Jehovämi Samuelta parlaparqan

Mandakoq sacerdöti Elïpaqa ishkëmi wamrankuna karqan, jukpam Hofnï jutin karqan, y juknimpanam Finehas. Pëkunapis sacerdötim kayarqan, tsëmi Diospa carpa wayinchö trabajayaq. Peru manam Jehoväpa leyninkunata cäsukuyarqantsu. Y israelïtakunatam mana alli tratayaq. Jehoväpaq qarëkunata apayaptinmi pëkunaqa allin allin kaq ëtsakunata quedatsikuyaq. Elïqa wamrankuna tsënö kayanqanta musyarqanmi peru manam corregirqantsu. Y Jehoväqa, ¿manatsuraq imatapis ruranman karqan?

Samuelqa Hofnïpawan Finehaspa menorninkunam karqan, peru pëqa manam mana allikunata rurarqantsu, tsëmi Jehoväqa alläpa kuyaq. Juk kutim punukashqa këkar qayëkäyanqanta wiyarqan. Tsëmi sharkurnin cörripa Elï kaqta ëwarqan, y kënömi nirqan: “Teytallë, ¿qayamarqunkiku?”. Tsënam Elïqa, “manam qayarqoqtsu, punukoq kutikuy” nirqan. Punukoq kutirirqa yapëmi qayëkäyanqanta wiyarqan. Y juk kuti mas wiyanqanchömi Elïqa cuentata qokurirqan Samuelta Jehovä parlapëta munanqanta. Tsëmi contestanampaq kënö yachatsirqan: “Punoq kutikuy y yapë qayashuptikiqa kënö ninki: ‘Wiyëkaqmi Teyta Jehovä, ¿imallapaqtan qayëkämanki?’”.

Samuelqa punukoq kutirirmi “Samuel, Samuel” neqta yapë wiyarqan. Tsëmi Samuelqa “wiyëkaqmi Teyta Jehovä, ¿imallapaqtan qayëkämanki?” nirqan. Tsënam Jehoväqa kënö nirqan: “Elïta willë pëtawan familianta castiganäpaq kaqta. Pëqa carpa wayïchö wamrankuna mana allikunata rurëkäyaptimpis manam corregishqatsu”. Waränin junaqqa imëpis ruranqannöllam Samuelqa carpa wayiman yëkuyänan punkukunata kicharqan. Peru mantsarqanmi Jehovä ninqanta Elïta willëtaqa. Elïqa qayarirmi kënö tapurqan: “Hïju, ¿imatataq Jehovä nishurqunki?”. Tsënam Samuelqa llapanta willarqan.

Samuel winariptimpis Jehoväqa amïgun karmi sïguirqan. Y llapan israelïtakunam musyariyarqan Diospa willakoqnin y juez kanampaq Samuelta Jehovä akranqanta.