2 Juan

1 Awkin nunapita, rasumpa kuyanqä y rasumpa kaqta reqishqa kaqkunapis kuyayanqan akrashqa señörapaq y wamrankunapaq. 2 Qamkunataqa shonqükunachö këkaq y imëyaqpis këkänampaq kaq rasumpa kaqrëkurmi tsënö kuyayaq. 3 Teyta Dios y Teytapa Tsurin Jesucristum, tsë rasumpa kaqkunata yachatsimäshun y kuyamanqantsikta rikätsimäshun. Pëkunaqa noqantsikwanmi alläpa alli y llakipäkoq* kayanqa, y yamë kanapaqmi yanapamäshun.

4 Teytapita chaskinqantsik mandamientu ninqannölla rurar,+ wakin wamrëkikuna rasumpa kaq nänichö purikäyanqanta musyarmi alläpa kushikurqä. 5 Tsëmi kananqa señöra, juknintsik juknintsik kuyanakunapaq rogaq. Manam manaraq reqinqëki mandamientutatsu qamman qellqëkämü, sinöqa qallanampitana katsinqantsik unë mandamientutam.+ 6 Kuyakoq këqa, mandakunqankunata cäsukur kawakuymi. Qallanampita qamkuna wiyayanqëkinöpis, tsë mandamanqantsikqa, juknintsik juknintsik kuyanakur këkänapaqmi.+ 7 Kë munduchöqa, Jesucristu nunanö shamunqanman+ mana creeq mëtsika engañakoqkunam yuriyämushqa.+ Pëkunam engañakoq y anticristu kayan.+

8 Cuidakuyë alli trabajar lograyanqäkunata mana oqrayänëkipaq, y qamkunapaq listu këkaq llapan bendicionkunata chaskiyänëkipaq.+ 9 Pï nunapis Cristu yachatsikunqanta dejëkur mana allikunata yachatsikurqa, manam Teyta Dioswan juknöllatsu këkan.+ Peru Cristu yachatsikunqanta mana dejaqqa, Teytawan y Tsuriwampis juknöllam këkan.+ 10 Pillapis qamkunaman shamur Cristu yachatsikunqampa contran yachatsiyäshuptikiqa, ama wayikikunaman chaskiyankitsu+ ni saludayankitsu. 11 Pï nunapis pëkunata saludarqa, mana allikunata ruranqanchömi yanapëkan.*

12 Qamkunaman qellqamunäpaq imëkaraq kaptimpis, manam tsëkunata tintawan papelman qellqamuyta munätsu, sinöqa llapan shonquykikunawan kushikuyänëkipaqmi, qamkunaman shamur kikikikunawan parlëta munä.

13 Akrashqa nanëkipa o ñañëkipa wamrankunam, qampaq salüduta apatsiyämun.