Juëces
11 Galaadpita Jeftëqa+ valienti soldädum karqan. Qellëpaqrëkur jukwan jukwan kakoq* warmipa wawanmi karqan y papänimpa jutinqa Galaadmi karqan. 2 Galaadpaqa, warminchöpis mas tsurinkuna karqanmi. Pëkuna jatunyarkurnam Jeftëtaqa kënö nir qarquyarqan: “Qamqa juk warmipa wawanmi kanki. Manam papänintsikpitaqa ima herenciatapis chaskinkitsu”. 3 Tsëmi Jeftëqa wawqikunapita qeshpir ëwakurqan, y Tob niyanqan sitiuchömi kawakurqan. Trabäjunnaq nunakunam pëman juntakäyarqan, y pëwanmi puriyarqan.
4 Tsëpita tiempu pasariptinnam, ammonïta nunakunaqa israelïtakunawan pelyar qallëkuyarqan.+ 5 Y israelïtakunawan ammonïta nunakuna pelyaqta rikarmi, Galaadchö dirigentikunaqa Tob sitiuta ëwayarqan Jeftëta kutitsiyämunampaq. 6 Kënömi Jeftëta niyarqan: “Soldädukunapa mandaqnin kanëkipaqmi kutikamunëkita munayä. Ammonïta nunakunawanmi pelyashun”. 7 Tsënam Jeftëqa dirigentikunata nirqan: “¿Manaku qamkunaqa chikiyämar papänïpa wayimpita qarqayämarqëki?+ ¿Imanirtan kanan sufrikarninraq ashiyämanki?”. 8 Tsënam Galaadpita dirigentikunaqa Jeftëta niyarqan: “Tsëmi asheqniki shayämurqö. Noqakunawan kutiptikiqa y ammonïta nunakunawan pelyaptikiqa, dirigeqnïkuna kanëkipaqmi Galaadchö churayashqëki”.+ 9 Jeftënam Galaadpita dirigentikunata nirqan: “Ammonïta nunakunawan pelyanäpaq kutitsiyämaptiki y vencinäpaq Jehovä Dios yanapamaptinran, dirigeqnikikunaqa kashaq”. 10 Tsënam Galaadpita dirigentikunaqa, “ninqëkita mana rurayaptïqa Teyta Jehovä shimpimaqnintsik* katsun” niyarqan. 11 Tsëmi Jeftëqa Galaadpita dirigentikunawan ëwarqan, y tsëchö nunakunam dirigeqninkuna y soldädukunapa mandaqnin kanampaq churayarqan. Jeftëqa, Mizpä+ markachömi Jehovä Diospa nöpanchö llapan ninqanta yapë parlarqan.12 Tsënam Jeftëqa ammonïtakunapa gobernaqninman+ willakoqkunata mandarqan kënö niyänampaq: “¿Noqaqa imanarqoqtan marka mayïkunaman pelyaq shamunëkipaq?”. 13 Ammonïtakunapa gobernaqninnam Jeftëpa willakoqninkunata kënö nirqan: “Egiptupita israelïtakuna shayämunqan witsanmi,+ Arnon+ mayupita* Jaboc mayuyaq y hasta Jordanyaq+ markäkunapita duëñu tukurkuyarqan. Kananqa kutïkatsiyämë ama pelyashuntsu”. 14 Jeftëqa ammonïtakunapa gobernaqninmanmi willakoqkunata yapë mandarqan 15 kënö niyänampaq:
“Kënömi Jeftë nin: ‘Israelqa manam moabïta+ nunakunapa ni ammonïta+ nunakunapa markankunata duëñu tukurqantsu. 16 Egiptupita israelïtakuna shamurqa, Puka lamaryaqmi+ tsunyaq sitiupa shayämurqan y Cades sitiumanmi chäriyarqan.+ 17 Tsëmi israelïtakunaqa willakoqkunata mandayarqan Edomchö+ gobernaqta, “markëkipa pasakurilläyäshaq” nir rogayänampaq. Peru Edomchö gobernaqqa manam munarqantsu. Tsënöllam Moabchö+ gobernaqta mañakuyaptimpis, pasayänanta dejarqantsu. Tsëmi israelïtakunaqa Cades+ markachö quedakuyarqan. 18 Tsunyaq sitiupa ëwarqa, Edom+ y Moab+ markakuna kuchumpam pasayarqan. Moabpa inti o rupay yarqamunan lädumpam ëwayarqan y Moab markankunaman mana yëkuyllapam Arnonchö campamentunkuna rurayarqan, y Arnonmi Moabpa+ lindërun karqan.
19 Tsëpitanam israelïtakunaqa Hesbon markachö amorreukunapa gobernantin Sehonman willakoqkunata mandayarqan, “ëwëkäyanqä sitiuman chäyänäpaq markëkipa pasakulläyäshaq” niyänampaq.+ 20 Y Sehonqa israelïtakunata desconfiarmi markampa pasayänanta munarqantsu. Tsëmi israelïtakunawan pelyayänampaq, llapan soldädunkunata qayëkatsir Jähaz markachö campamentunkuna rurayarqan.+ 21 Tsëta rikëkurmi Israelpa Diosnin Jehoväqa Sehonta y llapan soldädunkunata venciyänampaq israelïtakunata yanaparqan. Pëkunaqa amorreu nunakunata vencirmi, llapan markankunapa duëñun tikrayarqan.+ 22 Tsënömi Arnon mayupita,* Jaboc mayuyaq y tsunyaq sitiupita hasta Jordanyaq, amorreu nunakunapa markankunapa duëñun tikrayarqan.+
23 Jehovä Diosmi israelïtakunapa puntampita amorreu nunakunata qarqurqan.+ Y kananqa, ¿qamku israelïtakunata qarquyta munëkanki? 24 ¿Manaku qamqa Kemos santu* llapan entregashunqëkita këkätsinki?+ Noqakunapaqa, Jehovä Diosnïkuna qarqunqan nunakunapa chakrankunam herenciäkuna.+ 25 ¿Moabchö gobernaq Ziporpa tsurin Balacpitapis+ mas puëdeqku kanki? ¿Pëqa israelïtakunawan pleyturqanku o pelyarqanku? 26 Israelïtakunaqa Hesbon markachö y ichik* markankunachö,+ Aroer markachö y ichik markankunachö y Arnon mayu* kuchunchö këkaq llapan markakunachömi trescientus watakunapana täkuyarqan.* ¿Imanirtan unëqa tsë markakunata reclamakuyarqëkitsu?+ 27 Noqaqa manam imanarqoqtsu, peru qamqa pelyaq shamur mana allitam rurëkanki. Kikin Teyta Jehovä Juez+ katsun y israelïtakunata y ammonïtakunata kanan juzgamäshun’”.
28 Peru ammonïtakunapa gobernantinqa manam Jeftë willatsinqanta cäsurqantsu.
29 Tsënam Jehovä Diosqa poderninwan Jeftëta+ yanaparqan, y pëqa Galaadchö këkaq Mizpë+ markaman chänampaqmi Galaad sitiupa y Manasespa kastankunapa markankunapa pasarqan. Tsëpitam ammonïta nunakunawan pelyaq ëwarqan.
30 Jeftëqa kënö nirmi Teyta Jehoväta änirqan:*+ “Ammonïta nunakunata vencinäpaq yanapamaptikiqa, 31 pëkunata pelyachö venciskir* kutimuptï chaskimänampaq wayïpita puntata yarqamoq kaqmi, qampaq kanqa Teyta Jehovä.+ Rupatsina qarëtanömi* entreguëkushqëki”.+
32 Jeftëqa ammonïta nunakunawan pelyaqmi ëwarqan, y Jehovä Diosmi pëkunata vencinampaq yanaparqan. 33 Pëqa Aroer markapita Minit markayaq y Abel-Keramimyaqmi mëtsikaqta wanutsirqan. Tsë kutim Jeftëqa veinti markakunachö nunakunata wanutsirqan. Tsënömi ammonïta nunakunaqa israelïtakunapa poderninchöna kayarqan.
34 Mizpä+ markachö wayinman Jeftë kutikaptinnam, ¡warmi wamranqa panderëtanta tocar y tushur chaskeq yarqurqan! Pëqa jukllëlla warmi wamranmi karqan. Manam ollqupis ni warmipis masqa wamran karqantsu. 35 Wamranta rikëkurnam kënö nir röpanta rachirqan: “¡Ay wamrallä! Shonqümi alläpa llakikun,* qamta karuman mandanaqpaqmi parlarqö. Jehovä Diostam änirqö y tsë änikunqätam cumplinä”.+
36 Wamrannam kënö nirqan: “Papä, Jehovä Diosta änishqa karqa, tsë änikunqëkinömi noqawan ruranëki,+ Teyta Jehoväqa chikishoqniki ammonïta nunakunapita vengakunëkipaqmi yanapashurqunki”. 37 Yapëmi papäninta nirqan: “Këllata rogakurishqëki, ishkë killapa yanasäkunawan jirkakunata ëwar, imëpis mana casakunäpaq kaqta waqaramushaq”.
38 Tsënam pëqa, “ëwëlla” nirqan. Y ishkë killapa ëwanampaqmi dejarqan, tsëmi pëqa imëpis mana casakunan kaptin yanasankunawan waqaq ëwakurqan. 39 Ishkë killa pasariptinmi pëqa papäninman kutirqan, y papäninqa änikunqannöllam rurarqan.+ Jeftëpa wamranqa manam ni pï ollquwampis kashqatsu karqan. Y Israelchöqa kë costumbrim patsakarqan: 40 cada watam, israelïta shipashkunaqa, Galaadpita Jeftëpa warmi wamranta watukayaq Teyta Diosta sirwikanqampita shumaq parlapäyänampaq, y watachö chusku junaqmi watukayaq.