Apocalipsis
20 Tsënam juk angelta rikarqä mankarëkaq uchkupa llävinta+ y jatun cadënata tsarashqa ciëlupita urëkämoqta. 2 Mantsëpaq jatun culebrata,+ awmi, Diablu+ y Satanas+ unë kaq culebrata prësurkurmi,+ mil watapa watëkurqan. 3 Y mankarëkaq uchkuman jitarkurmi wichqarkurqan,+ y mil watakuna ushanqanyaq nacionkunata yapë mana engañanampaqmi* yëkunanta sellarkurqan. Tsëpitanam wallka tiempullapa libri kanqa.+
4 Gobernar täkuyänantam rikarqä, y tsëkunachö jamakoqkunaqa juzgayänampaqmi autoridäta chaskiyarqan. Awmi, Jesuspita willakuyanqanrëkur y Diospita parlayanqanrëkur wanutsiyanqan* nunakunapa yawarnintam* rikarqä. Pëkunaqa manam mantsëpaq chukaru animalta ni tsë animal niraq santuta adorashqatsu kayarqan, y manam urkunkunachö ni makinkunachöpis marcata chaskishqatsu kayarqan.+ Pëkunaqa yapëmi kawayämurqan, y mil watapam Cristuwan gobernayarqan.+ 5 Tsëmi puntata kawariyämunqan.+ Wakin wanushqakunaqa+ manam mil watakuna ushanqanyaq kawariyämurqantsu. 6 Puntata kawariyämunqanchö kawarimoqkunaqa kushishqa y limpium kayan;+ ishkë kaq wanuyqa+ manam pëkunata vencita puëdintsu.+ Pëkunaqa Teyta Diospa y Cristupa sacerdötinkunam kayanqa,+ y pëwanmi mil watapa gobernayanqa.+
7 Peru mil watakuna ushariptinmi, prësurëkanqampita Satanas libri yarqunqa, 8 y guërrapaq juntakäyänampaqmi, patsapa chuskun esquïnanchö këkaq nacionkunata, awmi, Gogta y Magogta engañaq yarqunqa. Pëkunaqa lamar kuchunchö arënanömi kayan. 9 Y entëru patsapam ëwayarqan, y limpiu nunakuna këkäyanqan campamentupa y kuyë markapa entëru lädunmanmi churakäyarqan. Peru ciëlupita nina urämurmi pëkunata ushakäratsirqan.+ 10 Pëkunata engañar këkaq Diablutanam, mantsëpaq chukaru animal y Diospa willakoqnin tukoq këkäyanqan,+ ninawan azufri kanqan qochaman jitarkuyarqan.+ Tsëchömi pëkunaqa paqasta junaqta imëyaqpis prësuräyanqa.*
11 Yuraq jatun gobernar täkunata y tsëchö jamarëkaqtam rikarqä.+ Patsapis ciëlupis pëpa puntampitam qeshpir ëwakuyarqan,+ y manam ni pï yapë rikarqannatsu. 12 Y wanushqa lluta nunakunata y alli carguyoq nunakunatam rikarqä, gobernar täkunapa puntachö shëkaqta,* y röllukunatam kichayarqan. Tsë höram juk rölluta kichayarqan: pikuna kawayänampaq kaqta rikätsikoq rölluta.+ Y röllukunachö ninqannömi wanushqakunaqa rurayanqanmannö juzgashqa kayarqan.+ 13 Lamarmi pëchö wanushqakunata o wañushqakunata entregarqan, y wanuywan Sepultüranam* pëkunachö këkaq wanushqakunata entregayarqan. Y cada ünum rurayanqanmannö juzgashqa kayarqan.+ 14 Wanuytawan Sepultüratanam* nina qochaman jitarkuyarqan.+ Nina qochaqa ishkë kaq wanuytam rikätsikun.+ 15 Manam tsëllatsu, pikuna kawayänampaq kaqta rikätsikoq libruchö jutinkuna mana kaqkunaqa,+ nina qochamanmi jitashqa kayarqan.+