¿Yachashaqtsuraq yachatsikïta?
1. ¿Imaraq yanapamäshun mana mantsakurnin yachatsikunapaq?
1 Imëllapis tsënö tapukushqa karqa, ¡ama yarpachakïtsu! Diospita yachatsikunapaqqa manam alli escuëlakunachö estudianqantsiktsu ni yurinqantsikpita yachaq kanqantsiktsu yanapamäshun. Yarpë, Jesucristupa punta qateqninkunatapis “mana estudiashga ni yachacushga” niyarqanmi, tsënö karpis shumaqmi alli willakïkunata yachatsikuyarqan. ¿Imataq yanaparqan? Jesus ruranqanta qatiyänampaq churakashqa kayanqanmi (Hech. 4:13, NTCN; 1 Ped. 2:21, QKW).
2. ¿Imanötaq Jesus yachatsikoq?
2 ¿Imanötaq Jesus yachatsikurqan? Nunakuna shumaq y alli käyiyänampaqnölla o mayayänampänöllam Jesusqa yachatsikoq. Yarpäyänampaqnölla yachatsikur qallaptin, igualatsikïwan y shumaq tapukïkunawan yachatsikuptinmi, nunakuna más wiyakïta munayaq (Mat. 6:26). Hina llapan shonqunwanmi nunakunata ankupaq o llakipaq (Mat. 14:14). Hinamampis, yachatsikunampaq kachamoq Teytan Jehová llapanchö yanapananta musyarmi, mana mantsakushpa rasun kaqta pï mëtapis parlapaq (Luc. 4:18).
3. ¿Imanötaq Jehová yanapamantsik más alli yachatsikunapaq?
3 Jehovämi yanapamantsik. Markanwan y Palabranwanmi Alli Yachatsikoq Teytantsikqa yanapamantsik alli willakïkunata shumaq yachatsikunapaq (Isa. 54:13). Jehoväqa, Tsurin imanö yachatsikunqantapis qellqatsirqanmi, tsëta leirnin yachakunapaq y pë ruranqannö ruranapaq. Hina santo espïritunwanmi yanapamantsik, y reunionkunachöpis yachatsimantsikmi (Juan 14:26). Y unëpitana alli yachatsikoq publicadorkunawan yachatsikurpis, más alli yachatsikïtam yachakuntsik.
4. ¿Imanötaq musyantsik alli willakïkunata nunakunaman chätsita puëdenapaq kaqta?
4 Tsëmi puëdëmanraqku nir llakinänantsiktsu, ‘yachatsicunapagga quiquin Dios Yayam poderninwan yanapamäshun’ (2 Cor. 3:5, NTCN). Jehová yanapamänata imëpis ashir, y yachatsimanqantsiknölla rurarqa, ‘paypag llapan imayca allicunallata ruranapag listo prevenïdom caycashun’ (2 Tim. 3:17, NTCN).