Jeremïas
20 Imerpa tsurin sacerdöti Pasjurmi, Jeremïas llapan willakuykanqanta wiyëkarqan. Pasjurqa, Teyta Jehoväpa wayinta rikaqkunata mandaqmi karqan. 2 Tsënam Pasjurqa Jeremïasta maqakacharkur, uchkukunayoq tablaman* chakinta, makinta y peqanta o umanta amutsirqan.+ Tsëtaqa rurarqan, Teyta Jehoväpa wayinchö Benjaminpa Jana Punkun nir reqiyanqanchömi. 3 Waränin junaq Jeremïasta Pasjur libri dejariptinnam, Jeremïasqa kënö nirqan:
“Teyta Jehovämi jutikita cambiashqa. Mananam Pasjurnatsu jutiki kanqa, sinöqa Mëtsëpita Mantsakëta Apamoq nirnam reqiyäshunki.+ 4 Teyta Jehovämi këta nin: ‘Pasashunqëkita rikarmi, qam y amïguykikunapis alläpa mantsakäyanki. Rikëkaptikim amïguykikunata chikishoqnikikuna espädawan wanutsiyanqa,+ y Judächö llapan nunakunatam Babiloniachö gobernaqpa makinman entregashaq. Pëqa wakintam espädawan wanutsinqa, y wakintanam Babiloniaman apakunqa.+ 5 Y kë markachö imëkakunata, imëka kapuyäshunqëkita, väleq cösasnikikunata y Judächö gobernaqkunapa imëkankunatam chikiyäshoqnikikunata entregashaq.+ Pëkunaqa imëkëkikunata duëñutsakurmi Babiloniaman apakuyanqa.+ 6 Qamtapis Pasjur, wayikichö kawaqkunatawanmi Babiloniaman apayäshunki. Mana rasumpa kaqta willakunqëkipitam, wanuyaptikiqa qamta y amïguykikunatapis Babiloniachö pampayäshunki’”.+
7 Juknöpa pensëkaptïmi Teyta Jehovä,
qamnö pensanäpaq imëkata rurarqunki.
Noqapita mas kallpayoq këkanqëkita rikätsikurmi vencimarqunki.+
Kananqa entëru junaqmi noqapita asikuyan,
llapan nunakunam noqapita burlakuyan.+
8 Imatapis parlarqa, “¡nunakunatam sufritsiyan y ushakätsiyan!” nirmi fuertipa willakunä.
Teyta Jehovä nimanqampita willakuptïmi nunakunaqa insultayäman
y entëru junaq noqapita burlakuyan.+
Peru nimanqëkikunaqa
tullü rurinchö rupëkaq ninanömi shonqüchö karqan,
y manam aguantëta ni upälla këta puëdirqätsu.+
10 Noqapaq mana allikunata parlayanqanta wiyarmi
alläpa mantsakarqä.+
Pëkunaqa, “pëpa contran churakäshun.
Llapantsik contran parlashun” nirmi imëpis këkäyan.
Noqawan yamë këta asheqkunapis, ima mana allitapis ruranäta munarmi kënö nir këkäyan:+
“Imallachöpis pantariptinqa tsëta provecharmi pëpita vengakushun”.
11 Peru Teyta Jehoväqa, alläpa puëdeq y mantsëpaq soldädunömi noqawan këkarqan.+
Tsëmi mana allita ruramëta munaqkunapis, ishkir ushayanqa y manam venciyämanqatsu.+
Imapis munayanqannö mana yarquptinmi penqakuychö ushayanqa.
Penqakuychö ushayanqanqa, manam imëpis qonqashqatsu kanqa.+
12 Peru qamqa angelkunata mandaq Teyta Jehovä, allita ruraq nunakuna rurëkäyanqantam rikëkanki.
Imata pensayanqanta y shonqunkunachö imanö kayanqantam* musyanki.+
Juiciuchö defendimänëkipaqmi qamman confiakamü.+
Pëkunata imanö castiganëkipaq kaqta rikänäta permitïkullë.+
13 ¡Teyta Jehoväpaq cantayë! ¡Teyta Jehoväta alabayë!
Pëqa mana alli nunapa makimpitam waktsakunata salvashqa.
14 ¡Ojalä yurïmantsu karqan!
¡Ojalä mamänï wachamanmantsu karqan!+
15 Papänïta kushitsir,
“¡ollqu tsurikim yurishqa!” nir
willaq nunapis maldicishqa katsun.
16 Teyta Jehovä mana llakipashpa* ushakätsinqan markakunanö tsë nuna katsun.
Patsa warë büllayanqanta wiyatsun
y pullan junaqna guërrapaq willakuyanqanta wiyatsun.
17 ¿Imanirtan mamäpa pachanllachöraq këkaptï wanutsiyämarqantsu?
Tsëqa mamäpa pachanchi sepultürä kanman karqan,
y mamäpa pachanchöchi imëpis këkäman karqan.+