Hëchus
8 Sauluqa allitanömi rikarqan Estëbanta wanutsiyanqanta.+
Tsë junaqpitam Jerusalen congregacionchö wawqikunata y panikunata imëkata rurar sufritsir qallëkuyarqan. Tsëmi llapankuna wakpa këpa Judëa y Samaria kinrëpa ëwakuyarqan, peru apostolkunaqa manam.+ 2 Teyta Diosta sirweq nunakunam pampayänampaq Estëbanta apakuyarqan, y alläpam pëpaq waqayarqan. 3 Sauluqa imëkata rurarmi congregacionchö wawqikunata y panikunata sufritsir qallëkurqan. Wayin wayin ëwarmi wayinkunaman yëkuykur, carcelman apanampaq warmitapis ollqutapis qarachëpa jipimoq.+
4 Tsënö kaptimpis, wakpa këpa ëwakoqkunaqa, Teyta Diospa palabrampita alli noticiakunata willakurmi ëwëkäyanqan kinrëpa ëwayaq.+ 5 Y Felïpiqa Samaria+ markaman* urarmi, tsëchö nunakunata Cristupita yachatsir qallëkurqan. 6 Mëtsikaq nunakunam Felïpi yachatsikunqanta shumaq wiyakuyaq, y milagrukunata ruranqantam rikäyaq. 7 Mana alli espïritukunayoq mëtsika nunakunapitam, tsë espïritukunaqa fuertipa büllar yarquyaq.+ Tsënöllam kuyukuyta mana puëdeqkuna y cöjukunapis, mëtsikaq alliyäyarqan. 8 Tsëmi tsë markachö nunakunaqa alläpa kushikuyarqan.
9 Tsë markachömi Simon jutiyoq nuna karqan. Pëqa tsë tiempuyaqmi magiata rurar Samaria nacionchö nunakunata espantashqata katsirqan, y puëdeq kanqantam neq. 10 Ichikpis jatumpis llapankunam ninqanta shumaq wiyakuyaq y kënömi niyaq: “Kë nunaqa Diospa Alläpa Puëdeq niyanqan Poderninmi”. 11 Magiata rurar mëtsika tiempupa espantashqata katsishqa kaptinmi, pëtaqa shumaq wiyakuyaq. 12 Peru Diospa Gobiernumpita alli noticiakunata+ y Jesucristupa jutimpita Felïpi yachatsiptinqa, ninqankunata creirmi warmipis ollqupis bautizakuyarqan.+ 13 Kikin Simonpis creikoqmi tikrarqan y bautizakuskirqa manam Felïpita dejarqantsu.+ Milagrukunata y imëka espantëpaqkunata ruranqanta rikarmi alläpa espantakoq.
14 Samariachö nunakuna Diospa palabranta shumaq chaskikuyanqanta wiyëkurnam,+ Jerusalenchö këkaq apostolkunaqa Pëdrutawan Juanta pëkunaman mandayarqan. 15 Tsënam pëkunaqa urar Samariapita nunakuna santu espïrituta chaskiyänampaq Teyta Diosman mañakuyarqan.+ 16 Pëkunaqa Señor Jesuspa jutinllachöran bautizakushqa kayarqan, y manam mëqampis santu espïrituta chaskishqaraqtsu karqan.+ 17 Tsëmi pëkunaman makinkunata churayarqan,+ y llapankunam santu espïrituta chaskir qallëkuyarqan.
18 Apostolkuna makinkunata churayaptin santu espïrituta chaskiyanqanta rikarmi, Simonqa apostolkunata qellëta änirqan 19 kënö nir: “Pimampis makïta churaptï santu espïrituta chaskinampaq, tsë poderta chaskinäpaq noqatapis yanapëkayämë”. 20 Tsënam Pëdruqa kënö nirqan: “Qellënikiwan juntu ushakë. Qamqa Teyta Dios qarakunqantam qellëwan rantita munarqunki.+ 21 Qampa shonquykiqa manam Teyta Diospa rikëninchö allitsu këkan, tsëmi ni ichikllapis kë asuntumanqa mëtikamunëtsu. 22 Tsëmi mana allita rurëta munanqëkipita arrepentikur Teyta Jehoväta* rogakuy, puëdikaptinqa, shonquykichö mana allita rurëta munanqëkipita perdonëkushunëkipaq. 23 Qamqa asqaq o ayaq venënu y mana alli rurëpa* esclävunmi kanki”. 24 Tsënam Simonqa pëkunata kënö contestarqan: “Tsë niyanqëkikuna mana pasamänampaq, noqapaq Teyta Jehoväta* rogakuykulläyë”.
25 Mëtsëchö musyatsikuskir y Teyta Jehoväpa* palabrampita willakurirnam, Samaria nunakunapa mëtsika caserïunkunachö alli noticiakunata willakur Jerusalenta kutikuyarqan.+
26 Tsënö kaptimpis, Teyta Jehoväpa* angelninmi+ Felïpita parlapar, “alistakur sur läduchö këkaq Jerusalenpita Gäza markaman uraq näniman ëwë” nirqan. Tsëqa tsunyaq sitiupa pasaq nänim. 27 Tsënam pëqa alistakur ëwarqan, y Etiopïa cortichö trabajaq* autoridäyoq nunawanmi tinkurqan. Pëqa Etiopïa nunakunata gobernaq Candäci jutiyoq warmipa* sirweqninmi karqan y imëka väleqninkunatam rikaq. Tsë nunaqa Diosta adoraqmi Jerusalenta ëwashqa karqan,+ 28 y nacionninmanmi kutikuykarqan. Pëqa Diospa willakoqnin Isaïas qellqanqanta fuertipa leyirmi carrëtanchö tëkar ëwëkarqan. 29 Tsënam santu espïrituqa Felïpita, “ëwar tsë carrëtaman witi” nirqan. 30 Tsënam Felïpiqa tsë carrëtapa lädunman cörrir Diospa willakoqnin Isaïas qellqanqanta leyikanqanta wiyar, “¿rasumpaku entiendinki llapan leyikanqëkita?” nir tapurqan. 31 Pënam, “¿imanöraq entiendïman mana ni pï entiendikätsimaptinqa?” nirqan. Tsënö nirmi carrëtanman yëkur pëwan jamakunampaq Felïpita rogarqan. 32 Diospa Palabranchö fuertipa leyikanqanqa këmi karqan: “Üshata pishtayänampaq apayanqannömi apayarqan, y millwanta rutuyaptin üsha wiyaranqannömi wiyaräkun. Manam imatapis nintsu.+ 33 Imëkata rurayanqan höraqa, manam pëpaq justiciata rurayarqantsu.+ ¿Piraq pë imanö kawanqampita willakunqa? Pëtaqa kë patsapitam apakuyarqan”.+
34 Tsënam cortichö trabajaq nunaqa Felïpita kënö nirqan: “Nïkallämë, ¿pipaqtan Diospa willakoqnin tsënö nikan? ¿Kikimpaq o jukpaqku?”. 35 Felïpinam Diospa Palabranchö tsënö ninqampita qallëkur, Jesuspita alli noticiakunata willarqan. 36 Nänipa ëwëkarnam mëtsika yaku kanqanman chäyarqan, tsënam cortichö trabajaq nunaqa, “¡rikë! Këchöqa mëtsika yakum kan, ¿imatan bautizakunäta michäkunman?” nirqan. 37 * 38 Tsëmi cortichö trabajaq nunaqa, carrëtata päratsinampaq mandakur Felïpiwan yakuman yëkurqan, tsëchömi Felïpiqa bautizarqan. 39 Yakupita yarqarayämuptinllam, Jehoväpa* santu espïritunqa Felïpita juk sitiuman apakurqan, y cortichö trabajaq nunaqa alläpa kushishqam nänipa ëwakurqan, y manam yapëqa Felïpita rikarqannatsu. 40 Felïpiqa Asdod markachömi usharqan y Cesarëaman chanqanyaqmi tsë kinrë markakunachö alli noticiakunata willakurqan.+