Mateu
3 Tsë witsankunam Bautizakoq Juanqa+ Judëa provinciapa tsunyaq sitiunkunachö* willakur këkarqan.+ 2 Kënömi neq: “Arrepentikuyë, ciëluchö Gobiernuqa këllachönam këkan”.+ 3 Pëpaqmi Diospa willakoqnin Isaïas kënö willakurqan:+ “Tsunyaq sitiuchömi juk nuna fuertipa kënö nikan: ‘¡Teyta Jehoväpaq* nänita alistayë! Pëpaq derëchu nänita rurayë’”.+ 4 Juanpa röpanqa camëllupa millwampitam karqan, y wachakannam qarapita karqan.+ Chukllushkunata* y jirka abëjapa mielnintam mikoq.+ 5 Jerusalenpita, entëru Judëa provinciapita y Jordan mayu kuchunchö llapan markakunapitam pëman ëwayaq,+ 6 y Jordan mayuchömi Juanqa pëkunata bautizarqan,+ y llapankunapa puntanchömi pëkunaqa jutsata* rurayanqanta willakuyaq.
7 Bauticëkanqan sitiuman atskaq fariseukuna y saduceukuna shamuykaqta rikëkurnam,+ pëkunata kënö nirqan: “Venënuyoq culebrapa wawankuna,+ ¿imanirtan këchö këkäyanki? ¿Teyta Dios cöleranqan junaq salvakuyänëkipaq kaqtaku pensayanki?+ 8 Puntataqa arrepentikushqa kayanqëkita imanö portakuyanqëkichö rikätsikuyë. 9 Ama shonquykikunachö, ‘noqakunaqa Abrahanpa kastankunam kayä’+ niyëtsu. Teyta Diosqa, kë rumikunapitapis Abrahanpa kastankuna kananta permitinmanmi. 10 Jatusaq plantakunata watsimpita o matsumpita* walluyänampaqmi hächaqa listuna këkan, y mana allita wayoq plantakunataqa wallurmi ninaman jitarkuyanqa.+ 11 Arrepentikuyaptikim noqaqa yakuchö bautizayaq,+ peru qepäta shamoqqa noqapitapis mas puëdeqmi, y noqalläqa manam llanqinllatapis jipitsita puëdillätsu.+ Pëqa santu espïrituwan+ y ninawanmi bautizayäshunki.+ 12 Jorkitanqa makinchönam këkan, y ërantam pasëpa* pitsanqa. Trïguntaqa gränukunata churakunanmanmi guardanqa, peru päjantaqa upitsita* mana puëdiyanqan ninawanmi ushakätsinqa”.+
13 Tsënam Jordan mayuchö Juan bautizanampaq, Galilëa provinciaman Jesus ëwarqan.+ 14 Peru Juanqa kënö nirmi michëta munarqan: “Noqam bautizamänëkitaqa wanä,* tsëqa, ¿imanöparaq qamta bautizaqman?”. 15 Tsënam Jesusqa kënö nirqan: “Kananlla tsënö katsun, tsënö ruranqantsikmi Teyta Dios munanqan rurakänampaq yanapakunqa”.* Tsënö niptinmi Juanqa imapis nirqannatsu. 16 Bautizakunqan yakupita Jesus yarqëkämuptinmi ciëlu kichakärirqan,+ y pëqa* Diospa santu espïrituntam paluma niraqta Jesuspa jananman shamuykaqta rikarqan.+ 17 Tsënam Teyta Diosqa ciëlupita kënö nirqan:+ “Këmi kuyë Tsurï,+ pëpaqmi alläpa kushikü”.+