Jeremïas

25 Josïaspa tsurin Jehoiaquim+ Judächö chusku watapa gobernëkaptin, y Babiloniachö gobernaq Nabucodonosor juk watapa gobernëkaptinmi, Judächö nunakuna imanö kayänampaq kaqta Teyta Dios Jeremïasta parlaparqan. 2 Judäpita y Jerusalenpita llapan nunakunapaqmi, Teyta Diospa willakoqnin Jeremïas këta nirqan:

3 “Amonpa tsurin Josïas+ Judächö trëci watapa gobernanqampita kananyaqmi, veintitres watapa, Teyta Jehovä ninqankunata qamkunata willayarqoq.* Peru qamkunaqa manam cäsukuyta munayarqunkitsu.+ 4 Teyta Jehoväqa kutin kutinmi qamkunaman willakoqninkunata mandamurqan. Peru qamkunaqa manam pëkuna niyanqanta chaskikuyarqunkitsu ni cäsukuyarqunkitsu.+ 5 Pëkunaqa kënömi niyäshurqëki: ‘Mana alli rurëkunata y mana alli portakuyta dejayänëkipaqmi qamkunata rogayaq.+ Tsëta rurarqa, qamkunata y unë kastëkikunata Teyta Jehovä entregayäshunqëki markakunachömi atska tiempupa kawayanki. 6 Ama imëkata rurar santukunata adorayëtsu ni tsëkunapa puntanman qonqurikuyëtsu. Santukunata rurar Teyta Diosta cöleratsiyaptikiqa, imëka mana allikunatam qamkunaman chätsimunqa’.

7 ‘Qamkunaqa noqata cäsuyämänëkipa rantinmi, santukunata rurar cöleratsiyämarqunki. Tsëmi imëka mana allikunata qamkunaman chätsimushaq’+ ninmi Teyta Jehovä.

8 Tsëmi angelkunata mandaq Teyta Jehoväqa këta nin: ‘“Ninqäkunata mana cäsukushqa kayaptikim, 9 norti läduchö këkaq llapan familiakunata qayatsimushaq noqa Jehovä.+ Awmi, Babiloniachö gobernaq sirwimaqnï Nabucodonosortam qayatsimushaq.+ Pëkunaqa kë kinrë markakunata,+ tsëchö nunakunata, y amänun nacionkunachö nunakunatam ushakätsiyanqa.+ Y qamkunata ushakätsinqäta y markëkikuna tsunyaq quedanqanta rikarmi, mëtsë nacionpita nunakuna alläpa mantsakäyanqa, y qamkunapita burlakurmi wichyayanqa. 10 Mananam kushikur büllayanqanatsu,+ y manam noviuwan novian parlayanqampis+ ni maki mulinuwan aqayanqampis wiyakanqanatsu. Y mananam aktsinkunapis aktsinqanatsu. 11 Kë kinrë markakunaqa, rumillana y llakipëpaqmi* quedanqa. Y kë kinrë nacionkunapita nunakunaqa, setenta watapam Babiloniachö gobernaqta sirwir kayanqa”’.+

12 Teyta Jehoväqa kënöpis ninmi: ‘Peru setenta watakuna cumpliriptinqa,+ Babiloniachö gobernaqta y tsë nacionpita nunakunatam, mana allikunata rurayanqampita castigashaq.+ Y Caldëapita nunakunapa markankunaqa imëyaqpis tsunyaq sitium kanqa.+ 13 Kë libruchö willakunqannölla, sirwimaqnï Jeremïas tsë nacionkunapaq willakunqannölla y kikï ninqänöllam, tsë nacionpita nunakunata castigashaq. 14 Mana allikunata rurayanqampita y sirwimaqnïkunata mana alli tratayanqampitam castigashaq,+ y mëtsë nacionpita nunakunapa y puëdeq gobernaqkunapa+ esclävunkunam kayanqa’”.+

15 Israel nunakunapa Diosnin Jehovämi kënö nimashqa: “Cöleräwan junta këkaq cöpata makïpita aparkur, mandanqaq nacionpita nunakunata tsë cöpapita uputsi. 16 Tsë cöpapita upurqa, chikeqninkuna espädawan wanutsita munayaptinmi, ishkikachar ushayanqa y löcunö portakuyanqa”.+

17 Tsëmi Teyta Jehoväpa makinchö këkaq cöpata aparkur, Jehovä mandamanqan nacionpita nunakunata uputsirqä.+ 18 Puntataqa Jerusalenpita y Judäpita nunakunata,+ gobernaqninkunata y dirigeqninkunatam uputsishaq. Tsëtaqa rurashaq, kanannölla markankunata tsunyaq sitiuman tikranampaq, mëtsë nacionpita nunakuna rikarnin mantsakäyänampaq, pëkunapita burlakur wichyayänampaq y mëtsëchö maldicishqa kayänampaqmi.+ 19 Tsëpitanam Egiptuchö gobernaq faraonta, sirweqninkunata, dirigeqninkunata, llapan gobernanqan nunakunata,+ 20 Egiptuchö juk nacion nunakunata, Uz kinrëchö gobernaqkunata, Filistëa markakunachö gobernaqkunata,+ awmi Asquelon markachö gobernaqta,+ Gäza markachö gobernaqta, Ecron markachö gobernaqta y Asdodchö quedaq nunakunata gobernaqtam uputsishaq. 21 Tsënöllam Edompita,+ Moabpita+ y Ammonpita+ nunakunata; 22 Tïru kinrëchö gobernaqkunata, Sidon+ kinrëchö gobernaqkunata, islachö këkaq markakunachö gobernaqkunata; 23 Dedanpita,+ Temäpita, Buzpita nunakunata, llapllankunata* rutukoq nunakunata;+ 24 Arabiapita nunakunata gobernaqkunata,+ tsunyaq sitiuchö mëtsë nacionpita nunakunata gobernaqkunata; 25 Zimrï kinrëchö gobernaqkunata, Elam+ kinrëchö gobernaqkunata, Mediapita nunakunata gobernaqkunata;+ 26 amänuchö o karuchö norti läduchö gobernaqkunata y entëru patsachö gobernaqkunatam qatinallaman uputsishaq. Tsëpitanam Sesacchö*+ gobernaqta uputsishaq.

27 Pëkunatam kënö ninëki: ‘Israel nunakunapa Diosnin angelkunata mandaq Teyta Jehovämi këta nin: “Chikiyäshoqnikikuna espädawan ushakätsiyäshunëkitam permitishaq. Tsëmi machayanqëkiyaq y shonquykikuna jitanqanyaq o tikranqanyaq upuyë, y sharkuyta mana puëdiyanqëkiyaq ishkir kayë”’.+ 28 Pëkunata makyanqëki cöpapita mana upuyta munayaptinqa, këtam ninëki: ‘Angelkunata mandaq Teyta Jehovämi këta nin: “¡Tsë cöpapitaqa upuyänëkim! 29 Rikäyë, ¿jutïta apaq markata imëkawan castiguëkaptïtsuraq+ qamkunaqa castigashqatsu kayanki?”’.+

‘Entëru patsachö nunakunata espädawan ushakätsiyänantam permitishaq. Tsëmi qamkunapis castigashqa kayanki’ ninmi angelkunata mandaq Teyta Jehovä.

30 Y kë ninqaqkunatam kënö nir willakunëki:

Üvasta vïnupaq jarur cantayanqannöllam noqa Diospis entëru patsachö nunakunata vencinqäpita kushikur cantashaq’.

31 ‘Noqa Jehoväqa llapan nacionchö nunakunatam juzgashaq.

Tsëmi büllanqäqa entëru patsapa kuchunyaq wiyakanqa.

32 Angelkunata mandaq Teyta Jehovämi këta nin:

‘¡Rikäyë! Mëtsë nacionkunamanmi imëka mana allikuna chëkämun.+

Y imëka mana allikunam patsapa mas karu kuchunkunapita shamunqa.+

33 Noqa Jehovä wanutsinqä kaqkunaqa, patsapa juk kuchumpita juknin kuchunyaqmi jitaräyanqa. Manam ni pï pëkunapaq llakikunqatsu ni pëkunata pampanqatsu. Pëkunaqa animalkunapa ismaninnömi patsachö jitaräyanqa’.