2 Rëyes

22 Josïasqa+ puwaq watayoq këkarmi gobernar qallarqan. Y Jerusalen markachömi treinta y un watapa gobernarqan.+ Mamäninqa, Bozcat markapita+ Adayapa tsurin Jedidä jutiyoq warmim karqan. 2 Unë kastan Davidnömi,+ Josïasqa Jehovä Diosta cäsukur allikunata rurarqan. David ruranqanllatam imëpis rurarqan.

3 Josïasqa dieciöchu watapa gobernëkarmi, Mesulampa willkan y Azalïaspa+ tsurin secretariu Safanta Jehoväpa templunman ëwanampaq kënö nir mandarqan: 4 “Jehovä Diospa templunman nunakuna apayanqan qellëtam punkuchö täpakoqkuna chaskiyashqa.+ Tsë qellëta juntanampaq+ ëwar sacerdötikunapa mandaqnin Hilquïasta+ nï. 5 Jehovä Diospa templunchö trabajaqkunapa mandaqninkuna tsë qellëta chaskiyätsun. Tsë qellëtam pëkunaqa Teyta Jehoväpa templunta altsaq nunakunata pagayanqa.+ 6 Imëka rurëta yachaqkunata, albañilkunata y peonkunatam pagayanqa. Y tsë qellëwanmi rantiyanqa qerukunata y llaqllashqa rumikunatapis.+ 7 Peru confiakuypaq nunakuna+ kayaptinmi chaskiyanqan qellëpita cuentata mañayänantsu”.

8 Tsëpitanam sacerdötikunapa mandaqnin Hilquïasqa, “Ley qellqarëkaq librutam+ Jehoväpa templunchö tarirqö” nir secretariu Safanta+ entregarqan. Y pënam leyirqan.+ 9 Tsënam secretariu Safanqa gobernantiman ëwar kënö nirqan: “Sirwishoqnikikunam templuchö qellëta juntarir, Jehoväpa templunta altsatseqkunata entregayashqa”.+ 10 Tsëpitanam Safanqa gobernantita nirqan: “Sacerdöti Hilquïasmi kë libruta entregamashqa”.+ Tsënö niskirmi leyiparqan.

11 Librupita leyipanqanta wiyarirmi gobernantiqa mantsakar röpantapis rachirqan.+ 12 Tsëpitanam gobernantiqa sacerdöti Hilquïasta, Safanpa tsurin Ahicamta,+ Micäyapa tsurin Acborta, secretariu Safanta y sirweqnin Asäyata kënö nir mandarqan: 13 “Kë libruchö qellqarëkaq mandamientukunataqa manam unë kastantsikkuna cäsukuyashqatsu ni cumpliyashqatsu. Tsëmi Jehovä Diosqa noqantsikwampis cölerashqa këkan.+ Kananqa ëwar noqapaq, llapan nunakunapaq y nacionnintsik Judächö nunakunapaqpis Jehovä Diosta tapuyämuy”.

14 Tsënö mandaptinmi Hilquïas, Ahicam, Acbor, Safan y Asäya, Diospa willakoqnin Huldäman ëwayarqan. Huldäqa,+ templuchö röpakunata cuidaq Salumpa warminmi karqan. Salumpa papäninqa Ticvämi karqan y Ticväpa papäninnam Harhas karqan. Huldäqa Jerusalen markachömi, mushoq kaq distrïtuchö täkurqan,* y tsëman ëwarmi parlayarqan.+ 15 Tapuyaptinmi Huldä nirqan: “Israelpa Diosnin Jehovämi nishqa mandayämushoqniki nunata kënö niyänëkipaq: 16 ‘Jehovämi kënö nin: “Leyipäyäshunqëki+ libru ninqannöllam kë markata y kë markachö täkoqkunatapis* ushakätsishaq. 17 Tsëtaqa rurashaq mana cäsumar animalkunata pishtëkur rupatsir santukunata adorayanqampitam.+ Tsëmi alläpa cölerakur kë markata pasëpa* ushakätsishaq’”.+ 18 Peru Jehovä ninqanta musyëta munarnin mandayämushoqniki gobernantita niyë: ‘Israelpa Diosnin Jehovämi kënö nin: “Tsë libru ninqanta cäsukunqëkipitam, 19 shonquykichö alläpa llakikunki* y manam orgullösunatsu kanki. Tsëtam noqa Jehovä rikëkä. Kë marka y nunakuna ushakäyänampaq kaqta ninqäta wiyarmi llakikurqëki+ y röpëkitapis rachir waqarqëki,+ tsënö waqanqëkitam wiyarqö. Tsëtam noqa Jehovä nï. 20 Tsëmi kë markachö nunakunataqa wanukuptikiraq o wañukuptikiraq castigashaq. Y qamqa kushishqam wanukunki y sepulturëkimanmi pampayäshunki”’”. Huldä tsënö ninqantam kutir gobernantita willayarqan.