1 Rëyes
9 Jehovä Diospa templunta, palaciu wayita+ y llapan munanqanta Salomon rurar ushariptinmi,+ 2 Jehovä Diosqa Gabaon markachö yuripunqannölla yapë yuripurqan.+ 3 Jehovä Diosqa kënömi nirqan: “Rogakamar mañakamunqëkitaqa wiyarqömi. Tsëmi ruratsinqëki wayitaqa akrarqö tsëchö adorayämänampaq y jutïta imëpis+ respetayänampaq. Tsë wayimanqa imëpis rikarëkämushaqmi y yarparëkäshaqmi.+ 4 Qampis papäniki Davidnö+ llapan shonquykiwan+ cäsumar+ leynïkunata, mandamientükunata+ y ninqäkunata cumpliptikiqa,+ 5 Israelchö imëyaqpis kastëkikuna gobernayänampaqmi yanapashqëki. Papäniki Davidtam, ‘qampa kastëkipitam Israelchö imëpis gobernanti kayanqa’+ nirqä y tsëtam cumplishaq. 6 Peru qamkuna y qampa kastëkikunapis mandakunqäta y ninqäkunata mana cäsukur santukunata adorayaptikiqa,+ 7 kë markakunapita qarqurmi llapëkita* ushakätsiyashqëki,+ y jutïpa reqishqa kanampaq+ ruratsimunqëki wayitapis dejarishaqmi. Tsëmi mëtsë nacionpita nunakunaqa despreciayäshurniki asikuyanqa y mana kaqpaq churayäshunki.+ 8 Kë wayita pasëpa* juchushqata*+ rikarninmi, tsëpa pasaqkunaqa alläpa mantsakarnin* kënö tapunakuyanqa: ‘¿Imanirtan Jehoväqa kë nacionta y kë wayita ushakätsishqa?’+ 9 Tsënam niyanqa: ‘Egiptupita unë kastankunata pushamoq Jehovä Diosninkunata qonqëkurmi santukunata adorayarqan. Tsëmi Jehoväqa tsënö castigarqan’”.+
10 Jehovä Diospa templunta y palaciu wayitaqa+ veinti watakunaran gobernanti Salomon ruratsir ushatsirqan. 11 Tïru markapa gobernantin Hiramqa,+ Salomon mañanqanmannömi cedru y enebru qerukunata y öruta apatsirqan.+ Tsënö apatsinqampitam Salomonqa Galilëachö veinti markakunata Hiramta entregarqan. 12 Tsënam Hiramqa Salomon entreguëkanqan markakunata rikänampaq ëwarqan. Peru gustumpaqnö mana kaptinmi, 13 Salomonta kënö nirqan: “Amïgu, ¿imanirtan tsë rikoq markakunata entregamarqunki?”. Tsënö ninqampitam tsë markakunataqa kananyaqpis Cabul Markakuna* niyan. 14 Hiramqa Salomonpaq cuatru mil cientu cuatru kïlustam* öruta apatsirqan.+
15 Salomonqa trabajatsinampaqmi nunakunata qayatsirqan.+ Pëkunawanmi ruratsirqan Jehovä Diospa templunta,+ palaciu wayita, allpa qoturanqan lömata*+ y Jerusalen markapa murällanta. Tsënöllam Hazor,+ Meguidö+ y Guëzer+ markakunatapis altsatsirqan. 16 (Egiptuchö gobernaqmi Guëzer markachö täkoq* cananeukunata+ wanuratsir, wayinkunaman ninata prendïkushqa karqan. Tsëpitanam Guëzer markataqa wamranta qarëkurqan+ Salomonwan casakushqa kaptin). 17 Salomonqa altsarqan Guëzer markata, Bet-Horon Bäja+ markata, 18 Baalat+ markata y jirkachö* këkaq Tamar markatam. 19 Tsënöllam Baalat markatapis shäritsirqan. Tsënömi Salomonqa churakuyänan markakunata, carrëtankuna churaränan markakunata,+ cawallunkuna montashqa pureq soldädukunapa cuartelninkunata ruratsirqan. Mëchöpis munanqanchömi Jerusalenchö kar, Lïbanuchö kar y më markakunachö karpis llapan munanqanta ruratsirqan. 20 Tsë witsankunaqa, israelïtakuna mana wanutsiyanqan amorreukunapa, hitïtakunapa, perizïtakunapa, heveukunapa y jebuseukunapa+ kastankunam Israelchö tëkäyarqanraq.+ 21 Pëkunatam Salomonqa churarqan imëkata rurarnin trabajayänampaq. Tsënöllam kananyaqpis trabajëkäyan.+ Pëkunapa papäninkunataqa manam israelïtakuna ushakätsita puëdiyarqantsu. 22 Peru israelïtakunataqa, manam esclävutanötsu Salomon trabajatsirqan.+ Pëkunataqa churarqan soldädunkuna, sirweqninkuna, dirigentinkuna, soldädukunapa mandaqninkuna, carrëta manejaqkunapa mandaqninkuna y cawallunkunawan pureq soldädukunapa mandaqninkuna kayänampaqmi. 23 Trabajaqkunata rikaq dirigentikunapa+ mandaqninkunaqa quinientus cincuentam kayarqan.
24 David Markachö+ täkunqampitam* faraonpa wamranqa,+ Salomon ruratsinqan wayiman täkoq ëwakurqan. Tsëpitanam Salomonqa allpa qoturanqan lömata* ruratsirqan.+
25 Salomonqa animalkunata pishtëkur rupatsiyänampaq y Dioswan amïgu kayanqanta rikätsikur pishtashqa animalkunata rupatsiyänampaqmi watachö kima kuti+ sacerdötikunaman apaq. Tsënöllam rupatsirnin Jehovä Diospaq qoyätsiyänampaq o qoshnitsiyänampaq apaq. Tsë qarëkunataqa rupatsiyaq Jehovä Diospaq ruratsinqan altarchömi.+ Tsënömi Salomonqa templuta rurar usharqan.+
26 Tsëpitanam gobernanti Salomonqa Elot sitiupa lädunchö këkaq Ezion-Guëber+ sitiuchö barcukunata ruratsirqan. Tsëqa karqan Puka lamar kuchun Edom läduchömi.+ 27 Tsëmanmi Hiramqa barcuta+ alli manejëta yachaq sirweqninkunata mandarqan, Salomonpa sirweqninkunawan trabajayänampaq. 28 Tsënam Ofir sitiuta+ ëwarnin catorci mil trescientus sesenta y cuatru kïlus* öruta Salomonpaq apayämurqan.