1 Rëyes

11 Salomonpaqa manam faraonpa wamranllatsu+ warmin karqan. Pëqa juk nacionkunapita mas warmikunatam kuyarqan,+ tsëmi moabïta warmikunata,+ ammonïta warmikunata,+ edomïta warmikunata, sidonia warmikunata+ y hitïta warmikunatapis+ warmin kayänampaq ashirqan. 2 Tsë nacionkunachö nunakunapaqmi Jehovä Diosqa israelïtakunata kënö nishqa karqan: “Ama imanöpapis pëkunawanqa casakuyankitsu, ni pëkuna shayämunantapis permitiyankitsu. Juntakarninqa pëkunanöllam santunkunata adorar qallëkuyanki”.+ Tsënö nishqa këkaptimpis, Salomonqa manam cäsukurqantsu y pëkunatam* kuyakurkurqan. 3 Salomonpaqa setecientusmi legïtimu warminkuna karqan y sirweqnin warminkunapis* trescientusmi kayarqan. Tsë warmikunam Salomontaqa ichikllapa ichikllapa jutsa* rurëman chätsiyarqan. 4 Tsë warmikunata cäsurmi Salomonqa awkinna këkar+ santukunata adorar qallëkurqan.+ Y manam papänin Davidnötsu Jehovä Diosta llapan shonqunwan sirwirqan. 5 Salomonqa sidoniukuna adorayanqan Astoret* santuta,+ y ammonïtakuna adorayanqan melanëpaq Milcom santutam+ adorarqan. 6 Pëqa manam papänin Davidnötsu+ Jehovä Diosta cäsukurqan, tsëpa rantinqa Jehovä chikinqan rurëkunatam rurarqan.

7 Salomonqa Jerusalen markapa tsimpan jirkachömi, moabïtakuna adorayanqan melanëpaq Kemos santupaq y ammonïtakuna+ adorayanqan melanëpaq Mölek+ santupaq altarta ruratsirqan.+ 8 Tsënömi juk nacionpita llapan warminkunapaqpis ruratsirqan, y pëkunaqa tsë santukunata adorarmi qarëkunata rupatsiyaq.

9 Salomonqa ishkë kutipa yuripoq+ Jehovä Diostam qonqëkushqa karqan.+ Tsëmi Israelpa Diosnin Jehoväqa pëwan cölerakurqan. 10 Salomontaqa clärum willashqa karqan santukunata mana adoranampaq.+ Tsënö nikaptimpis manam Jehovä Diosta cäsurqantsu. 11 Tsëmi Jehovä Diosqa Salomonta kënö nirqan: “Qamqa mana cäsumarmi ruranqä acuerduta y mandakunqätapis cumplirqunkitsu. Tsëmi kananqa qampa rantiki gobernanampaq juk sirwishoqnikita churashaq.+ 12 Tsënö kaptimpis papäniki Davidta kuyarmi kawëkaptikiqa tsë sirwishoqnikita churashaqtsu. Pëtaqa churashaq tsuriki gobernëkaptinmi.+ 13 Peru sirwimaqnï Davidta kuyarmi y Jerusalen markata akrashqa karmi+ juk kastallatana+ dejashaq tsuriki gobernanampaq”.+

14 Teyta Jehovämi permitirqan Edomchö+ gobernaqkunapa familian Hadad jutiyoq nuna, Salomonpa chikeqnin tikranampaq.+ 15 Salomon manaraq gobernanti kaptinmi, edomïta nunakunataqa guërrachö David vencirqan.+ Tsëmi soldädukunapa mandaqnin Joabqa wanushqakunata pampanampaq ëwarqan, y edomïta ollqukunata ushakätsita munarmi mëtsikaqta wanutsirqan. 16 (Joabwan soldädunkunaqa llapan ollqukunata ushakätsiyanqanyaqmi joqta killapa Edomchö quedakuyarqan). 17 Peru Hadadqa wamrallaraq këkarmi papänimpa sirweqninkunawan Egiptuman qeshpir ëwakurqan. 18 Madianpita yarqurirmi Paran sitiuman chäyarqan+ y tsëpitanam juk ishkë ollqukunata pusharkur Egiptuman ëwakuyarqan. Chäriyaptinnam Egiptuchö gobernaq faraonqa wayita y chakrata Hadadta rikätsirqan y mikuytapis alistapurqan. 19 Faraonqa Hadadta kuyarmi, warmin Tahpenespa* nananwan o ñañanwan casatsirqan. 20 Tsëpitanam Hadadpaqa, Tahpenespa nananchö o ñañanchö tsurin yurirqan, y jutinqa Guenubatmi karqan. Tsë wamratam Tahpenesqa faraonpa tsurinkunatawan tsë wayillachö wätarqan.

21 Egiptuchö këkarmi Hadadqa, David y soldädunkunapa mandaqnin Joabpis+ wanukushqana kayanqanta musyarirqan.+ Tsëmi faraonta nirqan: “Markätam ëwëta munä”. 22 Tsënam faraonqa nirqan: “¿Imanirtan markëkitaqa kutikuyta munanki? ¿Imatan këchö pishipushunki?”. Tsënö niptinnam Hadadqa nirqan: “Manam imäpis pishintsu, peru markätam ëwëta munä”.

23 Teyta Diosmi permitirqan Eliadäpa tsurin Rezonpis Salomonpa chikeqnin tikrananta.+ Rezonqa karqan Zobä markachö gobernaq Hadadëzerpa+ sirweqninmi, y pëpitam qeshpir ëwakushqa karqan. 24 Salomon manaraq gobernanti kaptinmi, Zobä markachö kawaq nunakunataqa guërrachö David vencirqan.*+ Tsëmi Rezonqa juk grüpu nunakunapa mandaqnin tikrarqan, y suwakurmi qallëkuyarqan. Tsëpitanam Damascu markata täkoq* ëwakuyarqan+ y tsëchömi mandakuyarqan. 25 Tsënöpam Siria nacionchö gobernanti karqan. Salomon kawanqanyaqqa israelïtakunata Hadad chikinqannömi, pëpis israelïtakunata alläpa chikirqan y imëka problëmatam rurarqan.

26 Tsënöllam Nebatpa tsurin Jeroboanpis+ sirweqnin këkar+ Salomonta chikir qallëkurqan.+ Jeroboanpa mamäninqa Zeruä jutiyoq viuda warmim karqan. Pëkunaqa Efrainpa kastampitam kayarqan y Zeredä markachömi kawakuyarqan. 27 Jeroboanqa Salomonta chikirqan allpa qoturanqan lömata*+ ruratsishqa kaptin y David Markapa murällanta rurar ushatsishqa kaptinmi.+ 28 Jeroboantaqa yachaqta, häbilta y jövinta rikarmi, Salomonqa trabajaqkunapa mandaqnin kanampaq churarqan,+ tsë trabajaq nunakunaqa Josëpa kastankunam kayarqan. 29 Juk kutim Jeroboanqa Jerusalen markapita yarqurqan. Tsënam Silö markachö täkoq* Diospa willakoqnin Ahïyawan+ nänichö ishkanlla tinkuyarqan. Ahïyaqa juk mushoq aqshunan* aqshushqam këkarqan. 30 Tsëchömi Ahïyaqa aqshunanta* döci pedäzuman rachiskir, 31 Jeroboanta kënö nirqan:

“Kë chunka pedäzum qampaq kanqa. Israelpa Diosnin Jehovämi kënö nishunki: ‘Salomonqa mananam llapan kastakunapa mandaqninnatsu kanqa, qamnam chunka kastakunapa gobernaqnin kanki.+ 32 Peru Davidta kuyar+ y Jerusalen markata akrashqa karmi, juk kastata+ dejashaq Salomon mandakunampaq.+ 33 Israelïtakunaqa noqata dejaramarmi+ sidoniukuna adorayanqan Astoret* santuta, moabïtakuna adorayanqan Kemos santuta y ammonïtakuna adorayanqan Milcom santuta adorëkäyan. Pëkunaqa manam Salomonpa papänin Davidnötsu noqa munanqänö kawayashqa ni mandakunqäkunata ni ninqäkunata cäsukuyashqa. 34 Tsënö kaptimpis sirwimaqnï David mandamientükunata y leynïkunata cäsukunqampitam,+ Salomonqa wanukunqanyaq Israelchö llapan kastakunapa mandaqnin kanqa. 35 Peru tsurin gobernaq yëkuriptinmi sïqa chunka kastakunata entregashqëki+ gobernaqnin kanëkipaq. 36 Salomonpa tsurinqa juk kastallachönam mandakunqa. Tsënöpam sirwimaqnï Davidpa kastankuna Jerusalen markachö mandakur sïguiyanqa.+ Jerusalen markatam akrarqö jutïpa reqishqa kanampaq. 37 Qamtam Israelpa gobernaqnin kanëkipaq churashqëki y llapan munanqëkichömi mandakunki. 38 Sirwimaqnï David cäsumanqannö,+ llapan mandamientükunata y leynïkunata cumpliptikiqa, Davidta yanapanqänöllam qamtapis yanapashqëki.+ Gobernanti kanëkipaq qamta churanqaqnöllam qampa kastëkikunatapis Israel nunakunapa mandaqnin kayänampaq churashaq. 39 Y mana cäsukoq kayanqampitam Davidpa kastankunata juk tiempupa penqakatsishaq’”.+

40 Tsëta musyëkurmi Salomonqa Jeroboanta wanutsita munarqan, peru Jeroboanqa Egiptuchö gobernaq+ Sisac+ kaqtam qeshpir ëwakurqan. Tsëchömi Salomon wanunqanyaq quedakurqan.

41 Salomon ruranqankunapita y yachaq kanqampitaqa, Salomonpaq willakoq librum masllata willakun.+ 42 Salomonqa Jerusalen markachömi cuarenta watapa israelïtakunata gobernarqan. 43 Tsëpitanam Salomonqa wanukurqan, y papänin kawanqan David Marka niyanqanmanmi pampayarqan. Tsënam tsurin Rehoboamqa+ gobernaq yëkurqan.