Sofonïas
1 Këchömi qellqarëkan Amonpa+ tsurin Josïas+ Judächö gobernanqan witsan Sofonïasta* Teyta Jehovä ninqan. Sofonïasqa Cusïpa tsurinmi karqan. Cusïnam Guedalïaspa tsurin karqan. Guedalïasnam Amarïaspa tsurin karqan, y Amarïasnam Ezequïaspa tsurin karqan.
2 Teyta Jehovämi nin: “Patsachö llapan kaqkunatam ushakätsishaq”.+
3 Këtapis Teyta Jehoväqa ninmi: “Nunakunata y animalkunatam llapanta ushakätsishaq.*
Pishqukunata y pescädukunatapis ushakätsishaqmi.+
Tsënöllam mana allita ruraqkunata+ y mana alli rurëman chätsiyäshoqnikikunata ushakätsishaq.
Awmi, patsapita nunakunatam llapanta ushakätsishaq.
4 Judä y Jerusalen nunakunatam castigashaq,
Baal+ santupitaqa manam imapis quedanqatsu.
Tsënöllam santukunata sirweq sacerdötikunata y dejamashqa sacerdötikunatapis llapanta ushakätsishaq,
manam pëkunata ni pï yarpanqatsu.+
5 Tsënöllam ushakätsishaq wayin jananchö qonqurikuykur ciëluchö këkaqkunata*+ adoraqkunata,
noqa Jehovällata qonqurikuykur sirwiyämänampaq änikuykar+
Malcam+ santuta sirwiyänampaq änikoqkunata,
6 noqa Jehoväta dejamaqkunata+
y noqa Jehoväman mana witimoqkunata y consëjüta mana asheqkunatapis”.+
7 Nunakunata Teyta Jehovä juzganan tiempuqa këllachönam këkan, tsëqa Llapanta Gobernaq Teyta Jehoväpa puntanchö upälla kayë.+
Teyta Jehoväqa qarëta alistashqanam, y invitädunkunatam rikënimpaq limpiuyätsishqa.
8 Teyta Jehovämi nin: “Qamkunata juzganä* tiempum dirigeqkunata,
gobernaqkunapa tsurinkunata+ y juk nacion nunakunanö vistikoqkunata castigashaq.
9 Tsë tiempuqa patakman* llapan witsaqkunata,
patronninta sirwiyänampaq jukkunata mana alli trataqkunata y engañaqkunatam castigashaq.
10 Tsë tiempuqa Pescädu Punku+ niyanqanchö
y markapa mushoq distrïtunchö llakikur qayaräyanqanmi wiyakanqa,+
y taksha jirkakunachö fuertipa büllayanqanmi wiyakanqa.
Tsënö kanampaq kaqtam noqa Jehovä nï.
11 Plätata pesaqkuna ushakäyaptin,
y llapan rantikoqkuna wanutsishqa o wañutsishqa kayaptin,
Mactespita* nunakuna llakikuyë.
12 Tsë tiempuqa castiganäpaqmi imanö kawayanqanwan kushishqa këkaqkunata entëru Jerusalenchö chiwchiwan ashishaq,
pëkunaqa shonqunkunachömi niyan:
‘Teyta Jehoväqa manam allita ni mana allitapis ruranqatsu’.+
13 Imëkankunatam apakuyanqa y wayinkunatam ushakätsiyanqa,+
Wayikunata rurarpis, manam tsëchötsu kawayanqa,
y üvasta plantarpis, manam vïnunta upuyanqatsu.+
14 ¡Nunakunata noqa Jehovä juzganä tiempuqa këllachönam këkan!+
¡Këllachönam këkan y chëkämunnam!*+
Nunakunata noqa Jehovä juzganä tiempuchöqa nunakunapis qayaräyanqam.+
Tsë tiempuqa pelyëta yachaqkunapis fuertipam qayaräyanqa.+
15 Tsë tiempuqa alläpa cöleranqä tiempum kanqa.+
Tsë tiempuqa sufrimientu y llakikuymi kanqa,+
tsë tiempuqa vientuntin tamya y ushakëmi kanqa,
tsë tiempuqa alläpam ampiranqa o tsakanqa,*+
tsë tiempuqa pukutë y yana pukutëmi kanqa,+
16 tsë tiempuqa waqratam tocayanqa, y alli murallashqa markakunata+
y esquïnakunachö altu törrikunatam büllar ushakätsiyanqa.+
17 Noqa Jehoväpa rikënïpaq jutsata* rurashqa kayaptinmi,+
nunakuna llakikur wiskunö o qapranö puriyänanta permitishaq.+
Yawarninkunapis mëtsëchömi polvunö kanqa,
y aqishninkunapis* animalkunapa ismaninnömi mëtsëchö jitaranqa.+
18 Nunakunata noqa Jehoväqa juzganä tiempuqa, alläpa mantsakëpaqmi kanqa y entëru patsachö nunakunatam ushakätsishaq.+
Tsëmi alläpa cöleranqä tiempuqa, plätankuna ni örunkunapis salvanqatsu.+
Cöleräqa ninanömi entëru patsata ushakätsinqa”.+