Juk ulikirëkur Dios jutinnaq

NUNAKUNA NIYANQAN

“Manam ni ima acuerduman chayarqötsu Dios jutiyoq kanqanta o mana kanqanta ninapaqqa. Y jutin kaptimpis, manam musyashwantsu ima kanqanta.” (Profesor David Cunningham, Theological Studies librunchö.)

BIBLIA YACHATSIKUNQAN

Kikin Diosmi kënö nirqan: “Noqam Jehovä kä. Tsëmi jutï” (Isaïas 42:8). Jehovä jutiqa hebrëu idiömapitam shamun y “Pëmi Ruranampaq Yuritsin y Rurakätsin” ninanmi (Genesis 2:4, nota).

Jehoväqa munan jutinta utilisänatam. Tsëmi Biblia kënö nin: “Jutinta parlayë. Ruranqankunata markakunachö willakuyë. Jutin imapitapis mas jatun kanqanta willakuyë” (Isaïas 12:4).

Jesusqa Diospa jutinta utilisarqanmi. Juk kutim Teytanman mañakurnin kënö nirqan: “jutillequi allapa respetuwan alabashqa catsun” (Mateu 6:9). Jina qateqninkunatapis yachatsirqanmi. ¿Imanirtaq yachatsirqan? Pëmi kënö nirqan: “Pecunatam rasonpa qam Dios canqequita yachatsishqa cä [. . .]. Tsemi noqata cuyamanqequi cuyaquiniqui pecunacho canqa, y noqapis pecunacho cashaq” (Juan 17:26).

¿IMANIRTAQ YACHAKÏTA PROCURANKIMAN?

Juk yachaq nunam kënö qellqarqan: “Diosta jutimpa mana reqeq nunaqa manam Dios imanö kanqanta musyantsu [. . .] y vientu cuentalla kanqanta reqirninqa manam kuyëta puëdintsu”.

Victor jutiyoq nunam llapan semäna ushëkuna iglesiaman ëwaq, peru Diospitaqa manam ni imata musyaqtsu. Pëmi nin: “Diospa jutin Jehovä kanqanta musyarirninqa, tsëraq reqeq cuentam sientikurirqä. Tsëläya parlayanqan Diostaqa tsëran reqirirqä. Noqapaqqa, rasumpa kawaq Diosmi tikrarirqan y tsëpita patsëmi amïgö”.

Jehoväqa, jutinman yarpaqkunatam këta awnin: “Rikätsishaqmi ankupäkoq kanqäta, sirweq wamranta juk nuna ankupanqannö” (Malaquïas 3:16, 17). Jina jutimpa qayaqkunatapis Diosqa bendicinmi. Bibliam kënö nin: “Jehoväpa jutinta llapan parlaqkunam salvakuyanqa” (Romänus 10:13).