Levïticu
5 Mëqëkipis nuna mayikikuna jutsata* rurëkanqanta rikëkar,+ o mana rikashqa karpis jutsata ruranqanta musyëkar, tsë jutsapita willakuyänëkipaq qayatsiyäshuptiki mana ëwarqa, culpayoqmi kayanki, y mana willakuyanqëkipitam castigashqa kayanki.
2 O mëqëkipis cuentata qokur o mana cuentata qokurpis Teyta Diospa rikënimpaq mana limpiu këkäyaptin chukaru animalpa ayanta, wätana animalpa ayanta o grüpu grüpu pureq ichishaq animalkunapa ayanta yatarqa,+ manam Teyta Diospa rikënimpaq limpiunatsu kayanki, y culpayoqmi kayanki. 3 O mëqëkipis mana cuentata qokurlla Teyta Diospa rikëninchö mana limpiu këkaq nunata o imatapis yatarqa,+ y tsëpitaraq mana alli rurayanqëkita cuentata qokurqa, manam Teyta Diospa rikënimpaq limpiunatsu kayanki, y culpayoqmi kayanki.
4 O mëqëkipis mana cuentata qokurlla allita o mana allita rurayänëkipaq jurar änikurqa, y tsëpita manaraq alli pensarnin änikuyanqëkita cuentata qokurqa, imata änikushqa karpis culpayoqmi kayanki.*+
5 Mëqëkipis tsënö jutsakunaman* charqa, jutsaman imanö chäyanqëkitam willakuyänëki.+ 6 Y jutsata* rurayanqëkipitam Teyta Jehoväpaq juk qarëta apayänëki.+ Jutsëkikunapita perdonashqa kayänëkipaqmi malta üshata o malta cabrata apayänëki. Y jutsa ruraq nuna apanqan animalta sacerdöti Teyta Diospaq rupatsiptinmi, jutsampita perdonashqa kanqa.
7 Üshata rantita mana puëdirqa, jutsata* rurayanqëkipitam ishkë kullkushta o ishkë llullu palumata Teyta Jehoväpaq apayänëki.+ Juknin kaqqa jutsëkikunapita perdonashqa kayänëkipaq qarëmi kanqa, y juknin kaqnam ushakanqanyaq rupatsina qarë kanqa.+ 8 Tsë ishkan kullkushta o palumatam sacerdötiman apayänëki. Puntataqa jutsëkikunapita* perdonashqa kayänëkipaq apayanqëkitam kunkanchö tipshir wanutsinan, tsënö kaptimpis, manam peqantaqa o umantaqa jipinantsu. 9 Tsëpitanam apayanqëki kullkushpa o palumapa wakin yawarninta altarpa kuchunman pillchitsinan,* y wakin yawartanam altarpa chakinman jichanan.+ Tsë qarëqa jutsata* rurayanqëkipita perdonashqa kayänëkipaq qarëmi kanqa. 10 Tsëpitanam juknin kaq kullkushta o palumata Teyta Dios mandakunqannölla ushakanqanyaq rupatsinan.+ Sacerdöti tsëta ruraptinmi, jutsata* rurayanqëkipita perdonashqa kayanki.+
11 Y ishkë kullkushta o ishkë llullu palumata rantita mana puëdirqa, jutsata* rurayanqëkipita perdonashqa kayänëkipaqmi ishkë litrutanö+ alli aqashqa harinata Teyta Diospaq apayänëki. Tsëqa jutsëkikunapita perdonashqa kayänëkipaq qarëmi kanqa, tsëmi aceitita ni yuraq inciensuta winayänëkitsu. 12 Tsë harinatam sacerdötiman apayänëki, y sacerdötinam wakin rupatsina qarëkunapa jananchö juk aptëta rupatsinan, tsëqa apayanqëki qarëta Teyta Jehovä imëpis yarpänampaqmi kanqa. Tsëqa jutsëkikunapita* perdonashqa kayänëkipaq qarëmi kanqa. 13 Apayanqëki harinata Teyta Diospaq sacerdöti rupatsiptinmi, tsënö jutsakunata* rurayanqëkipita perdonashqa kayanki.+ Y mana rupatsinqan gränupita rurashqa qarënöllam+ sobraq harinapis sacerdötipaq kanqa’”.+
14 Tsëpitanam Teyta Jehoväqa Moisesta kënö nirqan: 15 “Mëqëkipis noqa Jehoväpaq apayämunqanta pantar mana alli utilizar jutsata* rurarqa,+ jutsata rurayanqëkipitam sänu carnëruta noqa Jehoväpaq apayämunëki.+ Tsë carnërupa chanin ëka yuraq pläta qellë* kanqantaqa sacerdötim rikänan. Tsë plätataqa sagrädu sitiuchö këkaq pësakunata churëkurmi pesanan.+ 16 Y noqapaq apayämunqanta pantarnin mana alli utilizäyanqëkipitam chaninta pagakuyänëki, y tsë pagayanqëkimanmi cada pitsqa pläta qellëpita juk pläta qellë masta yapayänëki.+ Tsë llapantam sacerdötita entregayänëki, y apayanqëki carnëruta sacerdöti rupatsiptinmi,+ jutsata* rurayanqëkipita perdonashqa kayanki.+
17 Mëqëkipis cuentata qokur o mana cuentata qokurpis noqa Jehoväpa rikënïpaq jutsata* rurarqa, jutsata rurayanqëkipitam culpayoq kayanki, y castigashqam kayanki.+ 18 Y sänu carnërutam sacerdötiman apayänëki. Tsë carnërutaqa akrayänëki jutsata* rurayanqëkipita sacerdöti churanqan chaninta cuentaman churëkurmi.+ Y apayanqëki carnëruta noqapaq sacerdöti rupatsiptinmi, pantarnin y mana cuentata qokurnin jutsata rurayanqëkipita perdonashqa kayanki. 19 Tsë qarëqa noqa Jehoväpa rikënïpaq jutsata* rurayanqëkipitam kanqa”.