Llapanta Dios rurar qallanqampita, Wamayëpaq Tamyayaq

Kë Patsa y cielo, ¿mëpitaraq yarqayämushqa? ¿Imanöraq kë Inti, Killa, estrëllakuna y llapan Patsachö rikanqantsikkuna rurakäyashqa? Rasumpëpa kaqtaqa Bibliallam nimantsik, kë llapantam Dios ruramushqa nirnin. Tsëmi kë librontsikqa qallan, llapanta Teyta Dios rurar qallanqampita patsë willakurnin.

Puntata Teyta Dios pënö espïritukunata ruranqantam yachakuntsik. Angelkunash kayänaq tsë espïritukunaqa. Pero noqantsiknö nunakunapaqshi kë Patsataqa ruramunaq. Tsëshi, tsë selläma shumaq huertaman churanampaq Adán y Ëvata Teyta Dios ruranaq. Pero pëkunaqa oqrariyänaq kë selläma shumaq huertachö kawëtash Teyta Diosta mana wiyakuyanqanchö.

Adanta Dios ruranqampeq, Wamayëpaq Tamyayaqqa o Diluvio nishqanyaqqa pasanaq, 1.656 watash. Alläpa mana alli nunakunash kawayänaq tsë tiempochöqa. Mana alli angelninkunawanshi Satanasqa këkänaq ciëlochö. Patsachönash këkäyänaq: Caín, llapan mana alli nunakuna y mantsëpaq alläpa kallpayoq hatusaq nunakunapis. Pero alli nunakunapis kayänaqshi. . . Abel, Enoc y Noé. Tsëmi kë nunakunapita y llapan pasanqanta leishun kë HUK kaq Parte nishqan willakïkunachö.