1 Samuel
16 Tiempu pasariptinnam Jehovä Diosqa Samuelta nirqan: “¿Imëyaqtan Saulpaq llakishqa kakunki?+ Mananam israelïtakunata Saul gobernananta munänatsu.+ Waqraman aceitita+ winarkur Belen markachö Jesë+ kaqta ëwë. Jesëpa juk tsurintam gobernanti kanampaq akrarqö”.+ 2 Tsënam Samuelqa nirqan: “¡Kananqa imanöraq kalläshaq! Saul musyëkurqa wanuykatsimanqachi”.+ Tsënö niptinmi Jehovä Diosqa nirqan: “Malta wäkata aparkur ëwë y chärirqa, ‘Jehoväpaq pishtashqa animalta rupatsinäpaqmi shamurqö’ ninki. 3 Pishtashqa animalta rupatsiyänëkipaqmi Jesëta qayanëki, y tsëpitanam imata ruranëkipaq kaqtapis nishqëki. Noqa rikätsinqaq nunapa peqanman o umanmam aceitita jichanëki, pëmi gobernanti kanqa”.+
4 Tsënam Samuelqa Jehovä Dios ninqannö Belen+ markata ëwarqan. Chäriptinnam tsë markachö dirigeqkunaqa rikëkurnin alläpa mantsakar, “¿imatan pasakuykushqa?” nir tapuyarqan. 5 Samuelnam nirqan: “Manam imapis pasakushqatsu. Teyta Jehoväpaq pishtashqa animalta rupatsinäpaqmi shamurqö. Tsëmi qamkunapis alistakurir* shayämunëki”. Tsënam Jesëtawan tsurinkunata alistaratsirnin,* pishtashqa animalta rupatsinampaq kaqman pusharqan. 6 Chäriyaptinnam, Samuelqa Eliabta+ rikëkur, “Teyta Jehoväqa pëtachi gobernanti kanampaq churanqa” nir pensarqan. 7 Jehovänam Samuelta kënö nirqan: “Ama jatun y shumaq kënintaqa rikëtsu,+ manam pëtatsu akrarqö. Noqa Jehoväqa, manam nuna rikanqanllatatsu rikä. Nunaqa nawin rikanqanllatam rikan, peru noqaqa shonqun imanö kanqantam rikä”.+ 8 Tsëpitanam Jesëqa tsurin Abinadabta+ qayarqan, y Samuel rikëkurnam nirqan: “Jehovä Diosqa manam pëtatsu gobernanti kanampaq akrashqa”. 9 Tsënam Jesëqa tsurin Samäta+ qayarqan, y Samuel rikëkurnam nirqan: “Jehovä Diosqa manam pëtapis akrashqatsu gobernanti kanampaq”. 10 Tsënömi Jesëqa qanchis tsurinkunata qayatsirqan, y Samuelqa pëkunata rikëkurmi nirqan: “Jehovä Diosqa manam mëqantapis akrashqatsu gobernanti kanampaq”.
11 Tsëpitanam Samuelqa Jesëta kënö tapurqan: “¿Pëkunallaku llapan tsurikikuna kayan?”. Y pënam, “manam, ultimu kaqqa+ üshakunata+ mitsikurmi këkan” nirqan. Tsënam Samuelqa Jesëta nirqan: “Jinan höra qayatsimuy, pë mana chämuptinqa manam mikushuntsu”. 12 Tsëmi Jesëqa wamranta qayatsimurqan. Tsë wamraqa shumaq nawiyoq y alläpa shumaqllanmi karqan.+ Jehovä Diosnam Samuelta kënö nirqan: “¡Pëmi! Pëtam akrarqö markäta gobernanampaq”.+ 13 Tsëmi Samuelqa, Davidpa peqanman o umanman aceitita+ jicharqan wawqinkuna rikëkäyaptin. Tsë junaqpitam Teyta Jehoväqa Davidta poderninwan yanapar qallëkurqan.+ Tsëpitanam Samuelqa Ramä+ markanta kutikurqan.
14 Saultaqa+ manam Jehovä Dios poderninwan yanaparqannatsu. Jehovämi permitirqan mana allikunata pensanampaq* y mantsakashqalla kanampaq.+ 15 Tsënam sirweqninkunaqa Saulta kënö niyarqan: “Clärum këkan, Teyta Diosmi permitishqa mana allikunata pensar* mantsakashqalla kanëkita. 16 Teytallë këchö këkaq wakin sirwishoqnikikunata nï, arpata alli toquëta yachaq nunata+ ashiyämunampaq. Tsënöpa tsë mana alli pensëkuna chämuptinqa, arpata tocamuptin mas allina sientikunëkipaq”. 17 Tsënam Saulqa sirweqninkunata nirqan: “Arpa toquëta yachaq nunata ashïkayämuy y këman apëkayämuy”.
18 Juk sirweqninnam nirqan: “Belenchö täkoq* Jesëpa tsurinmi arpataqa alli tocan y shumaqllan wamram. Pëqa allim parlan, pelyëtapis allim yachan+ y valientim.+ Pëtaqa Jehovä Diosmi yanapëkan”.+ 19 Tsëmi Saulqa willakoqninkunata Jesë kaqman mandarqan kënö niyänampaq: “Üsha mitseq wamrëki Davidta mandëkamuy”.+ 20 Tsënam Jesëqa juk ashnuman cargarqan tantata, qara poronguwan vïnuta y malta cabrata. Tsëkunatam tsurin Davidwan Saulpaq apatsirqan. 21 Tsënömi Davidqa Saul kaqman ëwar sirweqnin tikrarqan.+ Saulqa wamrantanömi Davidta kuyarqan, tsëmi espädanta y lanzanta puritsinampaq churarqan. 22 Tsëpitanam Saulqa Jesëman kënö willakatsirqan: “Alläpa kushishqam këkä wamrëki David ruranqanwan, tsëmi sirwimarnï sïguillänanta munä”. 23 Saulman mana alli pensëkuna* chanqan höram Davidqa arpata tocaq. Tsënam Saulqa mas allina sientikoq y mana alli pensëkunatam qonqareq.+