatpa tsurin Eliseutana qampa rantiki willakoqnï kanampaq churë.+ 17 Hazaelpa+ makimpita qeshpeq kaqtaqa Jehümi+ wanutsinqa, Jehüpa makimpita qeshpeq kaqtaqa Eliseum+ wanutsinqa. 18 Israelchöqa siëti milraqmi+ cäsumaqnïkuna kayan, pëkunaqa manam Baal santuman+ qonqurikuyashqatsu ni mutsayashqatsu”.+
19 Tsënam Elïasqa kutirnin Safatpa tsurin Eliseuta tarirqan döci par yuntakunawan yapyëkaqta.* Eliseuqa qepachömi yapyëkarqan, tsënam Elïasqa ëwarnin aqshunanta* aqshurkatsirqan.+ 20 Tsënam Eliseuqa yapyëkanqanta* dejëkur Elïaspa qepanta ëwarnin kënö nirqan: “Qamwan ëwanäpaqqa, ëwä papänïpita y mamänïpitaraq despidikaramushaq”.* Elïasnam nirqan: “Noqaqa manam michëkaqtsu, ëwar despidikaramuy”. 21 Tsënam Eliseuqa kutïkur ishkë törukunata pishtarqan. Y tsë ëtsata cocinanampaqmi yügutawan takllata tseqtarqan, tsëpitanam llapan nunakunata qararqan. Tsënö qarëkurmi, Elïasta yanapanampaq ëwakurqan.+