Colosensis
2 Qamkunapa y Laodicëachö+ këkaqkunapa y mana rikämashqa kaqkunapa* biennimpaq imanö kallpachakuykanqäta cuentata qokuyänëkitam munä. 2 Tsëtaqa rurä shonquykikuna shoqashqa kanampaq,+ kuyakoq kayanqëkita rikätsikur juknölla kayänëkipaq+ y entiendiyanqëkipita següru kar imëka bendicionkunata* tariyänëkipaqmi, tsënöpa Teyta Diospa pakarëkaq sagrädu noticiampita, awmi, Cristupita alli musyayänëkipaq.+ 3 Pëchömi imëkata alli yachë y imëkata alli musyë, shumaq pakashqa këkan.+ 4 Tsëtaqa qamkunata niyaq* imëkata niyäshurniki mana engañayäshunëkipaqmi. 5 Qamkunawan mana këkarpis, pensënïchöqa* qamkunawanmi këkä, y imatapis shumaq ordenädu rurayanqëkita+ y Cristuman markäkuyanqëkichö o yärakuyanqëkichö alli këkäyanqëkita musyarmi+ kushishqa këkä.
6 Tsëmi Señor Cristu Jesusta chaskiyanqëkinölla, pë mandakunqannö imëpis kawayë, 7 y pë yachatsiyäshunqëkinölla pëman markäkuyanqëkichö o yärakuyanqëkichö,+ ruri ruriyaq watsiyoq o matsuyoq* fuerti+ y firmi këkaq qerunö kayë, tsënö alli markäkuyanqëkiqa Diosta agradecikuyanqëkichömi cläru rikäkunan.+
8 Cuidädu kayë kë munduchö nunakuna yachayanqanwan, y mana rasumpa kaqwan+ y mana imapaqpis väleqkunawan engañayäshurniki esclävutanö mana tikratsiyäshunëkipaq, tsëkunaqa nunakunapa costumbrinkunapita y pëkuna pensayanqampitam shamun, y manam Cristu yachatsikunqampitatsu. 9 Teyta Dios imëkachö alli* kanqanmi pëchöqa cläru rikakun.+ 10 Tsëmi përëkur qamkunatapis imëka wanayanqëkikuna* faltapuyäshunkitsu. Pëqa llapan gobiernukunapa y autoridäkunapa dirigeqninmi.*+ 11 Pëpa qateqnin karmi, qamkunapis nunakuna rurayanqannötsu, sinöqa jutsa* ruraq cuerpuykikuna munanqanta rurëta dejarnin+ Cristupa qateqninkuna rurayanqannö señalakuyarqunki.+ 12 Qamkunaqa pënö bautizakushqa karmi pëwan juntu pampashqa kayarqunki,+ y pëpa qateqninkuna karmi, wanunqampita kawatsikoq Teyta Diospa poderninman markäkur o yärakur pëwan juntu kawariyämurqunki.+
13 Manam tsëllatsu, mana allikunata rurar y cuerpuykikunachö mana señalakushqa kar wanushqanö këkäyaptikim, Teyta Diosqa Cristuwan juknölla kayänëkipaq kawayänëkita permitishqa.+ Pëqa llakipämarnintsikmi* llapan jutsantsikkunapita* perdonëkamarquntsik,+ 14 y contrantsikchö këkaq+ mandakunqankuna qellqaränan+ documentutam ushakätsishqa.+ Pëqa sufrimientu qeruman* clavarmi, tsë Leyta ushakätsishqa.+ 15 Tsëwanmi* gobiernukunata y autoridäkunata vencishqa, y guërrata ganar prësushqata procesionchö puritsirmi, llapankunapa jananchö penqakatsishqa.+
16 Tsëmi ama pï nunapis juzgayäshuytsu imata mikuyanqëkipita y upuyanqëkipita+ o watachö rurayanqan fiestata, llullu killata+ o säbaduta+ celebrayanqëkipita. 17 Tsëkunaqa shamoqpaq kaqkunatam rikätsikun,+ peru rasumpa kaqqa Cristum.+ 18 Ama permitiyëtsu humildi tukoqkuna y angelkunata adoraqkuna, premiuta chaskiyänëkipaq kaqta michäyäshunëkita.+ Tsë nunakunaqa imëkanöpa tsarakurmi* rikäyanqanta välitsiyan. Jutsasapa* nunakunanö pensarmi mana kaqpita allish tukuyan, 19 y manam peqanö o umanö kaqta qatiyantsu.+ Peqanö kaq wananqanta* mana faltatsiptinmi entëru cuerpuqa, moqukunawan y ankukunawan shumaq juknölla këkan, y Teyta Diospa poderninwanmi mas jatunyan.+
20 Cristuwan juntu wanur kë munduchö nunakuna imanö pensayanqanta dejashqana këkarqa,+ ¿imanirtan kë munduchö nunakunanöraq imatapis rurëkäyanki? ¿Imanirtan kënö mandakuyta cäsukur këkäyanki,+ 21 “ama tsarëtsu, ama probëtsu, ama yatëtsu”? 22 Tsënö nirqa utilizäyaptin ushakaq kaqkunapaqmi parlëkäyan. Tsëkunaqa nunakuna mandakuyanqan y yachatsikuyanqanmi kayan.+ 23 Tsë mandakuyanqanqa yachëyoqta tikratsikoqnömi kayan, peru manam jutsa* ruraq cuerpunkuna munanqanta tsaräyänampaq nunakunata yanapantsu. Tsëqa pasan nunakuna kikinkunalla Teyta Diosta imanö adorayänampaq kaqta decidiyaptin, ardëlla* humildi tukuyaptin y cuerpunkunata sufritsiyaptinmi.+