Santiägu
1 Teyta Diospa y Señor Jesucristupa sirweqnin Santiägupita,+ wakchö këchö këkaq döci kastakunapaq:
¡Salüdüta chaskiyë!
2 Wawqilläkuna y panilläkuna, imëka mana allikunapa* pasarqa, llapan shonquykikunawan kushikuyë.+ 3 Qamkunaqa musyayankim markäkuyanqëki o yärakuyanqëki probashqa* kanqanqa, alli tsarakuyänëkipaq yanapayäshunqëkita.+ 4 Peru alli tsarakuyanqëkiqa logranampaq kaqta logratsun, tsënöpa llapanchö complëtu y alli kayänëkipaq, y imachöpis mana pishipäyänëkipaq.+
5 Tsëmi qamkunachö pipapis yachënin pishiptinqa, Teyta Diosta kutin kutin mañakutsun,+ y chaskinqam.+ Pëqa llapankunatam mana medipashpa qaran, y manam qarakunqampita imatapis nikuntsu.*+ 6 Peru mañakurqa, Teyta Diosman markäkur o yärakur+ y mana dudar mañakutsun. Dudar këkaq nunaqa,+ vientu laqcheqsätsir wakman këman apanqan lamar yakunömi. 7 Rasumpa kaqchöqa, tsë nunaqa manam shuyaranmantsu Teyta Jehoväpita* imallatapis chaskita. 8 Pëqa imatapis mana churapakaq+ y imachöpis cambiarëkaq nunam.
9 Peru humildi wawqiqa o paniqa alläpa väleqta logranqampita kushikutsun,*+ 10 y rïcu kaqna humildi këta yachakunqampita.+ Rïcu nunaqa chakra wëtanömi ushakanqa. 11 Inti o rupay yarqamurqa achacharmi plantata tsakiratsin, y wëtan shikwariptinmi shumaq kanqan ushakärin. Tsënöllam rïcu nunapis, imëkayoq këta ashikar ushakanqa.+
12 Kushikutsun mana allikunata pasar alli tsarakuykaq nuna.+ Pëqa Teyta Diospa rikëninchö alli karmi, mana dejëpa kuyaqninkunata Teyta Jehovä* äninqan kawë+ premiuta* chaskinqa.+ 13 Mana allikunapa pasarqa, ama pï nunapis “Diosmi probëkäman” nitsuntsu. Mana allikunawanqa manam pï nunapis Teyta Diosta probëta puëdintsu, y manam pëpis mana allikunawanqa pitapis probantsu. 14 Sinöqa cada ünum munënin tentaptin y shonqunman chaptin* pruëbata pasan.+ 15 Tsënam munanqan mas fuerti tikrar jutsa* rurëman chätsin, y jutsata rurënam wanuyman o wañuyman chätsin.+
16 Ama engañakuyëtsu, kuyë wawqikuna y panikuna. 17 Llapan alli qarëkuna y imëka allikunaqa, ciëluchö aktsikunata* Kamaq,*+ ciëluchö këkaq Diospitam shamun.+ Pëqa manam cambiantsu ni jukläyatsu tikran, imëka cambiarëkaq wäninö o llantunö.+ 18 Pëqa kamanqankunapita mas punta kaq kanapaqmi,+ palabran rasumpa kanqanta creikushqa, kikin munar yurinantsikta permitirqan.+
19 Kuyë wawqikuna y panikuna, këta musyayänëkitam munä: llapëkim pitapis ras o sas wiyayänëki,*+ peru manam rasllaqa parlayänëkitsu ni cölerakuyänëkitsu.+ 20 Cölerakoq nunaqa, manam Teyta Diospa rikëninchö alli kaqta rurantsu.+ 21 Tsëmi imapis mana limpiu kaqta y imapis mana alli kaqtaqa* qamkunapita ushakätsiyë,+ y humildi karnin salvakuyänëkipaq yanapayäshuynikita puëdeq palabrata, Teyta Dios shonquykikunachö patsakätsinanta dejayë.
22 Tsënö kaptimpis, Teyta Diospa palabranta cäsukuyë,+ y ama mana allita pensar kikikikunata engañakurqa wiyakoqlla kayëtsu. 23 Pï nunapis Diospa palabranta wiyëkar mana cäsukurqa,+ espëjuchö cäranta rikakoq nunanömi. 24 Tsë nunaqa rikäkurirmi ëwakun, y jinan höram imanö nuna kanqanta qonqëkun. 25 Peru libri këta apamoq y imëkachö yanapakoq leyta shumaq rikëkur,+ imëpis ninqannö ruraqqa, manam wiyanqanta qonqareqtsu tikrashqa, sinöqa yachakunqannö ruraqmi, y imata rurarpis kushishqam kanqa.+
26 Teyta Diosta adorëkanqanta* pensarpis, qallunta controlëta* mana yachaq nunaqa,+ kikimpa shonquntam engañëkan, y Diosta sirwinqampis manam imapaq välintsu. 27 Diosnintsikpa y Teytantsikpa rikëninchö alli y limpiu adoracionqa* këmi: sufrimientukunapa pasayaptin+ teytannaq kaqkunata+ y viudakunata cuidë,+ y kë munduchö nunakunanö mana portakuymi.+