Juan
7 Tsëpitanam Jesusqa judïukuna wanutsita munayaptin, Judëa provinciachöqa purita munarqannatsu, sinöqa Galilëa provinciachönam masqa purirqan.+ 2 Tsënö kaptimpis, judïukuna rurayanqan Ramäda Fiestam ichikllachöna kanan karqan.+ 3 Tsëmi wawqinkunaqa+ kënö niyarqan: “Qatiräshoqnikikunapis ruranqëkita rikäyänampaq, këpita yarqur Judëa provinciata ëwakuy. 4 Pï nunapis reqishqa këta munarqa, manam imatapis pakëllapatsu ruran. Tsëkunata rurëkarqa, nunakunapa rikëninchö rurë”. 5 Rasumpa kaqchöqa, wawqinkunaqa manam creiyaqtsu Teyta Dios pëta mandamushqa kanqanta.+ 6 Tsënam Jesusqa pëkunata kënö nirqan: “Noqapaq dispunishqa tiempuqa manam chämunraqtsu,+ peru qamkunapaqqa ima tiempupis allillam. 7 Nunakunaqa manam imarëkurpis qamkunataqa chikiyäshunkitsu, peru rurayanqankuna mana alli kanqanta musyatsikuptïmi noqataqa chikiyäman.+ 8 Qamkunalla fiestaman witsäyë. Dispunishqa tiempum chämushqaraqtsu, tsëmi noqaqa fiestaman witsäshaqraqtsu”.+ 9 Tsënö nirmi Galilëa provinciachö quedakurqan.
10 Tsënö kaptimpis, wawqinkuna fiestaman witsäriyaptinmi pëpis ëwarqan, peru manam nunakuna rikëkäyaptintsu, sinöqa pakëllapam. 11 Tsënam judïukunaqa, “¿mëchötan tsë nuna këkan?” nir wakpa këpa fiestachö ashiyarqan. 12 Mëtsikaq nunakunam kikinkunapuralla pëpaq parlar këkäyarqan. Wakinmi, “pëqa alli nunam” niyaq, y wakinnam, “manam alli nunatsu, pëqa nunakunata engañarmi purin”+ niyaq. 13 Peru judïukunata mantsarmi nunakuna jananchöqa pëpaq parlayaqtsu.+
14 Fiesta pullampëkaptinnam Jesusqa templuman witsarkur yachatsikur qallëkurqan. 15 Judïukunaqa espantakurmi kënö niyaq: “¿Imanötan kë nunaqa Diospa Palabrampita tsëläya yachëkun,+ escuëlakunachö* mana estudiashqa këkarqa?”.+ 16 Tsënam Jesusqa nirqan: “Yachatsikunqäqa manam noqapatsu, sinöqa mandamaqnïpam.+ 17 Teyta Dios munanqanta rurëta munaqqa, musyanqam yachatsikunqä Diospita kanqanta+ o kikï pensanqä kanqanta. 18 Kikin pensanqanllata yachatsikoqqa, alabayänantam ashin, peru mandamoqninta alabayänanta munaqqa,+ rasumpa kaqllatam parlan, y pëchöqa manam ima mana alli rurëpis kantsu. 19 Moisesmi Leyta entregayäshurqëki+ ¿aw? Peru manam mëqëkipis Leytaqa cäsukuyankitsu. ¿Imanirtan wanutsiyämëta munayanki?”.+ 20 Tsëchö mëtsika nunakunanam, “qamqa demoniuyoqmi kanki. ¿Pitan wanutsishuynikita munan?” nir contestayarqan. 21 Tsënam Jesusqa nirqan: “Säbaduchö milagruta ruranqäpitam llapëki espantashqa këkäyanki. 22 Peru këman pensayë: Moisesmi ishpakuyänëkipa puntanchö señalakuyänëkipaq kaqta niyäshurqëki.+ Tsënö kaptimpis, tsëqa manam Moisespitatsu shamurqan, sinöqa unë kastëkikunapitam.+ Tsëta cäsukurmi qamkunaqa säbadu junaqchöpis ishpakuyänampa puntanchö ollqu tsurikikunata señalayanki. 23 Moises qellqanqan Leyta cäsukuyta munar, säbadu junaqchöpis ishpakuyänampa puntanchö ollqu tsurikikunata señalëkarqa, ¿imanirtan noqawan alläpa cölerakuyanki, säbadu junaqchö juk nunata pasëpa* alliyätsinqäpita?+ 24 Amana janapa rikäyanqëkillapitaqa juzgayënatsu, tsëpa rantinqa alli kaqta rurar juzgayë”.+
25 Tsënam Jerusalenpita wakin nunakunaqa kënö niyarqan: “Këmi wanutsita munayanqan nuna ¿aw?+ 26 Tsënö kaptimpis, rikäyë, nunakuna jananchömi parlëkan, y manam imatapis niyantsu. ¿Cristu kanqantatsuraq gobernadorkunaqa següruna këkäyan? 27 Tsënö kaptimpis, noqantsikqa musyantsikmi kë nuna mëpita kanqanta,+ peru Cristu chämuptinqa manam ni pï musyanqatsu mëpita kanqanta”. 28 Tsënam Jesusqa templuchö yachatsikuykar fuertipa kënö nirqan: “Qamkunaqa reqiyämankim, y musyayankim mëpita kanqäta, peru manam kikï munartsu shamurqö.+ Noqata mandamaqnïqa rasumpam kawan, y qamkunaqa manam pëta reqiyankitsu.+ 29 Noqaqa pëta reqirmi+ jutinchö shamurqö, y pëmi noqataqa mandamashqa”. 30 Tsëmi imanö prësuyänampaq pensar qallëkuyarqan,+ peru manaraq höran kaptinmi ni pï prësuyta puëdirqantsu.+ 31 Tsënö kaptimpis, tsëchö këkaqkunapita atskaqmi, pëman markäkur o yärakur+ kënö niyarqan: “Cristu chämurqa manachi kë nuna ruranqampita mas milagrukunataqa ruranqatsu ¿aw?”.
32 Mëtsikaq nunakuna kikinkunapura pëpaq parlëkäyanqanta fariseukuna wiyarmi, pëkuna y mandakoq sacerdötikuna, prësuyänampaq guardiakunata mandayarqan. 33 Tsënam Jesusqa nunakunata kënö nirqan: “Mandamaqnï kaqman manaraq ëwakurmi, ichik mas tiempuraq qamkunawan kashaq.+ 34 Qamkunaqa ashimarpis manam tariyämankitsu, y noqa këkanqämanqa, manam ëwëta puëdiyankitsu”.+ 35 Tsënam judïukunaqa kikinkunapura kënö ninakuyarqan: “¿Mëtaraq këqa ëwëta pensëkan mana tarinantsikpaq? Manachi griëgu nunakunawan këkaq judïukunaman ëwëkurtsu griëgu nunakunata yachatsita pensëkan ¿aw? 36 ¿Ima nitataq munashqa, ‘qamkunaqa ashimarpis manam tariyämankitsu, y noqa këkanqämanqa, manam ëwëta puëdiyankitsu’ nirqa?”.
37 Nunakuna mas shuyaräyanqan fiesta ushanan junaqnam,+ Jesusqa sharkur fuertipa kënö nirqan: “Yakunaq kaqqa, noqaman shamur yakuta uputsun.+ 38 Pï nunapis noqaman markäkuptinqa o yärakuptinqa, Diospa Palabranchö qellqarëkanqannömi ‘pëpa mas rurin kaqpita kawatsikoq yaku mayunöraq yarqamunqa’”.+ 39 Tsënö nirqa, pëman markäkoqkuna o yärakoqkuna ichikllachöna chaskiyänampaq kaq santu espïritupaqmi parlëkarqan. Jesusqa manaraq mas puëdeq këta chaskishqaraqtsu karqan,+ tsëmi pëkunaqa santu espïrituta chaskishqaraqtsu kayarqan.+ 40 Tsënö ninqanta wiyëkurnam wakin nunakunaqa, “këqa rasumpam shamunampaq kaq Teyta Diospa Willakoqnin”+ nir parlar qallëkuyarqan. 41 Wakinnam, “këqa Cristum”+ niyaq. Peru wakinqa kënömi niyaq: “Cristuqa manam Galilëa provinciapitatsu kanan karqan, ¿aw?+ 42 ¿Manaku Diospa Palabranchöqa nin Cristuqa Davidpa kastan kanampaq kaqta,+ y David kawanqan+ Belen caserïupita kanampaq kaqta?”.+ 43 Tsënömi tsëchö mëtsika nunakunaqa, pëpaq pensayanqanchö acuerdutsu kayarqan. 44 Pëkunapita wakinnam prësuyta munayarqan, peru manam ni pï puëdirqantsu.
45 Mandakoq sacerdötikunaman y fariseukunaman guardiakuna kutiriyaptinnam, fariseukunaqa, “¿imanirtaq tsë nunata apayämurqunkitsu?” nir tapuyarqan. 46 Guardiakunanam, “manam pënöqa pï nunapis parlashqatsu”+ nir contestayarqan. 47 Tsënam fariseukunaqa niyarqan: “Manachi qamkunatapis engañayäshurqunkitsu ¿aw? 48 Mëqan gobernadornintsikpis o fariseukunapis manam pëman markäkuyantsu o yärakuyantsu ¿aw?+ 49 Peru këchö këkaq Leyta mana reqeq nunakunaqa maldicishqam kayan”. 50 Tsënam mas puntata Jesus rikaq ëwaq Nicodëmu jutiyoq fariseu mayinkuna kënö nirqan: 51 “Leynintsikqa mandakun, pï nunatapis manaraq wiyar y imata ruranqanta manaraq alli musyar mana juzganapaqmi ¿aw?”.+ 52 Tsënö niptinnam pëkunaqa kënö niyarqan: “Manam qampis Galilëa provinciapitatsu kanki ¿aw? Diospa Palabrampita alli yachakuy, tsëqa Diospa willakoqninkuna Galilëa provinciapita mana kayänampaq kaqtam musyarinki”.*