Hëchus
28 Llapäkuna salvakushqa këkarnam, tsë islapa jutin Malta kanqanta musyariyarqä.+ 2 Tsë islachö nunakunaqa,* noqakunawan alläpa allim* kayarqan. Tamyaptin y alalaptinmi, ninata tsaritsir shumaq chaskiyämarqan. 3 Peru juk mellqë rämata juntëkur Pablu ninaman jitëkuptinmi, ninapita venënuyoq culebra yarqamur makinta kanïkurqan. 4 Venënuyoq culebrata makinchö warkurëkaqta rikarnam, tsë islachö kawaq nunakunaqa kënö ninakuyarqan: “Kë nunaqa asesïnuchi, tsëchi lamarpita salvakushqa kaptimpis, Justiciaqa* kawananta dejashqatsu”. 5 Tsënö kaptimpis, makinta tapsiriptinmi culebraqa ninaman jeqarkurqan, y pëpaqa manam imampis imanarqantsu. 6 Pëkunaqa jakapäkunanta o illaqpita wanur ishkinantam shuyarëkäyarqan. Peru tiempu pasaptimpis, ima mana allipis pëta mana pasanqanta rikarmi, jukläyana pensar dios kanqanta nir qallëkuyarqan.
7 Tsë sitiupa amänunchömi, islachö gobernador nunapa chakrankuna kapurqan, y jutinqa Publium karqan. Pëmi shumaq chaskiyämar kima junaq posadatsiyämarqan. 8 Peru Publiupa papäninqa fiebriwan y yawarta ishpatsikoq qeshyawanmi* cämarëkarqan, tsënam Pabluqa pë këkanqanman yëkurqan, y Teyta Diosman mañakur makinta pëman churarmi alliyätsirqan.+ 9 Tsëta musyëkurnam islachö wakin qeshyëkaqkunapis Pablu kaqman ëwayarqan, y llapankunam alliyäyarqan.+ 10 Y agradecikurmi imëkata qarayämarqan, y barcuwan yarquyänäpaqna këkäyaptïmi, llapan wanayanqäkunata* alistayämurqan.
11 Tsë islachö kima killa kayanqampitanam, senqanchö “Zëuspa Tsurinkuna” neq barcuwan ëwar qallëkuyarqä. Tsë barcuqa Alejandrïa markapitam karqan, y tsë islachömi tamya witsanta pasashqa karqan. 12 Siracüsa markaman charnam, kima junaq tsëchö quedakuyarqä. 13 Tsëpita ëwakurnam Regiu markaman chäyarqä. Waränin junaqnam, sur lädupita shamoq vientu pükamur qallëkurqan, y waränin junaqnam Puteöli puertuman chäyarqä. 14 Tsëchömi wawqikunata y panikunata tariyarqä, y pëkunam qanchis junaq tsëchö quedakuyänäpaq rogayämarqan. Tsëpitanam Römata ëwakuyarqä. 15 Tsëchö wawqikuna y panikuna noqakunapita musyëkurqa, Rantikuyänan Apiu Pampayaq y Kima Posädakunayaqmi taripäyämaq shayämurqan. Pëkunata rikëkurnam Pabluqa Diosta agradecikurqan, y mas kallpayoq tikrarqan.+ 16 Römaman chäriyaptïqa, Pablu japallan posadakunantam permitiyarqan, y juk soldädum täpar këkarqan.
17 Tsënö kaptimpis, kima junaq pasariptinmi, mas reqishqa judïu nunakunata qayatsirqan. Llapankuna juntakäriyaptinnam pëqa kënö nirqan: “Wawqikuna, markantsikchö nunakunapa y unë kastantsikkunapa costumbrinkunapa contran imatapis mana rurëkaptïmi,+ romänu nunakunaman Jerusalenchö prësu entregayämashqa.+ 18 Pëkunaqa alli tapupëkamarmi,+ wanutsishqa kanäpaqnöqa noqachö imatapis mana tarir, libri dejamëta munayarqan.+ 19 Tsënö kaptimpis, judïukuna mana acuerdu kayaptinmi, Römata gobernaq cäsüta rikänampaq mañakurqä,+ peru manam nacionnïta imapitapis acusëta munartsu. 20 Tsëmi Israel nunakuna shuyarëkäyanqanrëkur kë cadënakunayoq kar qamkunata rikëta y qamkunawan parlëta munarqö”.+ 21 Tsënam pëkunaqa kënö niyarqan: “Qampaq parlaqtaqa manam ima cartatapis Judëa provinciapita chaskiyarqötsu, y tsëpita shamoq wawqikunapis manam qampaqqa willayämashqatsu ni ima mana allitapis parlayashqatsu. 22 Peru noqakunapaqqa allim kashqa pensanqëkita kikiki willayämanqëki. Noqakunaqa musyayämi tsë këkanqëki sectapaq+ entëruchö mana allita parlayanqanta”.+
23 Tsënam pëkunaqa juk junaq Pabluwan juntakäyänampaq patsätsiyarqan, y mas atskaq nunakunam pë posadakunqan wayiman ëwayarqan. Y pëqa patsa waranqampita tardiyanqanyaqmi, Moises qellqanqan Leywan+ y Diospa Willakoqninkuna Qellqayanqanwan+ Jesusman creitsita munar,+ Diospa Gobiernumpita llapanta yachatsir tsë asuntuta shumaq entienditsirqan. 24 Wakinqa pë ninqantam creiyarqan, peru wakinqa manam. 25 Kikinkunapura mana acuerdu karnam ëwakur qallëkuyarqan. Tsënam Pabluqa kënöllana nirqan:
“Rasunllatam Diospa willakoqnin Isaïasqa santu espïritu yanapaptin unë kastëkikunata parlaparqan 26 kënö nir: ‘Kë markachö nunakunaman ëwar këta ninki: “Qamkunaqa wiyarnimpis manam entiendiyankitsu, y rikarnimpis manam imatapis yachakuyankitsu.+ 27 Kë markachö nunakunaqa shonqunkunatam chukruyätsiyashqa. Tsë nunakunaqa mana wiyayänampaq ni rikäyänampaq, shonqunkuna mana entiendikoq kanampaq, Diosman mana kutiyänampaq y alliyätsishqa mana kayänampaqmi, rinrinkunata tsapakurkuyashqa y nawinkunata wichqakurkuyashqa”’.+ 28 Tsëmi musyayë Teyta Dios salvacionta imanö apamunqanta, juk nacion nunakunachö willakushqa kayanqanta.+ Pëkunam sï wiyakuyanqa”.+ 29 *
30 Tsëmi pëqa ishkë wata entëru alquilashqa wayinchö quedakurqan,+ y llapan watukaq ëwaqkunata kushishqa chaskirmi, 31 Diospa Gobiernumpita willaq y mana mantsakur* Señor Jesucristupita yachatseq+ y manam ni pï ni ima michaqtsu.