2 Crönicas

20 Tiempuwannam moabïta,+ ammonïta+ y ammonim nunakuna willanakuskir Jehosafat-ta atacayänampaq ëwayarqan. 2 Tsënam Jehosafat-ta kënö nir willayarqan: “Lamar* kuchunchö y Edomchö+ kawaq nunakunam atacayäshunëkipaq mëtsikaq shayämushqa. Y En-Guedï+ nir reqiyanqan Hazazon-Tamar markachömi këkäyan”. 3 Tsëmi Jehosafatqa mantsakarnin Jehovä Diosman yanapanampaq rogakurqan.+ Y Judächö llapan nunakunatapis ayunayänampaqmi mandarqan. 4 Tsënam llapan nunakuna juntakëkur yanapëkunampaq Jehovä Diosman mañakuyarqan.+ Judächö këkaq mëtsë markakunapitam ima rurëtapis mana musyar Jehoväman mañakuyänampaq ëwayarqan.

5 Jehoväpa templun puntanchö këkaq mushoq patiuman shëkurmi,* Jehosafatqa Jerusalenpita y Judäpita llapan nunakuna juntakashqa këkäyaptin 6 kënö mañakurqan:

“Unë kastäkunapa Diosnin Teyta Jehovä, qamllam ciëluchö Diosqa kanki.+ Qampa podernikichömi llapan nacionkunapis kayan.+ Qamllam kallpayoq y poderyoq kanki. Qamtaqa manam ni pï vencishunkitsu.+ 7 Teyta Dioslläkuna, unë kastäkuna kë nacionchö kawakuyänampaqmi këchö täkoq* unë nunakunata qarqurqëki. Tsënö qarquskirmi amïguyki Abrahanpa kastankunata imëyaqpis këchö kawakuyänampaq churarqëki.+ 8 Pëkunam këchö kawakurnin jutikipa reqishqa kanampaq templutapis shäritsiyarqan.+ Y kënömi niyarqan: 9 ‘Ima desgraciapis pasayämaptin, chikimaqnïkuna atacayämaptin, alläpa mallaqë kaptin, ima qeshyapis chämuptin o ima castïgupapis pasarqa llakishqam yanapayämänëkipaq kë templupita mañakayämushaq (kë templuqa jutikipa reqishqam këkan).+ Y qamqa rogakuyanqaqta wiyarirmi salvayämanki’.+ 10 Kananmi Ammonpita, Moabpita y Seir jirkakunapita+ nunakuna atacayämänampaq shayämushqa. Qamqa manam munarqëkitsu israelïtakuna Egiptupita yarqamur pëkunataqa atacayänanta, tsëmi juk lädupa tumarir pasayämurqan.+ 11 Tsënö këkaptimpis entregayämanqëki markapita qarqayämänampaqmi kananqa shayämushqa.+ 12 Teyta Dios, ¿manatsuraq pëkunata castiganki?+ Noqakunaqa mëtsika kayaptinmi vencita puëdiyäshaqtsu. Manam ima rurëtapis musyayätsu.+ Peru yanapayämänëkita munarmi qamllaman rikaräyämü”.+

13 Tsënö mañakunqanyaqmi, llapan nunakuna warminkunawan, tsurinkunawan y pishi wamrankunawan Teyta Jehoväpa puntanchö shëkäyarqan.*

14 Tsëchömi këkarqan Zacarïaspa tsurin Jahaziel. Zacarïaspa papäninqa Benäyam karqan, Benäyapa papäninqa Jeielmi karqan, Jeielpa papäninqa levïta Matanïasmi karqan y Matanïasqa Asafpa kastanmi karqan. Jehovä Diosmi Jahazielta poderninwan yanaparqan, 15 tsëmi kënö nirqan: “Judä nunakuna, Jerusalen nunakuna y qampis teytë Jehosafat, ¡wiyayämë! Jehovä Diosmi kënö niyäshunki: ‘Kë mëtsikaq nunakunata rikarnin ama mantsakäyëtsu ni llakikuyëtsu. Kë pelyachöqa noqa Diosnikikunam pelyamushaq, manam qamkunatsu.+ 16 Warë ëwar puntankunaman churanakuyë. Pëkunaqa Ziz nänipam witsëkäyämunqa, y tsunyaq Jeruel sitiupa tsimpan pampa ushaqchömi tinkuyanki. 17 Peru qamkunaqa manam pelyayankitsu. Chärirqa ama atacayankitsu, tsëpa rantinqa shëkarlla* quedakuyanki+ y rikäyanki noqa Jehovä qamkunata imanö salvanqäta.*+ Judä y Jerusalen nunakuna ama mantsakäyëtsu ni llakikuyëtsu.+ Warë ëwar puntankunaman churakäyë, noqa Jehovämi yanapayashqëki’”.+

18 Tsënö niptinmi Judächö y Jerusalenchö täkoq* nunakuna y Jehosafatpis Teyta Jehoväpa puntanman qonqurikuyarqan Jehoväta adorayänampaq. 19 Tsënam Cohatpa+ y Corëpa kastan levïtakunapis sharkurnin Israelpa Diosnin Jehoväta fuertipa alabayarqan.+

20 Waräninnam tempränulla shärikurir Tecöa+ tsunyaq sitiuman ëwayarqan. Yarqurëkäyaptinnam Jehosafatqa llapankunata nirqan: “¡Judächö y Jerusalenchö täkoq* nunakuna wiyayämë! Valienti kayänëkipaq Jehovä Diosnintsikman markäkuyë o yärakuyë. Diosnintsikpa willakoqninkuna niyanqanman confiakushqaqa,+ manam imapis pasamäshuntsu”.

21 Tsëpitanam nunakunata tapurir, Jehovä Diosta cantarnin alabayänampaq nunakunata akrarqan.+ Pëkunam sagrädu röpata vistikurkur soldädukunapa puntanta, “Teyta Jehoväta agradecikuyë, pëqa imëpis alläpa kuyakoqllam këkan” nir cantar ëwayarqan.+

22 Kushishqa cantar qallëkuyanqan höram Jehovä Diosqa, Judäta atacayänampaq Ammonpita, Moabpita y Seir jirkakunapita ëwashqa nunakunata pantatsir usharqan, tsëmi kikinkunapura wanutsinakuyarqan.+ 23 Ammonïta y moabïta nunakunam, Seir jirkachö+ täkoq* nunakunata llapanta wanutsiyarqan, tsëpitanam kikinkunapura wanutsinakuyarqan.+

24 Tsunyaq sitiuchö rikachakuna törriman chärirnam,+ Judä nunakunaqa chikeqninkunata rikäriyarqan llapampis patsachö wanushqa jitarëkäyaqta.+ Manam ni jukllëllapis kawëkarqa quedashqatsu kanaq. 25 Tsëmi Jehosafatqa, llapan nunakunawan ëwarqan chikeqninkunapa imëkankunata apakuyänampaq. Y apëtapis mana puëdiyanqanyaqmi+ röpatapis y imëka väleq cösaskunatapis wanushqakunapata o wañushqakunapata juntayarqan. Y mëtsika kaptinmi kima junaqtaraq ashtar ushayarqan. 26 Chusku kaq junaqchönam Beracä pampachö* juntakäyarqan Jehovä Diosta alabayänampaq. Tsëmi tsë pampataqa kananyaqpis Beracä*+ pampa nir reqiyan.

27 Tsëpitanam chikeqninkunapita Jehovä Dios salvashqa kaptin Judächö y Jerusalenchö täkoq* nunakunaqa, Jerusalen markata kushishqa kutikuyarqan y puntankunatam Jehosafat ëwarqan.+ 28 Cuerdayoq instrumentukunata, arpakunata+ y trompëtakunata+ tocarmi Jerusalenman chäyarqan, tsëpitam Teyta Jehoväpa templunman ëwayarqan.+ 29 Mëtsë nacionkunachömi musyariyarqan israelïtakunapa chikeqninkunawan Jehovä Dios pelyashqa kanqanta, tsëmi alläpa mantsakäyarqan.+ 30 Teyta Dios yanapaptinmi Jehosafat-ta alli gobernarqan, tsëmi mëtsëchöpis kushishqa kawakuyarqan.+

31 Jehosafatqa Judächömi gobernarqan. Treinta y cincu watayoq këkarmi gobernar qallarqan y veinticincu watapam Jerusalen markachö mandakurqan. Mamäninqa Silhïpa tsurin Azubä jutiyoq warmim karqan.+ 32 Jehosafatqa, papänin Asä+ ruranqannömi Jehovä Diosta cäsukur allikunata rurarqan.+ 33 Peru manam santukunata adorayänan sagrädu altu sitiukunataqa ushakätsiyarqantsu,+ y nunakunapis manam llapan shonqunkunawantsu unë kastankunapa Diosninta adorayarqan.+

34 Jehosafat ruranqankunataqa, qallanampita ushananyaqmi Hananïpa+ tsurin Jehü+ qellqarqan. Tsë qellqanqanqa këkan Israelchö Gobernaqkunapaq Willakoq Libruchömi. 35 Tsëpitanam Judäpa gobernantin Jehosafatqa, Israelpa gobernantin Ocozïaswan yanapanakuyänampaq parlayarqan. Ocozïasqa mana allikunata ruraq nunam karqan.+ 36 Yanapanakurmi Ezion-Guëber+ sitiuchö barcukunata rurayarqan, tsë barcukunaqa Tarsistam+ ëwayänan karqan. 37 Peru Maresä markapita Dodavahupa tsurin Eliezermi, Dios willanqanta musyatsir Jehosafat-ta kënö nirqan: “Yanapanakuyänëkipaq Ocozïaswan parlanqëkipitam, llapan ruratsinqëkikunata Jehovä Dios ushakätsinqa”.+ Willakunqannöllam barcukunaqa ushakarqan y manam Tarsista ëwayarqannatsu.+