Ezequiel
1 Babiloniaman apayanqan nunakunaqa,+ Kebar mayu*+ kuchunchömi täkuyarqan.* Tsëmi treinta watachö,* chusku killapa pitsqa junaqninchö pëkunawan këkaptï, ciëlu kichakärirqan y Teyta Dios revelamanqantam rikarqä. 2 Tsë witsampaqqa, gobernanti Joaquinta Babiloniaman apayanqampita pitsqa watanam pasashqa karqan. Killapa pitsqa kaq junaqninchömi,+ 3 noqa Ezequiel* caldeukunapa markanchö,+ Kebar mayu* kuchunchö këkar Jehovä parlapämanqanta wiyarqä.+ Teyta Jehovämi poderninwan yanapamarqan. Noqaqa sacerdöti Buzïpa tsurinmi kä.
4 Rikarëkaptïmi norti lädupita shukukuy vientu shamurqan.+ Tsë shukukuy vientuwanmi mëtsika pukutë shamurqan y pukutë rurinchöqa räyukunam tillapyarqan.+ Tsë räyukuna tillapyëkanqan entëru lädumpanam, mëtsika aktsi karqan. Y räyu tillapyanqan chowpinnam* plätawan öru takushqanöraq alläpa chipaparqan.+ 5 Räyukuna tillapyanqan kaqchönam rikarqä chusku angelkunata.*+ Tsë angelkunaqa nuna niraqmi kayarqan. 6 Cada angelmi chusku cärayoq y chusku älayoq karqan.+ 7 Chakinkunaqa törupanömi karqan, derëchullam karqan y alli chipapätsishqa cobrinöran chipaparqan.+ 8 Y chusku älankuna rurinchömi nunapanö rikrankuna karqan. Chuskumpam cärankuna y älankunapis karqan. 9 Älankunaqa topanakoqmi. Y mëpapis ëwarqa manam tumayaqtsu. Puntaman rikarëkarllam ëwayaq.+
10 Cada angelmi chusku cärayoq karqan. Puntamanmi+ nunapa cäran karqan. Derëcha kaq läduchönam leonpa cäran karqan. Izquierda kaq läduchönam törupa+ cäran karqan. Y qepamannam pichakpa*+ cäran+ karqan. 11 Tsënömi cärankunaqa karqan, y älankunaqa witsëpam këkarqan.+ Cada angelpam ishkan älankuna topanakoq y ishkë kaqnam cuerpunkunata tsapaq.
12 Mëpapis Teyta Diospa podernin apanqanmanmi ëwayaq.+ Më läduman ëwarpis manam tumayaqtsu. Puntaman rikarëkarllam ëwayaq. 13 Tsë angelkunaqa shanshëkaq o shankëkaq carbonnömi kayarqan, chipapaq antorchakunanö. Llapankunam qepamampis y puntamampis ëwayaq. Ninapitanam+ räyukuna yarqamoq. 14 Tsë angelkunaqa räyunöran kayaq y mëmampis ëwarqa räyunöran ëwayaq.
15 Tsë angelkunata* rikarëkarmi, rikarqä patsachö ruëdakuna këkaqta. Tsë ruëdakunaqa chusku cärayoq cada angelpa lädunchömi këkarqan.+ 16 Tsë ruëdakunaqa crisölitu ruminöran chipaparqan. Chuskumpis tsë niraqllam kayarqan. Y cada ruëda rurinchömi juk ruëda mas churashqanö karqan.* 17 Tsë ruëdakunaqa më läduman ëwarpis manam tikraqtsu. Chuskun lädumampis mana tikrëllapam ëwaq. 18 Ruëdankunaqa mantsakëpaq jatunmi karqan. Chuskun ruëdankunachömi entëru lädumpa mëtsika nawi karqan.+ 19 Angelkuna mëpapis ëwayaptinqa, ruëdakunapis tsëmampam ëwayaq. Y angelkuna patsapita pallarikarkuyaptinqa* ruëdakunapis pallarikarkoqmi.+ 20 Angelkunaqa Diospa podernin mëpapis apanqampam ëwayaq. Diospa podernin mëpapis ëwanqampam pëkuna ëwayaq. Y pëkunawanmi ruëdakunapis ëwayaq. Teyta Diospa podernin angelkunata* mëpapis pushanqannöllam ruëdakunatapis puritseq. 21 Angelkuna ëwayaptinqa, ruëdakunapis ëwayaqmi. Angelkuna pärariyaptinqa, ruëdakunapis pärariyaqmi. Angelkuna patsapita pallarikäyaptinqa,* ruëdakunapis pallarikäyaqmi. Teyta Diospa poderninmi angelkunatapis* y ruëdakunatapis puritseq.
22 Angelkunapa peqan o uman janampam vidriunöraq pïsu churararqan. Tsë pïsuqa rajunöran* chipaparqan y alläpa espantakuypaqmi karqan. Tsë pïsuqa umankuna o peqankuna janampam këkarqan.+ 23 Tsë pïsu jawanchö* këkaq angelkunapa älankunaqa derëchum këkarqan. Ishkë älankunam juk kaq lädu cuerpunta tsapaq y ishkë kaq älankunanam juk kaq lädu cuerpunta tsapaq. 24 Y älankunatam wiyarqä mëtsika yakunöraq bunyaqta, Llapanta Puëdeq Teyta Diospa vozninnöran karqan.+ Mëpapis ëwayaptinqa älankunaqa mëtsika soldädukunanöran büllaq. Y ëwëkäyanqanchö pärarqa älankunatam bajaratsiyaq.
25 Angelkunapa peqankuna o umankuna jananchö këkaq vidriunöraq pïsu kaqchömi, juk voz wiyakarqan. Y ëwëkäyanqanchö pärarqa älankunatam bajaratsiyaq. 26 Umankuna o peqankuna jananchö churarëkaq vidriunöraq pïsu jananchönam, zafïru rumi niraqta rikarqä.+ Tsë rumiqa gobernar täkuyänan sïllanömi karqan.+ Tsë sïllachönam rikarqä juk nuna niraq jamarëkaqta.+ 27 Cuerpunqa tseqllampita janamanmi, plätawan öru takushqanöraq chipaparqan+ y ninanöran rawrarqan o lunyarqan. Tseqllampita uramampis ninanöran karqan.+ Y entëru lädunmi chipaparqan 28 tamyamunqan junaq pukutëchö turmanyënöraq.+ Tsënömi chipaparqan entëru lädunchö këkaq aktsiqa. Teyta Jehoväpa poderninnöran karqan.+ Tsëta rikëkurmi patsamampis urkü chanqanyaq ishkirirqä y tsënam parlapämaqta wiyarqä.