2 Samuel
12 Tsënam Jehovä Diosqa Natanta+ mandarqan Davidman ëwanampaq, y chëkurnam Natanqa Davidta+ kënö nirqan: “Juk markachömi ishkë nunakuna kayarqan, jukmi rïcu karqan y jukninnam waktsa karqan. 2 Rïcu kaqpaqa mëtsikam wäkankuna y üshankunapis karqan.+ 3 Peru waktsa kaqpaqa, rantinqan jukllëlla taksha üshanmi karqan.+ Shumaqmi cuidaq y wamrankunatawan juntum kuyar wätarqan. Matinchömi mikoq, täzanchömi yakuta upoq y mellqaninchömi punoqpis. Tsë üshataqa wamrantanömi wätarqan. 4 Peru juk kutim rïcu nunaman visïtan chärirqan, tsënam kikimpa üshanta o wäkanta pishtanampa rantin, tsë waktsa nunapa üshanta pishtaskir tsë visïtampaq cocinapurqan”.+
5 Tsëta wiyëkurmi Davidqa feyupa cölerarnin Natanta kënö nirqan: “¡Teyta Jehoväpa jutinchömi neq,+ tsëta ruraq nunataqa wanutsiyänanmi! 6 Y mana kuyakoq kar mana allita ruranqampitam, chusku üshapa preciunta paganan”.+
7 Tsënö niptinmi Natanqa Davidta kënö nirqan: “¡Qammi kanki tsë mana allita ruraq nunaqa! Israelpa Diosnin Jehovämi këta nishunki: ‘Noqam Israelpa gobernantin kanëkipaq akrarqaq+ y Saul wanutsishunëkipitam salvarqaq.+ 8 Patronniki Saulpa familianta+ y warminkunatam qamta entregarqaq.+ Y Israelchö y Judächö gobernanti kanëkipaqpis churarqaqmi.+ Y manam tsëllatatsu ruranä karqan, maskunatapis entreganaqmi karqan.+ 9 ¿Imanirtaq noqa Jehovä mandanqaqta mana cäsukur mana allikunata rurarqunki? ¿Imanirtaq warminwan casakunëkirëkur+ hitïta Urïasta wanutsirqunki?+ Manam ammonïtakunatsu+ wanutsiyashqa, sinöqa qammi wanutsirqunki. 10 Kananqa mana cäsumarnï hitïta Urïaspa warminwan casakunqëkipitam, familiëkikuna+ chikinakur y wanutsinakurlla kawakuyanqa’.* 11 Këtam Teyta Jehovä nishunki: ‘Kananqa familiëkillam chikishunki.+ Warmikikunatam rikëkaptiki juk nunata entregashaq+ y pëmi llapankuna rikëkäyaptin warmikikunawan kakunqa.*+ 12 Qamqa pakëllapam jutsata* rurarqëki,+ peru tsë nunaqa noqa ninqätam ruranqa llapan israelïtakuna rikëkäyaptin”.
13 Tsënam Davidqa Natanta nirqan: “Teyta Jehoväta cöleratsirmi jutsata* rurëkurqö”.+ Tsënam Natanqa Davidta nirqan: “Jehovä Diosmi jutsata ruranqëkipita perdonëkäshunki,+ manam wanunkitsu.+ 14 Tsënö kaptimpis Jehovä Diosta mana respetanqëkipitam, tsëllaraq yureq tsurikiqa wanunqa o wañunqa”.
15 Tsënö nïkurnam Natanqa wayinta kutikurqan.
Jehovä Diosqa Urïaspa warminchö yureq Davidpa tsurin qeshyanantam permitirqan. 16 Y Davidqa tsurin wanunanta mana munarmi Teyta Diosman rogakur mikurqantsu, y cuartunman yëkurirmi patsallachö punurqan.+ 17 Palaciunchö täkoq* dirigentikuna sharkatsita munayaptimpis, Davidqa manam munarqantsu, ni pëkunawan mikurqantsu. 18 Y wamraqa qanchis junaqpa qeshyarirmi wanukurqan. Tsënam sirweqninkunaqa Davidta wamra wanushqa kanqanta willëta mantsayarqan. Kënömi ninakuyaq: “Wamra kawëkaptinllaraq parlapanqantsiktapis mana wiyëkämarnintsikqa, wanurishqa kanqanta willëkushqanäqa imëka mana allikunatachi rurëkunqa”.
19 Kikinkunapura pakëllapa parlëkäyanqanta wiyëkurmi, Davidqa cuentata qokurqan wamran wanushqa kanqanta. Tsëmi, “wanurishqaku wamrallä” nir tapukurqan, pëkunanam, “awmi, wanushqam” niyarqan. 20 Tsëpitanam Davidqa patsapita sharkurnin bañakurir aceitita jichakurqan+ y röpanta cambiakurqan, y Jehovä Diosta adorayänan wayimanmi ëwarqan.+ Tsëpitanam palaciunta kutïkur mikuyta mañakurir mikurqan. 21 Tsëmi sirweqninkunaqa kënö tapuyarqan: “¿Imanirtan wamra kawëkaptin mikurqëkitsu y waqar kakurqëki? Peru, ¿wanuriptinqa sharkur mikur qallëkunki?”. 22 Tsënam Davidqa kënö nirqan: “Capaz Teyta Jehoväqa llakipämanqa* nirmi pensarqä,+ tsëmi tsurï kawëkaptinqa waqarnin imatapis mikurqätsu.+ 23 Peru tsurï wanushqa këkaptinqa ¿imapaqnatan mana mikurnin kashaq? Imëkata ruraptïpis mananam kawarimunqanatsu.+ Noqapis tsurïnömi wanushaq,+ peru pëqa manam kanan höratsu kawarimunqa”.+
24 Tsëpitanam Davidqa warmin Bat-Sëbata shoqarqan. Y yapë punuriyaptinmi* Bat-Sebaqa+ qeshyaq tikrarqan. Y wamra yuriskiptinnam Salomon*+ nir jutin churayarqan. Jehovä Diosqa tsë wamrata kuyarqanmi.+ 25 Tsë wamrata kuyarmi, Jehovä Diosqa willakoqnin Natanta+ mandarqan Jedidïas* nir jutin churayänampaq.
26 Joabqa Rabä+ markachömi ammonïtakunawan+ jinallaraq pelyëkarqan y gobernaqpa wayin kaq markamannam yëkurishqa karqan.+ 27 Tsëmi juk willakoqta Davidman mandarqan kënö ninampaq: “Rabä markachö täkoqkunawanmi* pelyarqö+ y yaku* kanqan markamannam yëkurirqö. 28 Kananqa kë markapa duëñun kanëkipaq soldäduykikunawan pelyaq shamuy, peru noqa yëkur ushakätsiptïqa qamta alabayäshunëkipa rantinmi noqata alabayämanqa”.
29 Tsëmi Davidqa llapan soldädunkunawan Rabä markata ëwëkur pelyarqan, y tsë markapa duëñunmi tikrarqan. 30 Y gobernanti Malcampa corönantam Davidta corönatsiyarqan. Tsë corönaqa treinta y cuatru kïlus* lasaq örupitam karqan y shumaq rumikunawan adornashqam karqan. Davidqa llapan tariyanqantam+ tsë markapita+ mëtsikata apakurqan. 31 Tsë markachö nunakunatam trabajadorninkuna kayänampaq churarqan: ladrïllukunata rurayänampaq, rumikunata roquyänampaq, patsata uchkuyänampaq y qerukunata mutuyänampaq.* Tsëtam rurarqan ammonïtakunapa llapan markankunachö täkoq* nunakunawan. Tsëpitanam Davidwan llapan soldädunkunaqa Jerusalen markata kutikuyarqan.