¿Pitaq Jesucristu?

1. ¿Mëchötaq Jesus kawar qallarqan?

Jehoväqa Jesustam puntata kamarqan. Patsachö manaraqpis yurirmi ciëlochö espïritunö kawarqan. Tsënöpam noqantsikpitaqa jukläya karqan (Juan 8:23). Tsëchömi llapanta kamar Teytanta yanaparqan. Y punta kamashqan kaptinmi Bibliaqa Diospa mayor Tsurin nin Jesuspaq (Juan 1:1). Jina Teytampita musyatsikoq kaptinmi ‘Willacamoq’ nin.​—Lei Proverbios 8:22, 23, 30 y Colosenses 1:15, 16.

2. ¿ImanirtaqJesus Patsaman shamurqan?

Diosqa Patsamanmi Tsurinta kachamurqan. Pero puntataqa, Maria jutiyoq judía virgenpa pachanmanmi Tsurimpa kawëninta churarqan. Tsënöpam Jesuspa teytanqa nunatsu o runatsu karqan (Lucas 1:30-35). Jesusqa Patsaman shamurqan këkunata ruranampaqmi: 1) Diospita rasumpa kaqta yachatsikunampaq, 2) imëkata pasarpis Diospa munëninta rurar yachatsimänapaq y 3) ‘salvamanantsicrëcur’ wanunampaqmi.​—Lei Mateo 20:28.

3. ¿Imanirtaq salvamänata necesitantsik?

Salvëqa juk nunapa kawëninrëkur pagakïmi (Éxodo 21:29, 30). Diosqa manam edäyänapaq ni wanunapaqtsu kamamarqantsik. Këtaqa musyantsik, mana wiyakurqa Adan wanunampaq kaqta Jehová nishqa kaptinmi. Pero wiyakurqa manam wanunmantsu karqan (Génesis 2:16, 17; 5:5). Bibliaqa willakun ‘wanï shamunampaq’ Adan causanqantam. Juk parlakïchöqa Adanmi jutsata muyarqan tsurinkunata y tsënöpam wanuntsik. Tsëmi llapantsik necesitantsik juk salvakoqta.​—Lei Romanos 5:12 y 6:23.

Pero, ¿piraq pagakunman karqan wanïpita salvamänapaq? Wanurmi jutsantsikpita pagakuntsik. Pero jutsayoq karmi wakinkunapa jutsankunapitaqa pagakïta puëdentsiktsu.​—Lei Salmo 49:7-9.

4. ¿Imanirtaq Jesus wanurqan?

Pëqa mana jutsayoq y jutsata mana ruraqmi karqan. Tsëmi kikimpa jutsanrëkurtsu wanurqan, sinöqa wakimpa jutsankunarëkurmi. Y tsëpaq Tsurinta kachamurmi Diosqa rikätsikurqan alläpa kuyamanqantsikta. Jina Jesuspis kuyamanqantsiktaqa rikätsikurqan Teytanta wiyakur y jutsapitawan wanïpita salvamänantsikrëkur wanurmi.​—Lei Juan 3:16 y Romanos 5:18, 19.

Rikäri ¿Imanirtaq Jesusqa wanurqan? neq videuta

5. ¿Imatataq kanan witsan Jesus rurëkan?

Jesusqa Patsachö këkar qeshyëkaqkunatam kachakätsirqan, wanushqakunatam kawaritsimurqan y sufreqkunatam yanaparqan, tsënöpam rikätsikurqan gobernamurnin Diosta kuyaqkunata yanapanampaq kaqta (Mateo 15:30, 31; Juan 5:28). Wanuriptinqa, ciëlochö espïritunö kawanampaqmi Dios kawaritsimurqan (1 Pedru 3:18). Tsëchönam Patsata gobernamunampaq Teytan nombranqanyaq shuyararqan (Hebreus 10:12, 13). Kananqa ciëlochömi Jesus gobernëkan y qateqninkunanam entero Patsachö tsë gobiernopita willakïkäyan.​—Lei Daniel 7:13, 14 y Mateo 24:14.

Ichikllachönam kë Reyqa llapan mana alli ruraqkunata y sufrimientokunata ushakäratsimunqa. Entero Patsa shumaq huertaman tikrariptinmi Jesusman llapan creikoqkuna y wiyakoqkunaqa kushishqa kawakuyanqa.​—Lei Salmo 37:9-11.