Malaquïas
2 “Sacerdötikuna, Teyta Diosqa këtam qamkunapaq mandakun.+ 2 Mana cäsumëta munayaptiki y llapan shonquykikunawan jutïta mana respetayaptikiqa, maldiciyashqëkim,+ y pitapis bendicir niyanqëkitam maldicionman tikratsishaq.*+ Awmi, llapan shonquykikunawan mana cäsukushqa kayaptikim, pitapis bendicir niyanqëkita maldicionman tikratsirqö” ninmi angelkuna mandaq Teyta Jehovä.
3 “¡Rikäyë! Tsëkunata rurayanqëkipitam, murukuyanqëkipis alliqa yarqunqatsu.+ Fiestëkikunapaq pishtayanqëki animalkunapa ismanintam cärëkikunaman jitamushaq, tsë ismë montonarëkanqanmanmi apayäshunki. 4 Tsënömi musyayanki, Levïpa+ kastankunawan ruranqä acuerdu mana ushakänanta munar kë mandakuyta qamkunata musyatsinqäta”* ninmi angelkunata mandaq Teyta Jehovä.
5 “Pëkunawan ruranqä acuerduqa, mana ushakäyänampaq y yamë kawakuyänampaqmi karqan. Tsë bendicionkunata chaskirmi pëkunaqa llapan shonqunkunawan respetayämänan karqan, y pëkunaqa llapan shonqunkunawan jutita respetarmi chikinqä kaqkunata rurayarqantsu. 6 Pëkunaqa rasumpa kaq leykunatam yachatsikuyarqan,+ y manam imëpis mana allikunataqa parlayarqantsu. Pëkunawanqa imëpis yamëmi kayarqö, rikënïpaq alli kaqllatam imëpis rurayarqan+ y mëtsikaqtam mana alli rurëkunata dejayänampaq yanapayarqan. 7 Sacerdötikunaqa, angelkunata mandaq noqa Jehoväpa willakoqnïkunam kayan, tsëmi pëkunaqa imëpis yachëwan parlayänan,+ y nunakunaqa imata mandakunqätam pëkunata tapukuyänan.
8 Peru alli kaq rurëta manana rurayaptikim, qamkunapa culpëkikuna mëtsikaq nunakuna mandakunqäta cumpliyashqatsu.+ Tsënömi Levïpa+ kastankunawan ruranqä acuerduta cumpliyarqunkitsu, ninmi angelkunata mandaq Teyta Jehovä. 9 Awmi, qamkunaqa manam mandakunqäta cumpliyarqunkitsu, y manam llapan nunakunatatsu leynïkuna ninqannö igualpa juzgayarqunki. Tsëmi llapan nunakunapa rikëninchö penqakatsishqa y mana alli rikashqa kayänëkita permitishaq”.+
10 “¿Manaku llapantsikpis juk teytayoqlla kantsik?+ ¿Manaku llapantsiktapis Teyta Diosllä kamamarquntsik? Tsënö këkaptinqa, ¿imanirtan unë kastantsikkunawan ruranqan acuerduta qonqëkur juknintsik juknintsik+ traicionanakuntsik? 11 Judäpita nunakunaqa traicionakoqmi kayan, Israelchö y Jerusalenchömi melanëpaqkunata rurayan. Pëkunaqa, alli rurëkunata kuyaq Teyta Jehoväta+ mana respetarmi, santukunata adoraq warmikunawan casakuyashqa.+ 12 Tsëta ruraqkunataqa, Jacobpa kastankuna këkäyanqan carpakunapitam* Teyta Jehovä ushakätsinqa. Awmi, pï kaptimpis y angelkunata mandaq Teyta Jehoväpaq qarënin apaptimpis ushakätsinqam”.+
13 “Qamkuna tsëkunapita masta rurayaptikim,* Teyta Jehoväpa altarnimpis weqiwan junta këkan, y tsëchö llakikur waqayanqanmi wiyakan. Tsëmi Teyta Diosqa pëpaq apayanqëki qarëkunata allipanatsu rikan ni tsëkunawan kushikunnatsu.+ 14 Qamkunaqa, ‘¿imanirtan tsëkuna pasan?’ niyankim. Tsëkunaqa pasakun, yanaqikikuna o wallkikikuna y legïtimu warmikikuna këkaptin,* jövin këkar casakuyanqëki warmikikunata engañayanqëkita Teyta Jehovä rikashqa kaptinmi.+ 15 Tsënö kaptimpis, wakinkunaqa tsëkunata mana rurayänampaqmi shonqunkunachö decidiyashqa. Y tsurinkuna Teyta Diosta sirwiyänanta munarmi, Teyta Dios ninqannö imatapis rurayan. Kananqa qamkunapis Teyta Dios ninqannö imatapis rurayänëkipaq shonquykikunachö decidiyë, y amana jövin këkar casakuyanqëki warmikikunata engañayënatsu. 16 Israel nunakunapa Diosnin Teyta Jehoväqa alläpam chikin divorciakuyanqanta.+ Tsënöllam angelkunata mandaq Teyta Jehoväqa juk nuna mana allikunata ruranqantapis chikin. Tsëmi imatapis Teyta Dios ninqannö rurayänëki, y engañakoq këtam dejayänëki.+
17 Qamkunaqa parlayanqëkiwanmi Teyta Jehoväta cöleratsiyarqunki.+ Tsënö kaptimpis, qamkunaqa, ‘¿imanötan pëta cöleratsiyarqö?’ niyankim. Tsëtaqa rurayarqunki, ‘mana allita ruraqkunapis Teyta Jehoväpa rikëninchöqa allim këkäyan,+ y llapampis alli nunam kayan’ o ‘¿Mëchötan alli kaqllata ruraq Teyta Dios këkan?’ nirmi”.