¿Jehoväpa testïgunkunachöqa warmikuna yachatsikuyanku?

Awmi, mëtsikaq warmikunam entëru Patsachö yachatsikuyan. Diospa alli noticiankunata willakoq warmikunaqa mëtsikam kayan, y pëkunapaqqa, Salmus 68:11 textuchömi kënö nin: “Alli noticiakunata willakoq warmikunaqa mëtsika soldädukunanömi kayan”.

Jehoväpa testïgunkunachö warmi kaqkuna rurayanqanqa, alläpa jukläyam wakin religionkunachö warmikuna rurayanqanwanqa. ¿Imachötan jukläya kayan?

Puntataqa, jukläya grüpu nunakunatam yachatsiyan. Juk religionchö warmikunaqa iglesiankunachö yachatsikuyänampaqmi autoridäyoq kayan. Tsëmi pëkunaqa iglesianchö këkaq nunakunata yachatsiyan. Peru Jehoväpa testïgun warmikunaqa wayin wayin y mëchöpis tariyanqan nunakunatam yachatsiyan y manam iglesiankunachö këkaqkunatatsu.

Wakin religionchö warmikunaqa iglesianchö këkaqkunatam dirigiyan y imakunata rurayänampaq kaqtam yachatsiyan. Peru Jehoväpa testïgun warmikunaqa manam bautizashqa ollqukuna këkäyaptin yachatsikuyantsu. Congregacionchö yachatsikoqkunaqa kayan anciänukunallam, pëkunam yachatsikuyänampaq autoridäyoq kayan (1 Timoteu 3:2; Santiägu 3:1).

Bibliachöqa willakun unë witsan congregacionkunachöqa ollqukunalla yachatsikuyanqantam. Apostol Pablupis tsënöllam Tïtu jutiyoq juk anciänuta kënö nirqan: “Crëtachöqa dejarqaq imapis mana alli këkaqkunata correginëkipaq y cada markachö anciänukunata churanëkipaqmi” (Tïtu 1:5). Y ollqu kaqkunatam apostol Pabluqa nirqan, ‘anciänu kaqqa imapitapis mana acusashqa y juk warmiyoqlla’ kanampaq (Tïtu 1:6). Y Timoteupaq juk cartata qellqanqanchöpis apostol Pabluqa kënömi nirqan: “Pï nunapis anciänu këta munarqa, alläpa alli rurëtam munëkan. Tsëmi anciänuqa kanan, imapitapis mana parlashqa, juk warmiyoqlla, [...] alli yachatsikuyta yachaq” (1 Timoteu 3:1, 2).

Peru ¿imanirtan congregacionchöqa ollqu kaqkunalla anciänu këta puëdiyan? Apostol Pablum kënö nirqan: “Manam permitïtsu warmi yachatsikunanta ni ollquta dominananta, tsëpa rantinqa upällam kanan. Teyta Diosqa Adantam puntata rurarqan, tsëpitanam Ëvata rurarqan” (1 Timoteu 2:12, 13). Ollqu kaqkunata Diosnintsik puntata kamanqanmi rikätsimantsik, Diosqa pëkuna dirigeq y yachatsikoq kayänampaq munanqanta.

Jehoväpa llapan sirweqninkunapa dirigeqninqa Jesucristum, tsëmi ollqukunaqa Jesus ruranqannölla rurayan. Discïpulu Lücasmi nirqan Jesusqa ‘markan markan y caserïun caserïun, Diospa Gobiernumpita alli noticiakunata willakur ëwanqanta’. Y pënölla yachatsikuyänampaq qateqninkunata Jesus mandaptinqa, ¿imatataq rurayarqan? Alli noticiakunata willakur y qeshyëkaqkunata alliyätsir, caserïun caserïun wakpa këpam ëwayarqan (Lücas 8:1; 9:2-6).

Pëkunanöllam, Jehoväpa llapan sirweqninkunaqa warmipis y ollqupis Mateu 24:14 ninqanta cumplirnin kushishqa yachatsikurnin puriyan. Tsë textuchöqa Jesusmi kënö nirqan: “Y llapan nacionpita nunakuna musyayänampaqmi, Teyta Diospa Gobiernumpita alli noticiakunata entëru patsachö willakuyanqa, y tsëpitanam ushakë chämunqa”.