Romänus
7 ¿Manaku musyayanki wawqikuna y panikuna (noqaqa leyta reqeqkunatam parlapëkä), nuna kawanqanyaqqa Ley patronnin kanqanta? 2 Këman pensayë, casäda warmiqa qowan o runan* kawanqanyaqqa, ley ninqannömi pëwan juknölla këkan; peru qowan wanuriptinqa, runampa leynimpitam* librina tikran.+ 3 Tsëmi qowan o runan* kawëkaptin, juk nunawan casakurqa jukwan oqllanakoqnö reqishqa kanman.+ Peru qowan wanuptinqa, pëpa leynimpita librina karmi, juk nunawan casakurpis, jukwan oqllanakuy jutsatatsu* rurëkan.+
4 Qamkunapis wawqilläkuna y panilläkuna, jukpana kayänëkipaq,+ awmi wanushqampita kawatsimushqa kaqpana kayänëkipaqmi,+ Cristupa cuerpunrëkur Leypaq wanuyarqunki, tsënöpa Teyta Diosta kushitsinqan kaqtana ruranapaq.+ 5 Jutsa* ruraq cuerpuntsik munanqanmannö kawanqantsikyaqqa, wanuyman chätsikoq kaqkunata ruranapaqmi, Leychö cläru rikätsikunqan mana alli munëkuna cuerpuntsikta dominaq.+ 6 Peru kananqa michämaqnintsik Leypaq wanushqa karmi,+ Leypita librina quedarquntsik, tsënöpa santu espïritu dirigimanqantsiknö juknöpana sirwipakoq kanapaq,+ y manana unë witsan qellqashqa leykuna mandakunqannönatsu.+
7 Tsëqa, ¿ima nishuntan? ¿Jutsaku* Ley? ¡Manam tsënötsu! Rasumpa kaqchöqa, Ley mana kaptinqa, manam jutsata reqïmantsu karqan.+ Këta niyashqëki, Leychö “manam jukpa imantapis munapänëkitsu”+ mana nishqa kaptinqa, manam musyämantsu karqan jukpa imantapis munapë ima kanqanta. 8 Peru jutsaqa* mandamientupita välikurmi, jukpa imantapis munëta noqachö yuritsimurqan. Awmi, ley mana kaptinqa, jutsaqa wanushqam o wañushqam këkarqan.+ 9 Rasumpa kaqchöqa, manaraq Ley kaptinqa noqaqa kawëkarqämi. Peru mandamientu chäramuptinqa, jutsa* kawarimuptinmi noqaqa wanurqä.+ 10 Y kawëman chätsimänampaq mandamientu,+ wanuyman chätsimanqantam cuentata qokurqa. 11 Awmi, mandamientupita välikurmi jutsaqa* engañamar wanutsimarqan. 12 Tsëmi kikin Leyqa sagrädu y mandamientupis sagrädu, allita ruranapaq y allim.+
13 Tsëqa, ¿alli kaqku wanutsimarqan? ¡Manam tsënötsu! Sinöqa jutsa* ima kanqan musyakänampaqmi, jutsaqa alli kaqwan wanutsimarqan.+ Tsënömi mandamientuqa jutsa alläpa mana alli kanqanta rikätsikun.+ 14 Musyantsikmi Leyqa Teyta Diospita shamunqanta, peru noqaqa jutsa* ruraqllam kä, y jutsapa makinmanmi rantikushqa karqö.+ 15 Manam entiendïtsu imanir tsënö portakunqäta: munanqätaqa manam rurätsu, peru chikinqä kaqtam sïqa rurä. 16 Tsënö kaptimpis, mana munanqäta ruranqäqa, Ley alläpa alli kanqantam rikätsikun. 17 Tsëqa manam noqanatsu tsëkunata rurëkä, sinöqa noqachö këkaq jutsanam.*+ 18 Musyämi noqachöqa, awmi jutsasapa* ëtsächöqa ima allipis mana kanqanta. Tsëmi alli kaqta rurëta munaptïpis, tsëta ruranäpaq kallpä kantsu.+ 19 Munarpis manam alli kaqtaqa rurätsu, peru mana munarpis mana alli kaqtam sïqa rurä. 20 Mana munanqäta rurarqa, manam noqanatsu tsëta rurëkä, sinöqa noqachö këkaq jutsanam.*
21 Tsëmi kë ley noqachö cumplikanqanta cuentata qokü: alli kaqta rurëta munaptïmi, mana alli kaq noqachö këkan.+ 22 Shonqüchöqa Teyta Diospa leynimpitam alläpa kushikü,+ 23 peru cuerpüchöqa, pensënïchö këkaq leywan tsaränakoq juk ley kanqantam cuentata qokü,+ y cuerpüchö këkaq jutsapa* leyninmanmi prësutanö apaman.+ 24 ¡Alläpa llakipëpaqmi* këkä! ¿Piraq salvamanqa wanuyman o wañuyman chëkätsimaq cuerpupita? 25 ¡Teyta Diostam agradecikü! Pëmi Señornintsik Jesucristurëkur salvamanqa. Awmi, pensënïwanqa Diospa leynimpa sirweqninmi kä, peru cuerpüwanqa jutsapa* leynimpa sirweqninmi kä.+