Levïticu

19 Tsëpitanam Teyta Jehoväqa Moisesta kënö nirqan: 2 “Llapan israelïtakunatam këta ninëki: ‘Noqam Jehovä Diosnikikuna kä, noqaqa limpiu Diosmi kä. Tsëmi qamkunaqa llapanchö limpiu kayanëki.+ 3 Qamkunaqa papänikikunata y mamëkikunatam respetayänëki,+ y säbadu junaqpaq mandakunqätam cumpliyänëki.+ Noqam Jehovä Diosnikikuna kä. 4 Ama imapaqpis mana väleq santukunataqa adorayankitsu,+ ni metalpita santukunata rurayankitsu.+ Noqam Jehovä Diosnikikuna kä.

5 Noqa Jehoväwan amïgu kayanqëkita rikätsikoq qarëta apamurqa,+ kushishqa chaskinäpaqnömi apayämunëki.+ 6 Apayämunqëki ëtsataqa, apayämunqëki junaq y waräninllam mikuyänëki. Kima kaq junaqyaq sobraptinqa, ushakanqanyaqmi rupatsiyänëki.+ 7 Pï nunapis kima kaq junaqyaq sobranqanta mikuptinqa, tsë ëtsa melanëpaqna kaptinmi, apamunqan qarëtapis chaskishaqnatsu. 8 Tsë ëtsata mikoqtaqa, noqa Jehoväpa rikënïpaq sagrädu kaqta mana respetanqampitam castigayänan y wanutsiyänan.

9 Murukuyanqëkita cosecharqa, ama kuchun kuchunyaq cosechayankitsu ni shikwanqantapis pallayankitsu.+ 10 Üvasnikikunata cosecharpis, sobranqanta y shikwanqantaqa manam pallayänëkitsu. Tsëtaqa waktsakunapaq+ y forastërukunapaqmi dejayänëki. Noqam Jehovä Diosnikikuna kä.

11 Ama suwakuyankitsu,+ engañakuyankitsu+ ni jukniki jukniki traicionanakuyankitsu. 12 Pitapis engañayänëkipaq ama noqapa jutïchö jurayankitsu.+ Tsëta rurarqa manam respetëkäyämankitsu. Noqam Jehovä Diosnikikuna kä. 13 Ama nuna mayikikunata engañayankitsu+ ni suwapäyankitsu.+ Qamkunapaq trabajaq nunataqa tsë junaqllam pagayänëki, manam waränin junaqraqtsu.+

14 Sordu nunakunata ama insultayankitsu,* ni wisku o qapra nunapa puntanman imatapis churayankitsu,+ noqatam respetayämänëki.+ Noqam Jehovä Diosnikikuna kä.

15 Pitapis juzgarqa, ama waktsapa ni rïcupa favornin kayankitsu.+ Tsëpa rantinqa, llapampaqmi igual kayänëki.

16 Ama pitapis tumpar mana kaqta parlayankitsu.+ Ama imanöpapis nuna mayikikunapa vïdanta peligruman churayankitsu.*+ Noqam Jehovä Diosnikikuna kä.

17 Ama shonquykillachöpis nuna mayikikunata chikiyankitsu.+ Nuna mayikikuna ofendiyäshuptikiqa, jinan höram parlapäyänëki,+ tsënöpa imapis pasaptin mana culpayoq kayänëkipaq.

18 Ama marka mayikikunapita vengakuyankitsu+ ni imatapis rurashunqëkipita chikiyankitsu. Qamkuna kuyakuyanqëkinömi nuna mayikikunatapis kuyayänëki.+ Noqam Jehovä Diosnikikuna kä.

19 Kë mandakunqäkunatam cäsukuyänëki: wätana animaltaqa ama mana kastan kaqtawanqa cruzatsiyankitsu. Ama muruyänëkipaq ishkë cläsi muruta takuyankitsu.+ Ama ishkë cläsi hïlupita rurashqa röpata vistikuyankitsu.+

20 Manaraq rantishqa këkar o manaraq libri këkar juk sirwipakoq shipash casakunampaq änikuptinqa, y änikushqana këkar juk ollquwan oqllanakur kaptinqa, ishkanmi castigashqa kayanqa. Tsënö kaptimpis, tsë shipash manaraq libri kashqa kaptinmi, wanutsiyänëkitsu o wañutsiyänëkitsu. 21 Y tsë nunaqa, culpayoq kanqampitam carpa* wayipa puntanman noqa Jehoväpaq juk carnëruta apamunan.+ 22 Y culpayoq kanqampita apamunqan carnëruta noqa Jehoväpa rikënïchö sacerdöti rupatsiptinmi, tsë nunaqa perdonashqa kanqa.

23 Qamkunata pushëkanqä* markaman chärir frütata plantayaptikiqa, kima watapam frütanqa rikënïpaq limpiutsu kanqa, y manam mikuyänëkitsu. 24 Peru chusku kaq watapaqqa, tsë plantakunapa frütankuna rikënïpaq limpiunam kanqa, y noqa Jehoväpaqmi kushishqa apayämunëki.+ 25 Pitsqa kaq wataqa, tsë plantakunapa frütanqa mikuyänëkipaqnam kanqa. Tsënöpam mas plantakuna cosechayänëkipaq kanqa. Noqam Jehovä Diosnikikuna kä.

26 Manam imatapis yawaryoqtaqa mikuyänëkitsu.+

Ama suertita qateq ni brüju kayankitsu.+

27 Ama llapllëkikunata ni shaprëkikunapa* puntanta rutuyankitsu.*+

28 Pï nunapis wanuptinqa, ama llakikur qarëkikunata roqukuyankitsu,+ y ama qarëkikunachö ima dibüjutapis* dibujatsiyankitsu. Noqam Jehovä Diosnikikuna kä.

29 Ama warmi tsurikikunata qellëpaqrëkur jukwan jukwan katsirnin* trabajatsiyankitsu.+ Tsëta rurayaptikiqa, qellëpaqrëkur jukwan jukwan kakoq* warmikuna miraptinmi, täkuyanqëki* markakuna rikënïpaq limpiutsu kayanqa.+

30 Säbadu junaqpaq mandakunqätam cumpliyänëki,+ y sagrädu carpätam* llapan shonquykikunawan respetayänëki. Noqam Jehovä Diosnikikuna kä.

31 Wanushqakunawan parlayanqanta neqkunaman+ ni suerti qateqkunaman+ ama ëwayankitsu. Pëkunaman ëwarqa manam rikënïpaq limpiunatsu kayanki. Noqam Jehovä Diosnikikuna kä.

32 Soqu aqtsayoqkunapa puntanchömi respetar sharkuyänëki,*+ y edäyashqakunatam respetayänëki.+ Tsënöllam noqatapis respetayämänëki.+ Noqam Jehovä Diosnikikuna kä.

33 Ama qamkunawan kawaq forastërukunataqa, mana alli tratayankitsu.+ 34 Egiptuchö forastëru kayanqëkita yarparmi,+ qamkunawan kawaq forastërukunata marka mayikikunatanö tratayänëki,+ y qamkuna kuyakuyanqëkinömi pëkunatapis kuyayänëki. Noqam Jehovä Diosnikikuna kä.

35 Imata midirpis, imata pesarpis y imata tupurpis manam pitapis engañayänëkitsu.+ 36 Balanzata, pësakunata o tsaki mikuyta pesayänëkipaq imatapis* utilizarqa exactutam tupuyänëki. Tsënöllam aceitita, vïnuta o tsënökunata tupurpis exactuta tupuyänëki.+ Noqam Jehovä Diosnikikuna kä, y Egiptupitam pushamurqö.* 37 Llapan mandakunqäkunata y llapan leynïkunatam imëpis cäsukuyänëki.+ Noqam Jehovä Diosnikikuna kä’”.