Romänus

4 Tsënö karqa, ¿imatataq unë awiluntsik Abrahan tarirqan? 2 Këllaman pensarishun, ruranqampita allita ruraqnö rikashqa karqa, Abrahanqa alabakuyta puëdinmanmi karqan, peru manam Teyta Diospa rikëninchöqa. 3 ¿Imanö nirtan qellqarëkan? “Abrahanqa Teyta Jehovämanmi* markäkurqan o yärakurqan, tsëmi Teyta Diospa rikënimpaqqa allita ruraq nuna karqan”.+ 4 Trabajapakoq nunataqa manam alläpa alli kartsu trabäjumpita pagayan, sinöqa pägunta chaskinan kaptinmi.* 5 Tsënö kaptimpis, ruranqanman mana confiakoq, peru mana alli nunata allita ruraqtanö rikaqman markäkoqqa o yärakoqqa, markäkunqanrëkurmi allita ruraqnö rikashqa kanqa.+ 6 Llapan ruranqankuna ley ninqannö mana këkaptimpis, allita ruraqtanö Teyta Dios rikanqan nuna kushikunqampaq parlarmi, Davidpis kënö nirqan: 7 “Mana allita ruranqampita y jutsata* ruranqampita, Teyta Dios perdonanqan nunaqa kushishqam kawakun; 8 Teyta Jehovä* jutsannaqtana* rikanqan nunaqa kushishqam kawakun”.+

9 Tsëqa, ¿tsë kushikuyqa ishpakuyänampa puntanchö señalashqa kaqkunallapaqku o mana señalashqa kaqkunapaqwanku?+ Noqantsikqa kënömi nintsik: “Abrahanqa Teyta Diosman markäkurmi o yärakurmi, allita ruraqnö rikashqa karqan”.+ 10 ¿Imëtan markäkoq o yärakoq kanqanrëkur allita ruraqnö rikashqa karqan? ¿Ishpakunampa puntanchö señalashqana këkarku o manaraq señalashqa këkarku? Peqa ishpakunampa puntanchö manaraq señalakushqa karmi, ishpakunampa puntanchö señalakushqaraqtsu karqan. 11 Y ishpakunampa puntanchö señalashqa këtam señaltanö chaskirqan.+ Tsëqa ishpakunampa puntanchö manaraq señalashqa këkar, Teyta Diosman markäkoq o yärakoq kanqanrëkur, allita ruraqnö rikashqa kayanqanta musyatsikoq sëllu* cuentam karqan. Tsënöqa karqan, ishpakuyänampa puntanchö mana señalashqa këkar, allita ruraqnö rikashqa kayänampaq Teyta Diosman markäkoqkunapa papänin kanampaq,+ 12 y ishpakuyänampa puntanchö señalashqa kaqkunapa papänin kanampaqmi. Awmi, pëqa ishpakuyänampa puntanchö señalashqa këta väleqpaq churaqkunapa, y papänintsik Abrahan+ ishpakunampa puntanchö manaraq señalashqa këkar, Teyta Diosman markäkur o yärakur allita rurar kawanqannö kawaqkunapa papäninmi.

13 Manam ley ninqanta cumpliyanqampitatsu, kikin o kastankuna munduta herenciatanö chaskiyänampaq Teyta Dios Abrahanta änirqan,+ sinöqa markäkoq o yärakoq kar allita ruraqnö rikashqa kanqampitam.+ 14 Leyta väleqpaq churaqkuna herenciata chaskeqkuna kayaptinqa, markäkoq o yärakoq këpis manam imapaq välintsu y Teyta Dios änikunqampis tsëllachömi ushakan. 15 Rasumpa kaqchöqa, Leyqa Diospa castïguntam apamun,+ peru ley mana kanqanchöqa, manam mana allita rurë kantsu.+

16 Tsëmi Teyta Dios alläpa alli kanqampita kanampaq,+ änimanqantsiktaqa markäkoq o yärakoq kanqantsikpita chaskintsik, tsënöpa änikunqan llapan kastankunapaq següru kanampaq,+ Leyta cumpleqkunallapaqtsu, sinöqa llapantsikpa papänintsik Abrahannö markäkoq kaqkunapaqpis.+ 17 Tsëqa kënö nir qellqarëkanqannömi: “Mëtsika nunakunapa awilun kanëkipaqmi churarqoq”.+ Tsëqa pasarqan wanushqakunata kawatseq y manaraq cumplikashqa kaqkunapaq cumplikashqapaqnöna parlaq,* Abrahan markäkunqan o yärakunqan Diospa rikëninchömi. 18 Mana creipaqnö kaptimpis, pëqa markäkurmi o yärakurmi mëtsika nunakunapa awilun këta shuyararqan, Teyta Dios kënö nishqa kanqannö: “Qampa kastëkikunaqa rikëkanqëki estrëllakunanömi mëtsika kanqa”.+ 19 Y markäkunqanchö o yärakunqanchö alli këkarpis, cien watayoqnöna+ karmi cuerpun wanushqanöna këkanqanta, y Sära wamrayoq këta manana puëdinqanta* cuentata qokurqan.+ 20 Peru Teyta Dios äninqanrëkurmi, markäkoq o yärakoq karnin ichikllapis dudarqantsu. Sinöqa markäkoq karmi puëdeq tikrarqan, tsënömi Teyta Diosta alabarqan, 21 y äninqanta Teyta Dios cumplita puëdinqantam següru këkarqan.+ 22 Tsëmi, “allita ruraqnö rikashqa karqan”.+

23 Tsënö kaptimpis, “rikashqa karqan” ninqanqa manam pëllapaqtsu qellqashqa karqan,+ 24 sinöqa noqantsikpaqwanmi. Señornintsik Jesusta wanushqampita kawatseqman creirmi, noqantsikqa allita ruraqnö rikashqa kashun.+ 25 Pëqa mana allita ruranqantsikrëkurmi entregashqa kashqa+ y allita ruraqnö rikashqa kanapaqmi wanunqampita sharkamushqa.+