¿Manatsuraq domingokunapa yachatsikoq yarqunkiman?
1. ¿Imatataq yachakuntsik Filipos markachö Pabluwan yanaqinkuna rurayanqampita?
1 Sábado hunaqkunaqa Filïposchö yachaq judïokuna hamayaqmi, y tsë markachömi Pabluwan yanaqinkuna misionëronö viajarnin këkäyarqan. Pëkunapis tsë hunaq hamayaptinqa manachi pipis mana allita parlanmantsu karqan. Pero tsë hunaqchö judïokuna markankunapita yarqurir Diosman mañakuyanqanta musyarmi, yachatseq ëwayarqan. Tsënöpam Lidiawan wayinchö llapan këkaqkuna wiyakur bautizakuriyarqan. ¡Imanöraq Pabluwan yanaqinkuna kushikïkuyarqan! (Hechos 16:13-15.) Hina tsënöllam kanan witsampis domingokunapa pï më hamayan. Tsëqa, ¿manatsuraq tsë hunaq yachatsikoq yarqunkiman?
2. ¿Imakunatataq Jehoväpa testïgonkuna pasayashqa domingokunapa yachatsikuyänanrëkur?
2 Domingokunapa yachatsikunapaqqa sasaran kashqa. 1927 watapita patsëmi Jehoväpa testïgonkunaqa domingokunapa yachatsikur qallayarqan. Pero chikir y micharmi qallëkuyarqan. Estados Unidos nacionchömi mëtsikaq Testïgokunata carcelayarqan hamayänan domingokunapa Diospita yachatsikuyaptin y permïsonnaq publicacionkunata rantikuyaptin. Pero manam tsë rurëta haqiriyarqantsu. Tsëpa rantinqa, 1930 watakunachömi llapan congregacionkuna amänu kaqpura juntakëkur, grupo grupo yachatsikoq ëwayaq cargonkunachö këkaq territoriokunaman. Höraqa mëtsika publicadorkuna kayaptinmi autoridadkuna carcelëta munarpis imanëta puëdeyarqantsu. ¿Kushikuntsikku tsë wawqintsikkuna y panintsikkuna domingopa yachatsikunarëkur tukïta pasëkarpis alli tsarakuyanqampita?
3. ¿Imanirtaq domingokunapa yachatsikïqa alläpa alli kanman?
3 Alläpa alli hunaqmi yachatsikunapaq. Mëtsikaq nunakunam domingo hunaqpaqa trabajayantsu, tsëmi wayinkunachö hamar këkäyan. Wakin religiösokunanäqa tsë hunaq Diospita parlakurita masmi munayan. Domingokunapa reunionnintsik kaptinqa, Diospita yachatsikunapaqnö vestishqam këkantsik, tsëqa, ¿imanirtaq tiempïkita patsätsinkitsu manaraq reunión qallaptin o reunión ushariptin Diospita yachatsikoq yarqunëkipaq? Y munarninqa, allichi kanman mirkapëki apakuptikiqa.
4. ¿Imataraq tarishun domingokunapa yachatsikurninqa?
4 Domingokunapa yachatsikushqapis, tiempontsikqa kanqaran hamarinapaq. Y alläpa kushishqam hamarishun Diospa kaqta rurashqa karninqa (Pro. 19:23). ¡Noqantsikpis puëdentsikmi Lidiatanö pillatapis taririrnin kushishqa këta!