Malaquïas
1 Këchömi qellqarëkan sirweqnin Malaquïaswan* israelïtakunapaq Teyta Jehovä ninqankuna y willakunqankuna:
2 “Qamkunataqa kuyarqömi”*+ ninmi Teyta Jehovä,
peru qamkunaqa, “¿imanötan musyayä kuyayämanqëkita?” niyankim.
Teyta Jehoväqa kënöpis ninmi: “Esaüqa Jacobpa wawqinmi karqan.+ Tsënö kaptimpis, noqaqa Jacobtam kuyarqä, 3 peru Esaütaqa chikirqämi,+ y kawanqan jirkakuna tsunyaq quedanantam permitirqä,+ y chacalkuna* pärayänan tsunyaq sitiumanmi tikratsirqä”.+
4 Edompita nunakunaqa, “ushakätsishqa këkarpis, markantsikman kutirmi murällankunata yapë sharkatsishun” niyanmi, peru angelkunata mandaq Teyta Jehoväqa kënömi nin: “Pëkuna sharkatsiyaptimpis, noqam juchutsishaq,* y “mana allita ruraq nunakuna kawayanqan marka”, y “Teyta Jehovä pasëpa* castiganqan marka” nirmi reqiyanqa.+ 5 Tsëkuna pasakunqanta rikarmi qamkunaqa niyanki: “Israelïtakuna kawayanqan mëtsë markakunachö puëdeq kanqampita Teyta Jehovä alabashqa katsun”’”.
6 “Angelkunata mandaq Teyta Jehovämi, jutinta mana respetaq sacerdötikunata nin: ‘Wamrakunaqa papäninkunatam respetayan,+ y sirweqkunapis patronninkunatam respetayan. Noqa papänikikuna këkaptïqa,+ ¿imanirtan respetayämankitsu?+ y patronnikikuna këkaptïqa, ¿imanirtan respetayämankitsu?’.
‘Peru qamkunaqa, “¿imanötan jutikita respetayarqötsu?”+ niyankim’.
7 ‘Tsëtaqa rurayarqunki mana limpiu mikuyta altarnïchö rupatsirmi’.
‘Peru qamkunaqa, “¿imanötan qamtaqa mana limpiu tikratsiyarqoq?” niyankim’.
‘Tsëtaqa rurayarqunki, “Teyta Jehoväpa altarnintaqa*+ manam respetanantsiktsu” nirmi. 8 Tsënöllam wisku o qapra animalkunata noqapaq rupatsirpis, “tsëqa allillam” niyanki, y cöjuta o qeshyëkaq animalkunata rupatsirpis, “allillam” niyanki’”.+
“Gobernadornikikunaman tsënö qarëkunata apayaptikiqa, ¿qamkunawan kushikurtsuraq apayanqëkita kushishqa chaskiyäshunki?” ninmi angelkunata mandaq Teyta Jehovä.
9 “Kananqa, qamkunata llakipëkunäpaq* noqaman rogakayämuy. Qamkuna tsënö qarëkunata apayämuptikiqa, ¿kushishqatsuraq apayämunqëkita chaskïman?” ninmi angelkunata mandaq Teyta Jehovä.
10 “¿Mëqëkitan templupa punkunta grätis wichqayänëkipaq listu këkäyanki?+ Qamkunaqa altarnïchö ninallatapis manam grätisqa tsaritsiyankitsu.+ Qamkunaqa manam shonqüpaqnötsu kayanki, y rupatsiyämunqëki qarëkunapis manam gustamantsu” ninmi angelkunata mandaq Teyta Jehovä.+
11 “Inti o rupay yarqamunan lädupita inti o rupay jeqanan läduyaqmi, mëtsë nacionchö nunakuna jutïpaq allita parlayanqa.+ Mëtsëchömi pishtashqa animalkunata rupatsiyanqa, jutïchömi noqapaq qarëkunata rupatsiyanqa y tsë qarëkunaqa limpium kayanqa. Tsë llapantaqa rurayanqa, mëtsëchöpis jutïpaq allita parlayaptinmi”+ ninmi angelkunata mandaq Teyta Jehovä.
12 “Qamkunaqa kënö nirmi jutïta respetayankitsu:*+ ‘Teyta Jehoväpa altarninqa* manam limpiutsu këkan, tsëman churayanqan qarëkuna y mikuykunaqa melanëpaqmi kayan’.+ 13 Qamkunaqa, ‘kë trabäjutaqa manam rurëta munänatsu’ niyankim, y imëkatapis mana allipam rikäyanki, ninmi angelkunata mandaq Teyta Jehovä. Qamkunaqa suwakuyanqëkita, cöjuta y qeshyëkaq animalkunatam noqata qarayämänëkipaq apayämunki, ¿y tsënötatsuraq noqaqa chaskïman?”+ ninmi Teyta Jehovä.
14 “Noqaqa llapanta puëdeq Gobernaqmi kä,+ y mëtsë nacionpita nunakunam jutïta alläpa respetayanqa. Tsëmi sänu orqu* üshan këkaptin, pï nunapis noqa Jehoväta imatapis äniskamar, mana sänu üshata apamurqa, maldicishqam kanqa” ninmi angelkunata mandaq Teyta Jehovä.+