Lücas
13 Tsëchö këkaqkunapita wakin nunakunam Jesusta willayarqan pishtashqa qarëta apaq galileu nunakunata Pilätu wanutsinqanta. 2 Tsëta wiyëkurnam pëqa kënö nirqan: “¿Tsë galileu nunakunaqa wakin Galilëa nunakunapitapis mas jutsa* ruraq karnin tsënö sufriyanqantaku pensayanki? 3 Mana tsënö kanqantam qamkunata nï,* y mana arrepentikurninqa qamkunapis pëkunanöllam ushakäyanki.+ 4 O Siloam törri juchur wanutsinqan dieciöchu nunakunapis, ¿Jerusalenchö wakin nunakunapita mas culpayoq* kayanqantaku pensayanki? 5 Mana tsënö kanqantam qamkunata nï,* y mana arrepentikurqa qamkunapis pëkunanömi ushakäyanki”.
6 Tsëpitanam kë igualatsikuypaq parlarqan: “Juk nunapam üvas chakranchö hïgus plantan kapurqan, y frütanta asheq ëwarqa manam imatapis tarirqantsu.+ 7 Tsënam üvas chakranta cuidaq nunata kënö nirqan: ‘Rikë, kima watanam kë hïgus plantapa frütanta asheq shamurqö, peru manam imatapis tarirqötsu. ¡Wallur jitarï! ¿Imapaqtan mana wayuykaptinqa chakrata perditsir katsishun?’. 8 Pënam kënö nirqan: ‘Teytë, juk wata mas dejëkuy, lädunkunapa oqtir wanun jichanäpaq. 9 Tsëwan wayumuptinqa, allim kanqa, peru mana wayumuptinmi sïqa wallur jitarinki’”.+
10 Juk säbadunam, Diosta adorayänan wayichö yachatsikuykarqan. 11 Tsëchömi dieciöchu watapana mana alli espïritu qeshyatsinqan warmi këkarqan, y qorukashqa o umpukashqa karmi derechakëta puëdeqtsu. 12 Tsë warmita rikëkurmi Jesusqa qayëkur, “warmi, kananmi qeshyëkipita alliyärirqunki”+ nirqan. 13 Y pëman makinta churarkuptinmi, tsë höra derechakärir Teyta Diosta alabar qallëkurqan. 14 Tsëta rikëkurnam Diosta adorayänan wayita rikaqqa, säbaduchö Jesus nunakunata alliyätsinqampita cölerar tsëchö këkaq nunakunata kënö nirqan: “Joqta junaqmi trabajanapaq kan;+ alliyëta munarqa tsë junaqkunachö shayämuy, peru ama säbadu junaqchöqa”.+ 15 Tsënam Señorqa kënö contestarqan: “¡Allish tukoq nunakuna!+ ¿Manaku qamkunaqa säbaduchö töruykikunata o ashnuykikunata wataränampita paskar yakütseq apayanki?+ 16 Tsëqa kë warmi Abrahanpa tsurin këkar, y dieciöchu watapana Satanas sufritsishqa këkaptinqa, ¿manatsuraq säbadu junaqchöpis salvashqa kanman?”. 17 Tsënö niptinnam contran këkaqkunaqa penqakur qallëkuyarqan, peru tsëchö këkaq nunakunaqa imëka espantëpaqkunata ruranqampitam alläpa kushikuyarqan.+
18 Y kënöpis nirqanmi: “¿Imawanraq Diospa Gobiernun igualanman, y imatawanraq igualatsïman? 19 Juk nuna huertanman murunqan mostäza murunömi. Tsë muru jeqamurqa jatun plantamanmi tikrarqan, y pishqukuna shamurmi rämankunachö qeshunkuna rurayarqan”.+
20 Y yapëmi kënö nirqan: “¿Imatawanraq Diospa Gobiernunta igualatsïman? 21 Juk warmi kima medïda* harinawan pichunqan levadüranömi, y tsënömi llapan masa poqurin””.+
22 Jerusalenman ëwëkarmi, markan markan y caserïun caserïun yachatsikurqan. 23 Tsënam juk nunaqa, “Teytë, ¿wallkaqllaku salvakuyan?” nir tapurqan. Pënam kënö nirqan: 24 “Kichki punkupa yëkuyänëkipaq llapan puëdiyanqëkimannö kallpachakuyë.+ Qamkunatam këta nï,* mëtsikaqmi yëkuyta munayanqa, peru manam puëdiyanqatsu. 25 Wayiyoq nuna sharkur punkuta alli segurarkuptinqa, ‘Teytë, punkuta kichëkallämuy’+ nirmi punkuta takakur waqtachö shëkar* quedakuyanki. Tsënam pëqa contestayäshurniki, ‘manam musyätsu pikuna kayanqëkita’ niyäshunki. 26 Tsënam qamkunaqa kënö nir qallëkuyanki: ‘Noqakunaqa puntëkichömi mikur y upur kayarqä, y markäkunapa mas reqishqa cällinkunachömi yachatsikurqëki’.+ 27 Pënam niyäshunki: ‘Manam musyätsu pikuna kayanqëkita. ¡Noqapita witikuyë, llapëki mana allita ruraqkuna!’. 28 Tsëchömi waqtaman qarqushqa karnin waqayanki y cölerarmi kiruykikunatapis ruchuchütsiyanki, Abrahanta, Isaacta, Jacobta y Diospa llapan willakoqninkunata Diospa Gobiernunchö rikarnin.+ 29 Inti o rupay yarqamunan lädupita, jeqanan lädupita, norti lädupita y sur lädupita nunakuna shamurmi, Diospa Gobiernunchö mësaman jamakuyanqa. 30 Këta musyayë, wakin qepachö kaqkunam puntachö kayanqa, y wakin puntachö kaqkunam qepachö kayanqa”.+
31 Tsë höram wakin fariseukunaqa pëman witïkur, “Herödismi wanutsishuynikita munan, yarqur këpita ëwakuy” niyarqan. 32 Tsënam Jesusqa nirqan: “Ëwar tsë atoqta kënö niyë: ‘Rikë, kanan y warëmi demoniukunata qarqushaq y nunakunata alliyätsishaq, y warätinran* ruranäpaq kaqta ushashaq’. 33 Tsënö kaptinmi, kanan, warë y warätimpis Jerusalenta ëwar sïguishaq. Teyta Diospa willakoqnintaqa manam Jerusalenpita karuchö wanutsiyanmantsu o wañutsiyanmantsu.+ 34 Jerusalen, Jerusalen, Diospa willakoqninkunata wanutseq y qamman shamoqkunata rumiwan tsampir o saqmar wanutseq...,+ ¡mëtsika kutim wallpa wawankunata älasnin rurinman juntaqnö wamrëkikunata juntëta munarqö! Peru qamkunaqa manam munayarqunkitsu.+ 35 ¡Rikäyë! Wayikikunata y qamkunatam Teyta Dios dejariyäshunki.+ Këtam qamkunata nï,* kanampitaqa manam rikäyämankinatsu, ‘¡bendicishqam Teyta Jehoväpa* jutinchö shamoqqa!’ niyanqëkiyaq”.+