Jeremïas
35 Josïaspa tsurin Jehoiaquim+ Judächö gobernanqan witsanmi, Jeremïasta Teyta Jehovä kënö parlaparqan: 2 “Recabpa kastankunawan+ parlaq ëwë, y noqa Jehoväpa wayïchö mikuyänan cuartuman pushë, tsëchö vïnunkuna qarë”.
3 Tsënam Habazinïaspa willkan y Jeremïaspa tsurin Jaazanïasta, wawqinkunata, tsurinkunata y Recabpa wakin kastankunata, 4 Teyta Jehoväpa wayinman pusharqä. Hananpa tsurinkuna mikuyanqan cuartumanmi aparqä. Hananqa, Dios Yayata sirweq Igdalïaspa tsurinmi karqan. Tsë cuartuqa dirigeqkuna mikuyänan cuartu lädunchömi karqan, y dirigeqkuna mikuyänan cuartunam, punkuta täpakoq Salumpa tsurin Maasëyapa mikunan cuartu jananchö karqan. 5 Tsëpitanam Recabpa kastankunapa puntanman, vïnuyoq väsukunata y cöpakunata churarqä, y “kë vïnuta upuyë” nirqä.
6 Peru pëkunaqa kënömi niyämarqan: “Manam vïnuta upuyäshaqtsu, unë awilükuna Recabpa+ tsurin Jehonadabmi* kënö mandayämarqan: ‘Ama imëpis qamkuna ni tsurikikuna vïnuta upuyankitsu. 7 Ama wayikunata rurayankitsu ni murukuyankitsu, y ama üvas plantakunata plantayankitsu ni üvas chakrakunata rantiyankitsu. Tsëpa rantinqa, carpakunallachö* kawayanki. Tsëta rurarqa, forastërunö këkäyanqëki markakunachömi mëtsika watapa täkuyanki’.* 8 Tsëmi unë awilükuna Recabpa tsurin Jehonadab niyämanqanta cäsukur, noqakuna ni warmïkuna, ni ollqu ni warmi tsurïkunapis vïnuta upuyätsu. 9 Manam noqakunapaq wayikunata rurayätsu ni üvas chakräkunapis kantsu, y manam mas chakräkuna ni ima murükunapis kantsu. 10 Kananyaqpis carpakunallachömi* kawayä y unë kastäkuna Jehonadab* llapan mandayämanqantam cäsukuyä. 11 Peru Babiloniachö gobernaq Nabucodonosor, kë nacionchö nunakunata ushakätseq shamuptinmi+ kënö niyarqä: ‘Caldëapita y Siriapita soldädukuna mana ushakätsimänapaq, Jerusalenman qeshpir ëwakushun’. Tsënöpam kananqa Jerusalenchö këkäyä”.
12 Teyta Jehoväqa yapëmi Jeremïasta kënö nirqan: 13 “Israel nunakunapa Diosnin angelkunata mandaq Teyta Jehovämi këta nin: ‘Judäpita y Jerusalenpita nunakunaman ëwar kënö nï: “¿Manaku qamkunataqa kutin kutin ninqäkunata wiyakuyänëkipaq nirqö?*+ ninmi Teyta Jehovä. 14 Recabpa turin Jehonadabqa, Recabpa kastankunatam vïnuta mana upuyänampaq mandarqan, y pëkunaqa llapan ninqanta cäsukurmi kananyaqpis vïnuta upuyashqatsu, tsënömi unë kastankuna ninqanta cäsukuyashqa.+ Peru qamkunaqa kutin kutin parlapëkaptïmi,* ni ichikllapis cäsuyämarqunkitsu.+ 15 Y kutin kutinmi sirwimaqnï willakoqkunata,+ qamkunata kënö niyäshunëkipaq mandamurqä: ‘¡Roguëkuyashqëki, ama mana allikunata rurayënatsu,+ tsëpa rantinqa alli kaqtana rurayë! Ama imëkata rurar santukunata adorayënatsu. Tsëta rurarqa, qamkunata y unë kastëkikunata entreganqä markakunachömi, atska tiempupa kawayanki’.+ Peru qamkunaqa manam cäsukuyarqëkitsu ni ninqäkunata wiyakuyarqëkitsu. 16 Recabpa tsurin Jehonadabpa kastankunaqa, unë kastankuna+ llapan mandanqankunatam cäsukuyan. Peru kë nunakunaqa, manam ni ichikllapis cäsuyämantsu”’”.
17 “Tsëmi Israel nunakunapa Diosnin angelkunata mandaq Teyta Jehovä këta nin: ‘Parlapaptï mana cäsumashqa kayaptin, y qayaptï mana wiyamashqa kayaptinmi,+ Judäpita y Jerusalenpita nunakunaman, pëkunata puntallapitana willanqänölla, imëka mana allikunata chätsishaq’”.+
18 Tsëpitanam Recabpa kastankunata Jeremïas kënö nirqan: “Israel nunakunapa Diosnin angelkunata mandaq Teyta Jehovämi këta nin: ‘Unë kastëkikuna Jehonadab llapan mandayäshunqëkita cäsukushqa kayaptiki, y pë niyäshunqëkinölla llapantapis rurashqa kayaptikim, 19 noqa Israel nunakunapa Diosnin angelkunata mandaq Jehovä këta nï: “Recabpa tsurin Jehonadabpa* kastankunaqa, imëpis sirwimarmi rikënïchö këkäyanqa”’”.