1 Crönicas
22 Tsënam David kënö nirqan: “Këchömi Jehovä Diospaq templupis y altarpis kanqa. Këchömi israelïtakuna qarëkunata rupatsiyanqa”.+
2 Tsëpitanam Davidqa entëru Israelchö täkoq* forastëru nunakunata+ qayëkatsir Teyta Diospa+ templumpaq rumikunata roquyänampaq y llaqllayänampaq churarqan. 3 Y punkukunapaq clävukunata y bisagrakunata rurayänampaqmi mëtsika fiërruta alistatsirqan. Tsënöllam mana pesashpa mëtsika cobrita alistatsirqan,+ 4 y mëtsika cedru qerutapis+ alistatsirqanmi. Tsë qerukunataqa Sidonchö+ y Tïruchö+ täkoq* nunakunam Davidpaq mëtsikata apayämurqan. 5 Davidqa kënömi nirqan: “Tsurï Salomonqa wamrallaran y manam ima rurëtapis yachanraqtsu.+ Tsëmi imëkatapis listullatana dejashaq. Jehovä Diospaq ruratsinqan templuqa jatun+ y shumaqmi kanqa,+ y mëtsë nacionchö nunakunam tsë templuta reqiyanqa”.+ Tsënö nirmi Davidqa manaraq wanukur imëkakunata alistatsirqan.
6 Tsëpitanam tsurin Salomonta qayëkur mandarqan, Israelpa Diosnin Jehoväpaq templuta ruranampaq. 7 Salomontam kënö nirqan: “Jehovä Diospa+ jutimpa reqishqa kanampaqmi, juk templuta rurëta munarqä. 8 Peru Jehovä Diosmi kënö nimarqan: ‘Qamqa guërrakunachö pelyarmi mëtsika nunata wanutsirqunki. Tsëmi qamqa mëtsika nunata wanutsishqa karnin, jutïpa reqishqa kanampaq templuta ruramunkitsu.+ 9 Peru juk tsurikim yurikunqa,+ y pëwanqa manam chikeqninkuna pelyayanqatsu.+ Jutinqa Salomonmi+ kanqa. Pë kawanqan witsanqa israelïtakuna kushishqa y tranquïlum kawakuyanqa.+ 10 Tsë tsurikim jutïpa reqishqa kanampaq templutaqa ruramunqa.+ Pëqa tsurïnömi kanqa y noqanam papäninnö kashaq.+ Y Israelchö imëyaqpis gobernanantam permitishaq’.+
11 Hïju, imëpis alli kanëkipaq Jehovä Dios yanapëkushuy. Jehoväqa templunta qam ruranëkipaqmi nishqa, y ninqannö rurëkatsinki.+ 12 Tsënölla Israelchö gobernanti tikraptiki alli yachaq y entiendeq kanëkipaq+ Teyta Jehovä yanapëkushuy, tsënöpa Jehovä Dios mandakunqankunata cäsukunëkipaq.+ 13 Jehovä Dios mandaptin israelïtakunata Moises entreganqan mandamientunkunata y ninqankunata cäsukurqa+ allim kanki.+ Allim tsarakunëki, valientim kanëki y manam mantsapakunëkitsu.+ 14 Rikanqëkinöpis Jehovä Diospa templunta ruratsinëkipaqmi alistatsirqö tres millon cuatrocientus veinti mil kïlus* öruta y treinta y cuatru millon doscientus mil kïlus* pläta metalta. Cobritapis, fiërrutapis+ pesëta mana puëdipaqtam mëtsikata alistatsirqö. Tsënöllam alistatsirqö mëtsika qeruta y rumitapis.+ Qamnam mastaqa alistanki. 15 Ruratsinëkipaqqa mëtsika trabajaqkunam kayan. Rumi llaqllaqkuna, albañilkuna,+ carpintërukuna y imëka rurëta yachaqkunapis kayanmi.+ 16 Mëtsikam örupis, pläta metalpis, cobripis y fiërrupis kan, mëtsika kaptinmi pesayashqanatsu.+ Jehovä Diosmi yanapëkäshunki,+ tsëmi ruratsir qallanëkina”.
17 Tsëpitanam Davidqa tsurin Salomonta yanapayänampaq Israelchö mandakoqkunata kënö nirqan: 18 “Teyta Jehovä yanapamashqam llapantsikpis kananqa allina kawakuntsik. Pëmi yanapamarqan kë markakunachö nunakunata vencinäpaq, tsëmi Jehovä Diospa y markampa poderninchöna këkäyan. 19 Kananqa llapan shonquykikunawan y llapan kawënikikunawan* Jehovä Diosllata+ sirwiyänëki.+ Jinan höra templutapis Jehoväpaq rurar qallayë.+ Y rurar ushaskirna Jehoväpa Sagrädu Cäjanta y tsëchö utilizäyanqan sagrädu cösaskunata+ Teyta Jehoväpa templunman churayanki”.