Isaïas
42 ¡Rikäyë! ¡Pëmi yanapanqä sirwimaqnï!+
¡Pëtam akrarqö,+ pëqa rikënïchömi alli këkan!+
Pëqa confiakuypaq kanqanta musyayänampaqmi alli kaqta ruranqa.+
4 Entëru patsachö nunakunapaq justiciata ruranqanyaqqa,+
manam ni ima michanqatsu ni jamëta tarinqatsu.
Islachö këkaq markakunachö nunakunapis pë yachatsinantam* shuyëkäyan.
5 Dios Yaya Jehovämi, ciëlukunata kamashqa y mashtashqa+
y patsata y tsëchö wayunqankunata kamashqa.+
Pëmi kënö nin:
6 “Noqa Jehoväqa justiciata ruranëkipaqmi
qamta qayatsimurqoq, y makikipitam tsarëkaq.
7 Wiskunö o qapranö këkaqkunapa nawinkunatam kichanki.+
Prësunö këkaqkunatam libri kayänampaq yanapanki,
y ampichönö o tsakëchönö* këkaqkunatam këkäyanqan sitiupita jipimunki.+
8 Noqaqa Jehovämi kä, tsëmi jutï.
Y manam munätsu noqata respetayämänampa rantin jukkunata respetayänanta.
Y noqata alabayämänampa rantin nunakuna rurayanqan santukunata alabayänanta.+
9 Unë ninqankunaqa cumplikärishqanam,
y kananqa yapëmi pasakunampaq kaqkunata qamkunata willëkä.*
Tsëkunataqa manaraq pasakuptinmi qamkunata willëkä”.+
10 Juk mushoq cancionta Teyta Jehoväpaq cantayë+
y patsa kuchun kinrëpita nunakuna pëta alabar cantayë.+
Qamkuna lamarpa pureqkuna y tsëchö llapan kawaqkuna,
islachö këkaq markakunachö nunakuna, tsëchö llapan kawaqkuna Teyta Diosta alabayë.+
Qaqakunachö kawaqkuna kushikur büllayë,
y jirka janankunapita fuertipa büllayë.
12 Llapankuna Teyta Jehoväta alabayätsun.
Y islachö këkaq markakunachö nunakunapis Teyta Diosta alabayätsun.+
13 Teyta Jehoväqa alläpa puëdeq
y pelyë yachaq soldädunömi shamuykan,+
y guërraman ëwëta munaq soldädunömi këkan.+
Guërrachö büllayanqannömi büllanqa, y chikeqninkunapita mas puëdeqmi kanqa.+
14 Teyta Diosmi kënö nin: “Atska tiempupam upälla kakurqö.
Awmi, upälla kakurmi imatapis rurarqötsu.
Peru kananqa wamran yurinampaqna këkaq warminömi qaparishaq,* jäkashaq y pükashaq.
Awmi, tsë llapantam rurashaq.
15 Jirkakunata y taksha jirkakunatam ushakätsishaq,
y tsëchö plantakunatam tsakiratsishaq.
16 Wiskukunatam o qaprakunatam mana imëpis ëwayanqan nänipa pushashaq,+
y mana reqiyanqan nänipam puritsishaq.+
Pëkuna rikëkäyaptinmi ampitapis o tsakëtapis* atsikyaqman tikratsishaq,+
y feyu patsatapis pampamanmi tikratsishaq.+
Tsë llapantam pëkunapaq rurashaq y manam dejarishaqtsu”.
17 Santukunaman confiakoqkunataqa ëwakuyänampaqmi obligayanqa,
y alläpa penqakatsishqatam dejayanqa.
Awmi, tsëmi pasanqa metalpita santukunata,
“qamkunam diosnïkuna kayanki” neqkunawan.+
18 Sordunö këkaqkuna wiyayë,
y wiskunö o qapranö këkaqkuna rikäyë.+
19 Sirwimaqnïkunam qapranö o wiskunö këkäyan,
y willakoqnïkunam sordunö këkäyan.
Päguta chaskeqkuna y Teyta Jehoväta sirweqkunam,
wiskunö o qapranö këkäyan.+
20 Imëkata rikarpis manam tsëkunaman pensayankitsu,
y rinrikikuna kaptimpis manam wiyayankitsu.+
21 Alli kaqta ruraq karmi Teyta Jehoväqa mandakunqankuna* alläpa välinqanta
y imëkachö yanapakunqanta rikätsikushqa.
22 Peru kë markachö nunakunapa imëkankunataqa jukkunam apakuyashqa,+
y kikinkunapis machëkunachö y carcelkunachömi këkäyan.+
Imëkankunata apakuyaptin manam ni pï salvashqatsu,+
y manam ni pï, “tsëkunata kutitsiyäpuy” nishqatsu.
23 ¿Qamkunapita mëqëkikunatan tsëkunata wiyakuyanki?
¿Mëqëkikunatan shamoq tiempuman pensëkur tsëkunata alli wiyakuyanki?
24 ¿Pitan permitishqa Jacobpa kastankunapa
y israelïtakunapa imëkankunata apakuyänanta?
Tsëtaqa contran jutsata* rurayanqampitam Teyta Jehovä permitishqa.
Pëkunaqa manam Teyta Dios mandakunqannötsu kawayarqan ni leyninkunatapis* manam cäsukuyarqantsu.+
25 Tsëmi pëkunawan alläpa cölerakur guërrachö sufriyänanta permitirqan.+
Guërrachömi imëkankunata ushakätsirqan,
peru pëkunaqa manam cäsukuyarqantsu.+
Nina ushëkaptimpis manam ni ima qokuyarqantsu.+