Jehová, “kushishqa Diosno” kashun
1 Jehová Diosqa razumpam munan, llapan nunakuna kushishqa kayänanta. Bibliachomi nin, Diosnintsikqa guardëkanmi shumaq hatun bendicionkunata llapan nunakunapaq, tsemi noqantsikta kushitsimantsik (Isa. 65:21-25). Tsemi parlakïnintsik rikarätsinman razumpa kushishqa kanqantsikta “shumaq alli willakita kushishqa Diospita” parlashqa (1 Tim. 1:11). Imano Reinupita willapäkonqantsikmi, rikätsinman razumpa kaqta kuyanqantsikta y nunakunaman interesanqantsiktapis (Rom. 1:14-16).
2 Horaqa manam faciltsu kushishqalla këkanantsik. Itsa wakin markakunachoqa manam llapan nunakunatsu wiyamashun Reinupita willapäkushqa, horaqa noqantsikpis problemakunachomi këkantsik. Kushishqalla kanapaqqa alleqmi pensanantsik, nunakuna allapa necesitayanqanta Diospa Reinumpita wiyeta y käyita markantsikcho (Rom. 10:13, 14, 17). Jehová ankupäkinincho salvakunapaq qomanqantsikman penseqa, yanapamäshunmi imepis kushishqalla kanapaq, nunakunata yachatsirnin.
3 Alli kaqman pensashun: Hina allim käyinantsik nenqantsikkunata. Problemakunapita y noticiakunapita nunakunawan parlar qallekurpis, manam tse mana allikunallatatsu parlakïkashwan. Diosqa mandamarqontsik “alli kaq noticiapita” willapäkunapaqmi (Isa. 52:7; Rom. 10:15). Tse willapäkiqa, parlan Dios änimanqantsik shumaq shamoqpitam (2 Ped. 3:13). Keta yarparmi Bibliapita textukunata inshinantsik “nanaq shonqukunata hampinapaq” (Isa. 61:1, 2). Keta rurarninmi llapantsik imepis kushishqa kashun.
4 Shumaq willapäkushqam, nunakuna cuentata qokuyanqa kushishqa kanqantsikta. Tseno markantsikcho Reinupita willapäkushqaqa, imepis rikätsikushunmi ‘kushishqa Diospa’ nunan kanqantsikta.