2 Corintius
5 Musyantsikmi patsachö wayintsik, awmi, carpa* wayintsik ushakätsishqa kaptinqa,+ Teyta Diospita mana ushakaq wayita ciëluchö chaskinapaq kaqta, tsë wayitaqa manam nunakunatsu rurayashqa.+ 2 Kë wayichöqa, noqantsikpaq kaqta y ciëlupita shamoqta* llapan shonquntsikwan vistikuyta munarmi llakikur waqëkantsik,+ 3 tsënöpa tsëta vistikur qalapächu mana kanapaq. 4 Rasumpa kaqchöqa, imëkapaq alläpa yarpachakurmi, kë carpa* wayichö këkaqkunaqa llakikur waqëkantsik, manam kë carpa wayita dejëta munartsu, sinöqa juknintana vistikuyta munarmi,+ tsënöpa wanoqlla cuerpuntsikpa rantin tsë imëyaqpis kawëta tarinapaq.+ 5 Teyta Diosmi tsëpaqqa alistamarquntsik+ y shamoq tiempuchö chaskinapaq kaqpita següru kanapaqmi, santu espïrituta garantïatanö* chaskirquntsik.+
6 Tsëmi imëpis següru këkantsik y cuerpullachöraq kawëkarqa, Señorpita karuchö këkanqantsiktam musyantsik.+ 7 Awmi, markäkoq o yärakoq kanqantsikmi pushamantsik manam rikanqantsiktsu. 8 Peru segürum* këkantsik, imapitapis masqa cuerputa dejëta y Señorwan juntu kawëtam munantsik.+ 9 Tsëmi pëwan juntu kawëkar o pëpita karuchö këkarpis, pëpa rikëninchö alli këta munantsik. 10 Cuerpullachöraq këkar allita o mana allita ruranqantsikpita cada ünu päguta chaskinampaqmi, llapantsikpis Cristupa cortinchö këkänantsik.*+
11 Rasunmi, Señorta respetanantsikpaq kaqta musyarmi, yachatsiyanqäkunata creiyänampaq nunakunata yanapëkäyä, peru Teyta Diosqa allim reqiyäman* y tsënölla concienciëkikunapis alli reqiyämänantam munä.* 12 Manam yapëtsu qamkunachö kikïkunapaq allita parlar këkäyä, sinöqa noqakunarëkur alabakuyänëkipaq y rikäyanqanllapita alabakoqkunata,+ peru shonqunchö kaqpitaqa mana alabakoqkunata contestëta puëdiyänëkipaqmi tsëkunata nikäyaq. 13 Juiciunnaq karqa,+ Teyta Diosrëkurmi tsënö kayarqö; peru alli juiciuyoq karqa, qamkunarëkurmi tsënö këkäyä. 14 Cristu kuyayämanqanmi obligayäman, awmi, kënö kanqantam següru këkäyä: llapankuna wanushqanö këkäyaptinmi, juk nuna llapantsikpaq wanurqan.+ 15 Pëqa llapantsikpaqmi wanurqan, tsënöpa kawaqkunaqa kikinkunapaq manana kawayänampaq,+ sinöqa pëkunarëkur wanoqpaq y kawamoq kaqpaqna kawayänampaq.
16 Tsëmi kanampitaqa, nunakuna rikäyanqannönatsu pitapis rikantsik.+ Y manam tsëllatsu, mëqantsikpis nunakuna rikäyanqannö Cristuta rikashqa karqa, kananqa manam tsënönatsu rikantsik.+ 17 Tsëmi pï nunapis Cristuwan juknölla karqa, Teyta Dios mushoq kamanqanmi;+ unë kaqkunaqa pasariyashqanam. ¡Rikäyë! Kananqa imëka mushoqkunanam kan. 18 Peru llapanmi Teyta Diospita shamun. Pëqa Cristurëkurmi kikintawan amishtatsimarquntsik,+ y jukkunata pëtawan amishtatsinapaqmi churamarquntsik.+ 19 Awmi, Teyta Diosqa mana allikunata rurayanqanta mana cuentaman churarmi,+ Cristurëkur nunakunata kikintawan amishtëkätsishqa,+ y nunakuna pëwan amishtayänampaq yanapaq noticiakunata willakunapaqmi churamarquntsik.+
20 Tsëmi kikin Teyta Dios noqantsikwan nunakunata roguëkaq cuenta Cristupa rantin willakoqkuna* kantsik,+ y Cristupa rantin willakoqkuna karmi “Dioswan amishtayë” nir rogantsik. 21 Jutsata* mana ruraqtam,+ pëqa jutsantsikpita perdonashqa kanapaq qarëman tikratsirqan, tsënöpa përëkur Teyta Diospa rikëninchö alli kanapaq.+