Tapukïkuna kaq

◼ Casakushqakuna, Jehoväpa Testïgonkuna Yachatsikuyänan Wayichö discursota wiyëta munarqa, ¿imatataq parlayänan ancianokunawan?

Biblia nenqannö casakuyänampaq alistakorqa Jehoväpa shutintam allichö horquyan, Yachatsikuyänan Wayichö kaptinnäqa. Marka mayi nunakunaqa, Yachatsikuyänan Wayichö rurayanqampitam musyayan Diospa markan imanö kanqantapis. Tsëmi, discursopaq Yachatsikuyänan Wayita mañakuyaptenqa, ancianokuna alleq rikäyänan, tsënöpa ‘llapantapis shumaq ordenadu rurayanampaq’ (1 Cor. 14:40).

Casakoqkunaqa cartapam puntallapitana Yachatsikuyänan Wayita discursopaq mañakuyänan. Tsëchö ëllukaq o qorikaq mëqan congregacionmampis comité de servicio nishqanmanmi cartata apatsiyänan, tsëchömi willayänan imë hunaq y imë höra kanantapis, y yarpäyänanmi tsë hunaqpaqrëkur ancianokuna reunionkunata huk hunaqman mana tumatsiyänampaq kaqta. Hina casakoqkunataqa alli portakuyanqampitam llapampis reqiyänan, y Bibliachö Jehová nenqannö y leynin nenqannömi kawayänan.

Yachatsikuyänan Wayichö rurayanqan Diosnintsikpaqnö kanampaqmi, manaraq progrämata alleq patsätsirnin casakoqkuna imanö rurayänampaq kaqtapis puntallapitana comité de serviciota willayänan. Ancianokunaqa manam waknö kënö rurë niyanqatsu, tsëpis, mana allitanö rikarqa, casakoqkunata niyanqam imata karpis altsayänampaq. Kingdom Melodies o cántico müsicallatam churayänan. Hina ancianokunaqa rikäyänanmi Yachatsikuyänan Wayita tsë hunaqpaq imanö altsayanqanta y sillakunata imanö patsätsiyanqantapis. Fötokunata tomar o videokunata grabarpis shumaq respëtollawanmi rurayänan. Tsë hunaq imanö rurayänampaq kaqtapis Yachatsikuyänan Wayichö yachakuriyanmanmi, huk congregacionkunapa reunionninkunawan mana tinkupuraptenqa. Casakuyänampaq invitacionta manam tablëroman churayanmantsu, pero Reinopita Willapäkïta Yachakunapaq reunionchöqa, willakuriyanmanmi casakushqakunapaq discurso imë kanampaq kaqtapis.

Noviapa akrashqa pushaqninkuna kaptenqa, manam bautizakushqaraqtsu kayänan, tsëpis manam allitsu kanman Biblia nenqampa contran kawaqkunaqa o mana allita ruraqkunaqa, tsëchö këkaqkuna mana allita mana pensayänampaq. Casakushqakunapaq discursotaqa huk ancianom ruranan, pëkunatam churayashqa Bibliapita yachatsikuyänampaq, y pëkunam tsë shumaq hunaqchö willapäyänampaq o yätsiyänampaq kayan (1 Tim. 3:2).

Imanö rurayänampaq kaqtapis discursaq anciano musyananmi, mana tsënö karnenqa imapis mana alli yarquptinchi pëpaqwan mana allita parlayanman. Ancianoqa, casakoqkunata tapunanmi novio këninchö imanö portakuyanqanta, tsëqa rasumpa kaqta y llapantam willayänan. Mëqan karpis, unë casakushqa karnenqa, Jehoväpa kaqchö y autoridadkunapa leyninchö yapë casakunampaq librena kanqantam rikätsikunan (Mat. 19:9). Tsëpaqqa, juezkunachö rakikanqan actapa copiantam ancianota rikätsinan.

Ancianokunata llapanta willayaptenqa, y pëkuna niyanqanta cäsokuyaptenqa, llapampaqpis alläpa kushikïpaqmi tsë hunaq kanqa (Pro. 15:22; Heb. 13:17).