Exodu
17 Tsëpitanam israelïtakunaqa Sin nir reqiyanqan tsunyaq sitiupita+ ëwakuyarqan, y Teyta Jehovä ninqanta cäsukurmi jamar jamar Refidim+ sitiuman chäyarqan.+ Tsëchömi israelïtakunaqa carpankunata* armayarqan, peru manam upuyänampaq yaku karqantsu.
2 Tsënam israelïtakunaqa, “¡upuyänäpaqmi yakuta munayä!” nirnin Moisesta reclamayarqan.+ Tsënam Moisesqa nirqan: “¿Imanirtaq noqata reclamayämanki? ¿Imanirtaq Teyta Jehoväta pruëbaman churayanki?”.+ 3 Tsënö kaptimpis, israelïtakunaqa alläpa yakunarmi Moisesta kënö reclamayarqan:+ “¿Imanirtaq Egiptupita pushayämarqunki? ¿Kë tsunyaq sitiuchö wamräkuna, animalnïkuna y kikïkunapis yakunëpita wanuyänäpaqku o wañuyänäpaqku?” 4 Tsënam Moisesqa Teyta Jehoväta rogakur nirqan: “¿Imatataq kë israelïtakunawan rurashaq? Rumiwampis wanuykatsiyämanqachi o wañuykatsiyämanqachi”.
5 Tsënam Teyta Jehoväqa Moisesta nirqan: “Nïlu mayuta* wirunqëki tukruta aparkur+ y israelïtakunapa wakin dirigeqninkunata pusharkur llapankunapa puntanta ëwë. 6 Horebchö këkaq qaqa jananchömi noqa këkäshaq, y tsë qaqata wiruptikim israelïtakuna upuyänampaq yaku yarqamunqa”.+ Y Moisesqa israelïtakunapa dirigeqninkuna rikëkäyaptinmi Teyta Dios ninqannölla rurarqan. 7 Tsëpitanam Moisesqa Masä*+ y Meribä*+ nir tsë sitiupa jutin churarqan. Tsënöqa churarqan, “¿Teyta Jehoväqa noqantsikwan këkanku o manaku?” nirnin israelïtakuna reclamashqa kayaptin y Teyta Jehoväman mana confiakushqa kayaptinmi.+
8 Israelïtakuna Refidim sitiuchö këkäyaptinmi amalequïtakunaqa+ pelyata ashir chäyarqan.+ 9 Tsënam Moisesqa Josuëta nirqan:+ “Wakin ollqu kaqkunata pusharkur amalequïtakunawan pelyaq ëwë. Y noqanam Dios Yaya puritsinäpaq nimanqan tukruta aparkur jirkaman warë witsämushaq”. 10 Tsënam Josuëqa Moises ninqannölla+ amalequïtakunawan pelyaq ëwarqan. Y Hur, Aaron y Moisesnam+ jirkaman witsäyarqan.
11 Moises rikranta pallariraptinqa,* israelïtakunam pelyachö ganayaq; peru rikran ishkikaptinqa, amalequïtakunam ganar qallëkuyaq. 12 Tsëmi Moisespa rikran ishkikaptin, jamakunampaq rumin churapuyarqan. Y inti o rupay jeqanqanyaqmi Hurwan Aaronqa cada läduchö Moisespa rikranta pallarirar* yanapayarqan. 13 Tsënö rurayanqampitam Josuëqa llapan amalequïtakunata vencirqan.+
14 Tsëpitanam Teyta Jehoväqa Moisesta nirqan: “Kanan pasakunqanta mana qonqayänampaq libruman qellqë, y kë ninqaqta Josuëta cläru willë: ‘Amalequïtakunatam llapanta ushakätsishaq, y manam ni pï pëkunata yarpanqanatsu’”.+ 15 Tsëpitanam Moisesqa altarta rurëkur Jehovä Nisï* nirnin jutin churarqan, 16 y kënömi nirqan: “Teyta Jehoväpa* gobiernumpa contran churakäyanqampitam,+ Teyta Jehoväqa amalequïta nunakunawan y tsëpita yureq kastankunawan imëpis pelyanqa”.+