2 Samuel

15 Tsë llapan pasariptinnam Absalonqa juk carrëtata y cawallukunata alistarqan, y puntanta cörriyänampaqmi cincuenta ollqukunata ashirqan.+ 2 Absalonqa tempränulla shärikurirmi, markaman yëkoq näniman ëwaq.+ Tsëchömi problëmankunata arreglëta munar+ gobernantiman ëwaqkunata shuyaraq. Y pasaqta rikëkurqa qayëkurmi mëpita shamunqanta tapupaq. Tsë nunanam, “Israelpa juk kastampitam shallämü” neq. 3 Tsënam Absalonqa kënö neq: “Problëmëkita arreglayämunampaq mañakurqa qamqa allitam rurëkanki. Peru gobernantipa yanapaqninkunachöqa manam pillapis kantsu problëmëkita arreglamunampaq”. 4 Tsënö parlapëkurmi Absalonqa kënö neq: “¡Imanöllaraq Israel nacionchö Juez kanäpaq noqata churëkayämanman! Llapan problëmayoqkuna noqaman shayämuptinqa shumaqmi arreglarïman”.

5 Pï nunapis puntanman qonqurikuptinqa, Absalonqa makimpita sharkatsirmi saludarnin mutsareq.+ 6 Absalonqa, problëmankunata arreglëta munar gobernantiman ëwaq llapan israëlitakunatam tsënö ruraq. Tsëta ruraptinmi, israelïtakunaqa Absalonta mas kuyar qallëkuyarqan.+

7 Tsëpita chusku* wata pasariptinnam Absalonqa gobernanti Davidta nirqan: “Jehovä Diosta äninqäta cumplinäpaqmi Hebron markata ëwëta+ munä. ¿Ëwarillämanku? 8 Siriachö këkaq, Guesurchö+ këkarmi, ‘Jerusalenman Teyta Jehovä kutitsimaptinqa, Jehoväpaqmi qarëkunata rupatsishaq’ nir änikurqä”.+ 9 Tsënö niptinmi gobernantiqa, “ama yarpachakuytsu, ëwëlla” nirqan. Tsëmi Absalonqa Hebron markata ëwarqan.

10 Tsëpitanam Absalonqa, Israelchö llapan kastakunaman pitapis mana musyatsïllapa nunakunata kënö nir mandarqan: “Waqrapita trompëtata tocaqta wiyayanqëki höram kënö niyänëki: ‘¡Kananqa Absalonnam Hebron markachö gobernanti tikrashqa!’”.+ 11 Jerusalen markapitam doscientus ollqukuna Absalonwan ëwashqa kayarqan, peru manam musyayarqantsu imapaq invitashqa kayanqanta. 12 Absalonqa pishtashqa animalkunata Teyta Diospaq rupatsinampaqmi, Guilö+ markapita Ahitofelta qayatsirqan,+ pëqa Davidpa consejaqninmi karqan.+ Mëtsikaqmi Absalonta yanapayarqan y gobernanti Davidpa contran churakäyarqan.+

13 Tsëpitanam juk willakoq Davidman ëwarnin, “kananqa llapan israelïta ollqukunam Absalontana yanapëkäyan” nir willarirqan. 14 Tsëmi Davidqa Jerusalen markachö llapan sirweqninkunata nirqan: “¡Absalonqa llapantsiktam wanuratsimäshun! ¡Manaraq chämuptin jinan höra këpita qeshpir ëwakushun!+ Sinöqa chëkamurmi noqantsiktapis y kë markachö llapan täkoqkunatapis* wanutsimäshun”.+ 15 Tsënam sirweqninkunaqa gobernantita, “qam mandayämanqëkitam rurayäshaq” niyarqan.+ 16 Tsëmi gobernanti David wayimpita yarqur ëwakuptin llapan familiankunapis qepanta ëwayarqan. Peru Davidqa chunka warminkunatam* palaciuta cuidayänampaq dejarqan.+ 17 Tsënömi gobernantiqa llapan nunakunata pusharkur ëwakurqan, y Bet-Merhac sitiuchömi jamayarqan.

18 Llapan sirweqninkuna, keretïtakuna, peletïtakuna+ y Gatpita+ ëwaq seiscientus guitïtakunam+ gobernantipa puntampa fïlëpa pasayarqan, y pënam llapankuna këkäyanqanta o mana këkäyanqanta musyanampaq yuparqan. 19 Tsëpitanam gobernanti Davidqa guitïta nuna Ittäita+ kënö nirqan: “Qamwanqa ama ëwashuntsu. Kutïkur tsëraq churayanqan gobernanti Absalonwan quëdakuy. Qamtaqa markëkipitam qarqayämushurqunki y këchöqa forastërullam kanki. 20 Qanyanllaran chämurqunkipis. Kikïpis manam musyätsu mëta ëwanäpaq kaqta, ¿tsëtsuraq pushaqman? Mas alliqa kanqa marka mayikikunata pusharkur Jerusalen markata kutikunqëkim. ¡Teyta Jehovä imëpis kuyëkushuy!”.*+ 21 Peru Ittäiqa kënömi gobernanti Davidta nirqan: “Teytallë, Jehovä Diospa jutinchö y qampa jutikichömi neq: ¡Wanurpis o kawarpis qamwan juntum mëchöpis këkäshaq!”.+ 22 Tsënam Davidqa Ittäita,+ “allim, tsëqa ëwashunlla” nirqan. Tsëmi guitïta nuna Ittäiqa llapan marka mayinkunawan y tsurinkunawan ëwayarqan.

23 Nunakunata tsimpaqta rikarmi tsë kinrëchö täkoqkuna* waqayarqan. Gobernantiqa näni kuchunchömi shëkarqan,* y llapan nunakunam Cedron+ uranta tsimpar tsunyaq sitiuman ëwaq nänipa ëwayarqan. 24 Tsëchömi Sadocpis+ këkarqan, y llapan levïtakunam+ Diospa+ Sagrädu Cäjanta+ apayarqan. Pëkunam apëkarnin Diospa Sagrädu Cäjanta patsaman churayarqan. Y Jerusalen markapita Cedron uranta nunakuna tsimpar manaraq ushayaptinmi Abiatar+ chärirqan. 25 Tsënam gobernantiqa Sadocta kënö nirqan: “Diospa Sagrädu Cäjanta aparkur kutikuy.+ Teyta Jehovä munaptinqa kutimushaqchi carpa* wayinta y Sagrädu Cäjanta rikänäpaq.+ 26 Peru noqa ruranqäkunawan Teyta Dios mana kushikuptinqa, alfin imanäshaqraq, pë munanqannöchi imapis kallanqa”. 27 Tsëpitanam sacerdöti Sadocta yapë kënö nirqan: “Qamqa Teyta Dios munanqanta entiendeq nunam kanki.+ Tsuriki Ahimäazwan y Abiatarpis tsurin Jonatanwan+ mana yarpachakushpa kutikuyë. 28 Y noqaqa imatapis willakayämunqëkiyaqmi+ Jordan mayuta* pasayänan sitiukunachö shuyëkäyashqëki”. 29 Tsënam Sadocwan Abiatarqa Diospa Sagrädu Cäjanta aparkur Jerusalen markata kutiyarqan, y tsëchömi quedakuyarqan.

30 Davidqa llakikurmi qala chaki y umanta o peqanta tsapakushqa Olïvus jirkaman+ waqar waqar witsarqan. Y llapan nunakunapis tsënöllam peqankunata tsapakushqa waqar waqar qepanta witsäyarqan. 31 Tsëpitanam, “Ahitofelmi contrëki churakashqa+ y Absalontanam+ yanapëkan” nir Davidta willayarqan. Tsëmi Davidqa nirqan: “Teyta Jehovä+ rogakullaqmi, Ahitofel consejanqanqa upakunapa consëjunnö tikraritsun”.+

32 Teyta Diosta unë adorayanqan Olïvus jirkaman David chänampaqqa, arkïta+ Husäimi+ röpampis rachishqa y allpallana peqanwan o umanwan shuyarëkänaq. 33 Tsënam Davidqa kënö nirqan: “Noqawan ëwarqa mas afannïpaqmi kanki. 34 Tsëpa rantinqa jukta rogakushqëki, Jerusalen markaman kutïkur Absalonta kënö ninki: ‘Kananqa qampa sirweqnikinam kallä. Unëqa papänikipa sirweqninmi karqä, peru kananqa qamtanam sirwishqëki’.+ Tsëpitana Ahitofel+ ninqanta mana ruranampaq ninki. 35 Tsëchömi sacerdöti Sadocwan Abiatarpis+ yanapayäshunëkipaq këkäyan. Palaciuchö llapan wiyanqëkitaqa pëkunata willanki. 36 Sadocpa tsurin Ahimäaz+ y Abiatarpa tsurin Jonatanpis+ tsëchömi këkäyan, y llapan wiyayanqëkitaqa pëkunawan musyatsiyämanki”. 37 Tsënam Davidpa amïgun Husäiqa,+ Jerusalen markata kutirqan, y Absalon chanqan höram pëpis charqan.